នាយករដ្ឋមន្រ្តីអង់គ្លេស លោក Boris Johnson បានបញ្ជាក់កាលពីថ្ងៃចន្ទថា វិធានបិទខ្ទប់និងការពារជំងឺកូវីដ ១៩ ដែលគ្រោងនឹងបញ្ចប់នៅខែមិថុនានេះ ត្រូវបានពន្យារយៈពេលចំនួន
៤ សប្តាហ៍បន្ថែមទៀត ពោលគឺរហូតដល់ថ្ងៃទី ១៩ ខែកក្កដា ដើម្បីជាការកាត់បន្ថយចំនួនករណីឆ្លង ខណៈពេលរដ្ឋាភិបាលកំពុងបង្កើនល្បឿននៃការចាក់វ៉ាក់សាំងទូទាំងប្រទេស។
លោក Johnson បានឱ្យដឹងនៅក្នុងសន្និសីទសារព័ត៌មានខ្លីមួយថា លោកមានទំនុកចិត្តថា កាលបរិច្ឆេទថ្មីសម្រាប់បន្ធូរបន្ថយការរឹតត្បិតការពារជំងឺឆ្លងនេះ នឹងក្លាយទៅជាកាលបរិច្ឆេទចុងក្រោយ ដែលជួយជំរុញយុទ្ធនាការចាក់វ៉ាក់សាំងកាន់តែលឿនបន្ថែមទៀត ដើម្បីទប់ទល់នឹងវ៉ារ្យ៉ង់ថ្មី ដែលអ្នកវិទ្យាសាស្ត្រចាត់ទុកថា អាចមានសមត្ថភាពចម្លងចន្លោះពី ៤០% ទៅ ៨០% ខ្លាំងជាងវ៉ារ៉្យង់នៅក្នុងចក្រភពអង់គ្លេសពីមុនទៀតផង។
ប្រភពដដែលបានឱ្យដឹងថា ត្រឹមថ្ងៃទី ១៩ ខែកក្កដាប្រជាជនចំនួន ២ ភាគ ៣ នៃប្រជាជនពេញវ័យនឹងទទួលបានវ៉ាក់សាំងទាំង ២ ដូសរួមទាំងមនុស្សគ្រប់រូបដែលមានអាយុលើសពី ៥០ ឆ្នាំ ខណៈមនុស្សគ្រប់រូប ដែលមានអាយុលើសពី ១៨ ឆ្នាំ នឹងទទួលបានវ៉ាក់សាំងលឿនជាងគោលដៅកំណត់មុនចុងខែនេះផងដែរ។ គម្លាតរវាងដូសទាំង២សម្រាប់ប្រជាជនអាយុច្រើនជាង ៤០ឆ្នាំក៏ត្រូវបានកាត់បន្ថយមកត្រឹមពី ១២ មកនៅត្រឹម ៨ សប្ដាហ៍វិញ ដើម្បីផ្តល់នូវការការពារអតិបរមាប្រឆាំងនឹងវ៉ារ្យង់ឱ្យបានឆាប់។
ដោយឡែក ការវិភាគថ្មីពីវិទ្យាស្ថានសុខភាពសាធារណៈអង់គ្លេសនៅថ្ងៃច័ន្ទបានបង្ហាញថាវ៉ាក់សាំង ២ ដូសនេះ គឺមានប្រសិទ្ធភាពខ្ពស់ប្រឆាំងវ៉ារ៉្យង់ប្រភេទថ្មីដែលត្រូវបានរកឃើញជាលើកដំបូងនៅក្នុងប្រទេសឥណ្ឌា។ ពោលគឺ វ៉ាក់សាំង Pfizer មានប្រសិទ្ធភាព ៩៦% ខណៈវ៉ាក់សាំង AstraZeneca មានប្រសិទ្ធភាព ៩២% ក្រោយចាក់បាន ២ ដូសរួច។
ទោះបីជាមានការព្រួយបារម្ភអំពីវ៉ារ៉្យង់ថ្មីនេះ ក៏ដោយក៏ការចាក់វ៉ាក់សាំងរបស់ចក្រភពអង់គ្លេសមានល្បឿនលឿនជាងប្រទេសដទៃនៅលើពិភពលោកជានិច្ច។ គិតត្រឹមថ្ងៃច័ន្ទនេះប្រជាជនអង់គ្លេសប្រហែល ៦២ ភាគរយ ទទួលបានវ៉ាក់សាំងខណៈប្រជាជនប្រមាណ ៤៥ ភាគរយ ទទួលបានវ៉ាក់សាំងទាំង ២ ដូស។
យោងតាមស្ថិតិរបស់អង់គ្លេស Covid Dashboard ចំនួនទទួលបានវ៉ាក់សាំងដូសទី១ ជាមធ្យមរយៈពេល ៧ ថ្ងៃ មានចំនួន ១៥៣ ៧៨៩ ដូស ក្នុង ១ ថ្ងៃ គិតត្រឹមថ្ងៃទី ៣ ខែមិថុនា និងប្រមាណ ៣៤០ ៣០៣ ដូស ក្នុង ១ ថ្ងៃសម្រាប់ដូសទី២។
បើសន្មតថា អត្រានេះមានស្ថេរភាពក្នុងរយៈពេល ២ សប្តាហ៍ មនុស្សជាង ២,១៥ លាននាក់ នឹងទទួលបានវ៉ាក់សាំងដូសទី១ និងប្រមាណ ៤,៧៦ លាននាក់ទៀតនឹងទទួលបានការចាក់វ៉ាក់សាំងដូសទី២។ ដូចនេះ ក្នុងរយៈពេល ៤ សប្ដាហ៍ ប្រជាជនប្រមាណ ៤,៣ លាននាក់ នឹងបានទទួលបានវ៉ាក់សាំងដូសទី១ និងប្រមាណ ៩,៥ លាននាក់ នឹងទទួលបានវ៉ាក់សាំងនៅដូសទី២។
លោក Nicholas Grasslyសាស្ត្រាចារ្យផ្នែកជំងឺរាតត្បាតនៅមហាវិទ្យាល័យ Imperial College London និងជាសមាជិកក្រុមអ្នកវិទ្យាសាស្ត្រជំងឺរាតត្បាតគ្រុនវិទ្យាសាស្ត្រគំរូ (SPI-M) បានឱ្យដឹងថា៖ «ការពន្យារ ពេលនេះ គឺជារយៈពេលដ៏សំខាន់មួយ ក្នុងការចែកចាយវ៉ាក់សាំងដូសទី២ ដើម្បីប្រឆាំងនឹងវ៉ារ៉្យង់ថ្មីដ៏កាចសាហាវនេះ»។
លោកវេជ្ជបណ្ឌិត Kit Yates សហប្រធានមជ្ឈមណ្ឌលជីវវិទ្យាគណិតវិទ្យា នៅសាកលវិទ្យាល័យ University of Bath និងជាសមាជិកក្រុមអ្នកជំនាញឯករាជ្យ Sage បានឱ្យដឹងថា៖ «នៅពេលយើងបន្ធូរបន្ថយការរឹតត្បិតសង្គមនោះ គឺអាស្រ័យលើនៃការចែកចាយវ៉ាក់សាំងថា តើប្រជាជនក្នុងប្រទេសទទួលបានវ៉ាក់សាំងដល់កម្រិតណាហើយ»។
លោកបានបានបន្ថែមថា៖ «ខ្ញុំខ្លាចថាបញ្ហាអាចបណ្ដាលមកពីការប្រកាន់ខ្ជាប់នូវទិន្នន័យចាក់វ៉ាក់សាំងជាជាងការប្រកាន់ខ្ជាប់លើកាលបរិច្ឆេទ អត្រាចំនួនឆ្លង ចំនួនអ្នកជំងឺ ដែលស្នាក់នៅមន្ទីរពេទ្យ និងផ្ទៀងផ្ទាត់ឡើងវិញចំនួនទាំងនេះឡើងវិញ»។
លោក Yates បានបន្ថែមទៀតថា៖ «វាចាំបាច់ក្នុងការប្រើវិធានការលើសពីការចាក់វ៉ាក់សាំង។ ការស្ដារ ឡើងវិញនៃប្រព័ន្ធតេស្ត និងប្រព័ន្ធតាមដាន ការធ្វើឱ្យប្រសើរឡើងនូវប្រព័ន្ធខ្យល់នៅក្នុងកន្លែងធ្វើការ និងសាលារៀនការផ្ដល់ជំនួយដល់ប្រជាជនដែលមានតេស្តវិជ្ជមាន និងវិធានញែកដាច់ពីគ្នាគឺ គឺសុទ្ធតែជាវិធានការ ដែលនឹងផ្តល់ភាពងាយស្រួលក្នុងការគ្រប់គ្រងស្ថានភាពបច្ចុប្បន្ន»។
ទិន្នន័យផ្លូវការកាលពីថ្ងៃទី ១៣ មិថុនា បានបង្ហាញថា ចក្រភពអង់គ្លេសរកឃើញករណីឆ្លងប្រចាំថ្ងៃដល់ទៅ ៧ ៤៩០ ករណី និងចំនួនអ្នកស្លាប់ថ្មីចំនួន ៨ ករណី។ ប្រទេសនេះផងដែរ ក៏បានរាយការណ៍ពីចំនួនករណីថ្មីជិត ៤,៥ លានករណី និងចំនួនមនុស្សស្លាប់ជាង ១២៨ ០០០ ករណី ចាប់តាំងពីមានជំងឺរាតត្បាតវីរុសកូវីដ ១៩ នេះមក៕