ប្រធានាធិបតីសហរដ្ឋអាមេរិក លោក ចូ បៃដិន នឹងស្នើធ្វើការតែងតាំងធនាគារិក និងអតីតមន្ត្រីនៃក្រសួងការបរទេសអាមេរិក លោក Thomas R. Nides ជាឯកអគ្គរដ្ឋទូតអាមេរិកថ្មីប្រចាំអ៊ីស្រាអែល។ នេះបើតាមសេចក្ដីថ្លែងការណ៍របស់សេតវិមានកាលពីថ្ងៃអង្គារទី ១៥ មិថុនា។
លោក Nides គឺជាអនុប្រធានក្រុមហ៊ុន Morgan Stanley ដែលជាក្រុមហ៊ុនធនាគារវិនិយោគធំជាងគេទី៤ របស់សហរដ្ឋអាមេរិក និងធ្លាប់ធ្វើជាអនុរដ្ឋមន្ត្រីការបរទេសពីឆ្នាំ ២០១១ ដល់ឆ្នាំ ២០១៣ ក្នុងអំឡុងពេលនៃការគ្រប់គ្រងរបស់អតីតប្រធានាធិបតី បារ៉ាក់ អូបាម៉ា។
លោក បៃដិន បានចំណាយពេលជាច្រើនខែ ដើម្បីជ្រើសរើសបេក្ខជនសម្រាប់តំណែងនៅទីកន្លែងដ៏រសើប ហើយធ្វើឱ្យមានការងឿងឆ្ងល់ពីអ្នកវិភាគគោលនយោបាយរបស់លោកចំពោះជម្លោះអ៊ីស្រាអែល-ប៉ាឡេស្ទីន។
ដោយត្រូវបានគេស្គាល់ថាជាអ្នកនយោបាយគាំទ្រអ៊ីស្រាអែលមកពីបក្សប្រជាធិបតេយ្យលោក Nides បានធ្វើការនៅពីក្រោយឆាក ដើម្បីជួយផ្ដល់ថវិការបស់សហរដ្ឋអាមេរិកសម្រាប់កិច្ចខិតខំប្រឹងប្រែងផ្តល់ជំនួយរបស់អង្គការសហប្រជាជាតិសម្រាប់ប្រជាជនប៉ាឡេស្ទីន។
លោក Nides ក៏ជាអ្នកចូលរួមវិភាគទានដ៏ធំមួយដល់គណបក្សប្រជាធិបតេយ្យផងដែរ ដោយប្រមូលថវិកាបានជាង ៤៥ ០០០ ដុល្លារ សម្រាប់បេក្ខជនបក្សប្រជាធិបតេយ្យក្នុង ១ ឆ្នាំៗ រួមទាំងសម្រាប់ផ្គត់ផ្គង់យុទ្ធនាការនយោបាយរបស់លោក បៃដិន ផងដែរ៕