ប្រធានាធិបតីអាមេរិក លោក ចូ បៃដិន និងប្រធានាធិបតីរុស្ស៊ីលោក វ៉្លាឌីមៀរ ពូទីន នឹងប្រឈមមុខដាក់គ្នានៅថ្ងៃពុធ ទី ១៥ មិថុនា នៅក្នុងកិច្ចប្រជុំលើកដំបូងរបស់ពួកគេចាប់តាំងពីលោក បៃដិន បានចូលកាន់តំណែងដោយកិច្ចប្រជុំនេះនឹងអមជាមួយនឹងការខ្វែងគំនិតគ្នាយ៉ាងទូលំទូលាយ និងការរំពឹងទុកទាបសម្រាប់សមិទ្ធផលណាមួយ។
ពួកគេទាំង ២ ពោលថា ពួកគេសង្ឃឹមថា កិច្ចពិភាក្សារបស់ពួកគេនៅក្នុងទីក្រុងហ្សឺណែវ អាចនាំឱ្យមានទំនាក់ទំនងប្រកបដោយស្ថិរភាព និងអាចព្យាករបាន បើទោះបីជាពួកគេនៅតែមានភាពមិនយល់ស្របលើអ្វីៗទាំងអស់រាប់តាំងពីការគ្រប់គ្រងអាវុធ និងការវាយប្រហារតាមអ៊ីនធឺណិត រហូតដល់ការចោទប្រកាន់លើជ្រៀតជ្រែកក្នុងកិច្ចការផ្ទៃក្នុង និងភាពតានតឹងនៅអ៊ុយក្រែនជាដើមក៏ដោយ។
មន្ត្រីជាន់ខ្ពស់អាមេរិកម្នាក់បានប្រាប់អ្នកយកព័ត៌មាននៅលើយន្តហោះ Air Force One នៅពេលលោក បៃដិន កំពុងហោះទៅកាន់ទីក្រុងហ្សឺណែវថា៖ «យើងមិនរំពឹងថា នឹងមានសមិទ្ធផលធំណាមួយចេញពីកិច្ចប្រជុំនេះទេ»។
ទីប្រឹក្សាគោលនយោបាយការបរទេសរបស់លោក ពូទីន លោក Yuri Ushakov បាននិយាយថា៖ «ខ្ញុំមិនប្រាកដថា កិច្ចព្រមព្រៀងណាមួយនឹងត្រូវបានឈានដល់នោះទេ»។
ក្នុងរយៈពេលប៉ុន្មានឆ្នាំចុងក្រោយនេះ ទំនាក់ទំនងរវាងក្រុងវ៉ាស៊ីនតោន និងម៉ូស្គូ បានធ្លាក់ដល់កម្រិតទាបបំផុត មិនធ្លាប់មានតាំងពីការដួលរលំនៃសហភាពសូវៀត។ ចំណុចតានតឹងគួរឱ្យកត់សម្គាល់រួមមានការកាត់យកឧបទ្វីបគ្រីមា ដោយរុស្ស៊ីកាលពីឆ្នាំ ២០១៤ ការអន្តរាគមន៍សង្គ្រាមនៅស៊ីរីការចោទប្រកាន់ដោយអាមេរិក ដែលរុស្ស៊ីបានច្រានចោលអំពីការជ្រៀតជ្រែកក្នុងការបោះឆ្នោតប្រធានាធិបតីអាមេរិក ឆ្នាំ ២០១៦ និងការបណ្ដេញមន្ត្រីការទូតទៅវិញទៅមក និងការដាក់ទណ្ឌកម្មទៅវិញទៅមកជាដើម។
ទំនាក់ទំនងបានធ្លាក់ចុះបន្ថែមទៀតនៅក្នុងខែមីនា នៅពេលដែលលោក បៃដិន បាននិយាយថា លោកចាត់ទុកលោក ពូទីន គឺជា «ឃាតករ» ដែលជំរុញឱ្យប្រទេសរុស្ស៊ី កោះហៅឯកអគ្គរដ្ឋទូតរបស់ខ្លួនប្រចាំទីក្រុងវ៉ាស៊ីនតោនឱ្យត្រឡប់មកមាតុភូមិវិញសម្រាប់ការពិគ្រោះយោបល់។
ភ្លាមៗនោះដែរសហរដ្ឋអាមេរិក បានកោះហៅឯកអគ្គរដ្ឋទូតរបស់ខ្លួនប្រចាំម៉ូស្គូឱ្យត្រឡប់មកវិញកាលពីខែមេសានេះ។ ចាប់តាំងពីពេលនោះមកឯកអគ្គរដ្ឋទូតទាំង ២ មិនបានត្រឡប់ទៅបំពេញភារកិច្ចរបស់ពួកគេវិញ ធ្វើឱ្យស្ថានទូតនៃគូប្រជែងទាំង ២ មិនមានឯកអគ្គរដ្ឋទូតនៅប្រចាំការនៅឡើយទេ។
ការគ្រប់គ្រងអាវុធ គឺជាដែនសមត្ថកិច្ចមួយជំរុញឱ្យមានការរីកចម្រើនអាចកើតឡើង បើទោះបីជាមានការខ្វែងគំនិតគ្នាកាន់តែទូលំទូលាយក៏ដោយ។ កាលពីខែកុម្ភៈ កន្លងទៅ ប្រទេសរុស្ស៊ី និងសហរដ្ឋអាមេរិកបានយល់ព្រមបន្តសន្ធិសញ្ញា New START ៥ ឆ្នាំបន្ថែមទៀត ដែលជាកិច្ចព្រមព្រៀងចំនួនការដាក់ពង្រាយក្បាលគ្រាប់នុយក្លេអ៊ែររបស់ប្រទេសទាំង ២ ហើយដាក់កម្រិតលើចំនួនមធ្យោបាយបញ្ជូនគ្រាប់ទាំងនេះដូចជាមីស៊ីលដែលមានមូលដ្ឋានលើដី និងនាវាមុជទឹក រួមទាំងយន្តហោះទម្លាក់គ្រាប់បែកចម្ងាយឆ្ងាយផងដែរ។
មន្ត្រីជាន់ខ្ពស់អាមេរិកខាងលើបាននិយាយថា លោក បៃដិន នឹងបញ្ជាក់ប្រាប់លោក ពូទីន អំពីតំបន់ផលប្រយោជន៍ជាតិអាមេរិក ដែលមានការប្រព្រឹត្តមិនត្រឹមត្រូវរបស់រុស្ស៊ីនឹងនាំមកនូវការឆ្លើយតបមួយ។ កាលពីខែមេសា លោកបានចេញសេចក្ដីបញ្ជាប្រតិបត្តិដែលពង្រីកសិទ្ធិអំណាចរបស់ស្ថាប័នរដ្ឋាភិបាលអាមេរិកក្នុងការដាក់ទណ្ឌកម្មលើក្រុងម៉ូស្គូ។
លោក Vladimir Frolov អតីតអ្នកការទូតរុស្ស៊ីបាននិយាយថា លោក ពូទីន ចង់បានចំណងទំនាក់ទំនងគោរពគ្នាទៅវិញទៅមក ហើយលោកចង់ឱ្យអាមេរិកគោរពលោកដូចសមាជិកការិយាល័យនយោបាយសហភាពសូវៀតកាលពីទសវត្សរ៍ឆ្នាំ ១៩៦០-១៩៨០ ជាមួយនឹង «ការទទួលស្គាល់ជានិមិត្តរូបនៃភាពស្មើភាពគ្នារបស់រុស្ស៊ីក្នុងភូមិសាស្ត្រនយោបាយជាមួយសហរដ្ឋអាមេរិក»។
នៅក្នុងសភាពនៃទំនាក់ទំនងតានតឹងមួយនេះ ការជជែកនឹងមិនមានការទទួលទានអាហាររួមគ្នាទេ ហើយលោក ពូទីន និង បៃដិន ត្រូវបានគេរំពឹងថា នឹងធ្វើសន្និសីទសារព័ត៌មានដាច់ដោយឡែកផ្សេងគ្នា ជាជាងធ្វើការរួមគ្នា។
នេះ គឺផ្ទុយពីការចូលរួមរបស់លោក បៃដិន ក្នុងសម័យប្រជុំ G-7 សប្ដាហ៍នេះ ដែលរៀបចំឡើង ដោយនាយករដ្ឋមន្ត្រីអង់គ្លេសលោក Boris Johnson ដោយមេដឹកនាំប្រទេស G-7 និងប្ដីប្រពន្ធរបស់ពួកគេបានរៀបចំពិធីជប់លៀងសាច់អាំង និងថតរូបជា «គ្រួសារ» ជាដើម។
មុននឹងលោក បៃដិន ធ្វើដំណើរមកជួបជាមួយលោក ពូទីន លោកបានចូលរួមកិច្ចប្រជុំជាមួយក្រុមប្រទេស G-7 ជាមួយនឹងសហភាពអឺរ៉ុប និងសមាជិកអង្គការណាតូ ដែលក្នុងលោកបានធ្វើសេចក្ដីថ្លែងការណ៍រួមគ្នាជាមួយសម្ព័ន្ធមិត្ត ដើម្បីបង្ហាញពីការព្រួយបារម្ភលើប្រទេសរុស្ស៊ី និងចិន៕