.jpg)
មឈូសត្រូវបានប្រគល់ឱ្យស្របពេលអ្នកស្លាប់ដោយសារកូវីដ ១៩ កើនឡើងក្នុងទីក្រុងឡូសអេនជឺឡេស។ AFP
បើគិតត្រឹមរយៈពេលជាង ១៥ ខែ នៃវិបត្តិជំងឺរាតត្បាត ករណីស្លាប់ដោយសារជំងឺកូវីដ ១៩ នៅអាមេរិកកើនដល់ចំនួន ៦០ ម៉ឺនករណី ជាចំនួនច្រើនជាងគេបង្អស់នៅលើពិភពលោក ប៉ុន្តែនិន្នាការនេះ បានថយចុះពីចំនួនពាន់មកនៅត្រឹមរយវិញ ក្នុងរយៈពេលប៉ុន្មានសប្តាហ៍ថ្មីៗនេះ ដោយសារប្រសិទ្ធភាពនៃកម្មវិធីចាក់វ៉ាក់សាំង។
កាលពីអំឡុងចុងឆ្នាំ ២០២០ និងដើមឆ្នាំ សហរដ្ឋអាមេរិក បានរកឃើញករណីស្លាប់ចំនួន ១០ ម៉ឺនករណីក្នុង ១ ខែៗ។ ប៉ុន្តែក្រោយពេលមានប្រជាជនកាន់តែច្រើនឡើង ទទួលបានវ៉ាក់សាំងជាពិសេស ជនជាតិអាមេរិកាំង អត្រាមរណភាពដោយសាវីរុសកូវីដ ១៩ បានធ្លាក់ចុះយ៉ាងឆាប់រហ័ស។ បច្ចុប្បន្ន អ្នកស្លាប់ដោយសារជំងឺកូវីដ ១៩ បានធ្លាក់ចុះពី ៣ ពាន់នាក់ ក្នុង ១ ថ្ងៃនៅក្នុងខែមករា មកនៅត្រឹម ៣៧៥ នាក់ ក្នុង ១ ថ្ងៃជាមធ្យម នៅពេលបច្ចុប្បន្ន។
សហរដ្ឋអាមេរិក នៅតែជាប្រទេស ដែលមានចំនួនករណីស្លាប់ដោយសារកូវីដ ១៩ ច្រើនជាងគេ បើធៀបទៅនឹងប្រទេសនានានៅលើពិភពលោក ខណៈប្រទេសប្រេស៊ីល ឥណ្ឌា និងម៉ិកស៊ិកជាប្រទេស ដែលមានចំនួនអ្នកស្លាប់ច្រើនបន្ទាប់ពីអាមេរិក ដោយបច្ចុប្បន្នចំនួនអ្នកស្លាប់ដោយសារកូវីដ ១៩ នៅទូទាំងពិភពលោក មានចំនួន ៣,៨ លាននាក់។
ទោះបីជាយ៉ាងនេះក្តីចំនួនមរណភាពនៅក្នុងប្រទេសនេះ បានបង្ហាញសញ្ញាណធ្លាក់បន្តិចហើយក្រោយមានយុទ្ធនាការវ៉ាក់សាំង។ និន្នាការវិជ្ជមាននេះ បានជំរុញឱ្យរដ្ឋជាច្រើន ដកការរឹតត្បិតការពារជំងឺ ដោយរួមបញ្ជូលទាំងការមិនតម្រូវឱ្យមានការពាក់ម៉ាស់សម្រាប់បុគ្គលដែលបានទទួលវ៉ាក់សាំងពេញលេញ និងលុបបំបាត់តម្រូវការគម្លាតសង្គមផ្សេងៗផងដែរ។
ជាក់ស្ដែងអភិបាលទីក្រុង New York លោក Andrew Cuomo បានប្រកាសថា ទីក្រុងកំពុងបញ្ចប់រាល់ការរឹតត្បិតការពារជំងឺកូវីដ ១៩ ទៅលើពាណិជ្ជកម្ម និងសង្គមនៅទូទាំងទីក្រុងផងដែរ។
លោកបានឱ្យដឹងថា បច្ចុប្បន្នទីក្រុងនេះ បានចែកចាយវ៉ាក់សាំងមួយក្នុងអត្រាដល់ទៅ ៧០ភាគរយសម្រាប់មនុស្សពេញវ័យនៅទូទាំងទីក្រុង ឬច្រើនជាង ២០,២ លានដូសដល់ប្រជាជនក្នុងទីក្រុង និងមានចំនួនច្រើនជាងគេបើធៀបទៅនឹងរដ្ឋធំៗផ្សេងទៀតនៅអាមេរិក។
ទន្ទឹមនឹងនេះដែរ រដ្ឋ California ក៏បានប្រកាសបញ្ឍប់ការរឹតបន្តឹងគម្លាតសង្គមដូចគ្នា និងចាប់ផ្ដើមដំណើរការសកម្មភាពអាជីវកម្ម និងវិស័យផ្សេងៗមួយចំនួនដូចគ្នា។ ដោយឡែក រដ្ឋMassachusetts ក៏ចាប់ផ្ដើមបញ្ចប់ការបិទខ្ទប់ក្នុងរដ្ឋ និងបន្ថូរបន្ថយការរឹតត្បិតចរាចណ៍សង្គមផងដែរ។
ទោះជាយ៉ាងណាក្ដី សមាគមវិស័យធ្វើដំណើររបស់សហរដ្ឋអាមេរិក បាននិយាយកាលពីថ្ងៃអង្គារថា ដំណើរការធ្វើអាជីវកម្មនៅសហរដ្ឋអាមេរិកនឹងមិនងើបឡើងវិញភ្លាមៗនោះទេ ពោលគឺត្រូវចាំរហូតដល់ឆ្នាំ ២០២៤ ដោយសារតែ «ការប្រតិបត្តិតាមវិធីសាស្រ្តអាជីវកម្មថ្មី និងការបើកឱ្យដំណើរការឡើងវិញសន្សឹមៗ» ក៏ដូចជា«ការរឹតបន្តឹងយូរអង្វែង»របស់រដ្ឋាភិបាលផងដែរ។
បើយោងតាមមជ្ឈមណ្ឌលត្រួតពិនិត្យនិងការបង្ការជំងឺអាមេរិកហៅកាត់ថា CDC ប្រជាជនអាមេរិកាំងក្រោម ៦៥ ភាគរយ នៅទូទាំងប្រទេស ទទួលបានចាក់វ៉ាក់សាំងដូសទី១ ខណៈជាង ៤០ ភាគរយទៀត ទទួលបានចាក់វ៉ាក់សាំងពេញលេញហើយ។
ប៉ុន្តែតម្រូវការចាក់វ៉ាក់សាំងនៅសហរដ្ឋអាមេរិកបានធ្លាក់ចុះគួរឱ្យកត់សម្គាល់ដែលបណ្ដាលឱ្យនៅកន្លែងនានា កំពុងជួបប្រទះបញ្ហាសល់វ៉ាក់សាំងក្នុងអតិបរិមា និងកំពុងបង្កើតជាមន្ទិលសង្ស័យថា តើប្រទេសនេះនឹងឆ្លើយតបតាមគោលការណ៍របស់ប្រធានាធីបតីអាមេរិក លោក Joe Biden ក្នុងការចែកចាយវ៉ាក់សាំងដល់ប្រជាជនពេញវ័យអាមេរិកឱ្យបាន ៧០ ភាគរយ ឬយ៉ាងហោចទទួលបានវ៉ាក់សាំងដូសទី១ នៅទូទាំងប្រទេសឱ្យបានត្រឹមថ្ងៃទី ៤ ខែកក្កដា ឬយ៉ាងណា?
បើយោងតាមទិន្នន័យពី CDC គិតត្រឹម១សប្តាហ៍មុនសហរដ្ឋអាមេរិក ទទួលបានអត្រាអ្នកចាក់វ៉ាក់សាំងប្រមាណជា ១ លាននាក់ ក្នុង ១ ថ្ងៃ ពោលគឺធ្លាក់ចុះពីកម្រិតខ្ពស់ប្រហែល ៣,៣ លាននាក់ ក្នុង ១ ថ្ងៃជាមធ្យម នៅពាក់កណ្តាលខែមេសា៕
