ម្ចាស់ភាគហ៊ុន Microsoft និងក្រុមហ៊ុនវិនិយោគ Arjuna Capital បាននិយាយថា ខ្លួនបានស្វែងរកដំណោះស្រាយដោយព្យាយាមរករបាយការណ៍ស្តីពី «ប្រសិទ្ធភាពនៃគោលនយោបាយការបៀតបៀនផ្លូវភេទនៅកន្លែងធ្វើការរបស់ក្រុមហ៊ុន» បន្ទាប់ពីមានការចោទប្រកាន់ដែលសហស្ថាបនិក Bill Gates មានទំនាក់ទំនងមិនសមរម្យជាមួយនិយោជិត។
យោងតាមការស្រង់សម្តីរបស់សារព័ត៌មាន Aljazeera ក្រុមម្ចាស់ភាគហ៊ុននោះបានសរសេរនៅក្នុងរបាយការណ៍ថា៖ «យើងជំរុញ ឱ្យក្រុមហ៊ុន Microsoft ធ្វើការស៊ើបអង្កេតដោយឯករាជ្យនិងប្រឈមមុខនឹងបញ្ហាទាំងនេះប្រកបដោយតម្លាភាពពីព្រោះការបៀតបៀនផ្លូវភេទនិងការរើសអើងយេនឌ័រអាចធ្វើឱ្យប៉ះពាល់ដល់តម្លៃរបស់ម្ចាស់ភាគហ៊ុន»។
បន្ទាប់ពីការព័ត៌មានដែលថា លោក Gates និងអតីតភរិយារបស់លោកគឺលោកស្រី Melinda French Gates កំពុងលែងលះគ្នានោះក៏លេចចេញនូវព័ត៌មានអំពីសកម្មភាពមិនសមរម្យនានារបស់លោកទៅកាន់និយោជិត Microsoft មួយចំនួនផងដែរ។
ក្រុមហ៊ុនប្រាប់ថា ក្រុមហ៊ុនបានទទួលពាក្យបណ្តឹងនៅឆ្នាំ ២០១៩ ខណៈពេលដែលលោកGates បម្រើការនៅក្រុមប្រឹក្សាភិបាលរបស់ក្រុមហ៊ុន Microsoft ថាលោកបានព្យាយាមចាប់ផ្តើមមានទំនាក់ទំនងស្នេហាជាមួយនិយោជិតនៅឆ្នាំ ២០០០៕