នៅថ្ងៃពុធ ទី ១៦ មិថុនានេះ ប្រធានាធិបតីអាមេរិក លោក ចូ បៃដិន និងប្រធានាធិបតីរុស្សីលោក វ៉្លាឌីមៀរ ពូទីន បានយល់ព្រមបើកការចរចាលើបញ្ហាសន្តិសុខអ៊ីនធឺណិត និងការគ្រប់គ្រងអាវុធ បន្ទាប់ពីកិច្ចប្រជុំកំពូលដំបូងរវាងមេដឹកនាំទាំង ២ ហើយពោរពេញទៅភាពមិនចុះសម្រុងលើបញ្ហាមួយចំនួន រួមជាមួយបញ្ហាសិទ្ធិមនុស្ស និងភាពតានតឹងជាមួយអ៊ុយក្រែនផងដែរ។
លោក បៃដិន បានសួរលោក ពូទីន ថា តើលោកមានអារម្មណ៍យ៉ាងដូចម្ដេច ប្រសិនបើបណ្ដាញបំពង់បង្ហូរប្រេងរបស់រុស្សី រងការវាយប្រហារដោយមេរោគកុំព្យូទ័រទារជំរិតប្រាក់នោះ ដែលនេះជាសំណួរចង្អុលទៅកាន់ការជាប់គាំងបំពង់បង្ហូរប្រេងអាមេរិកដោយសារមេរោគបែបនេះកាលពីខែឧសភា និងបណ្តាលឱ្យមានការរំខាន រួមទាំងការទិញដោយភិតភ័យនៅតាមបណ្ដោយឆ្នេរសមុទ្រអាមេរិកខាងកើត។
ស្របពេលដែលលោក Biden បានសង្កត់ធ្ងន់ថា លោកមិនបានធ្វើការគំរាមកំហែងក្នុងពេលប្រជុំ លោកបាននិយាយថាលោកបានគូសបញ្ជាក់ដល់លោក ពូទីន អំពីផលប្រយោជន៍ជាតិសហរដ្ឋអាមេរិករួមទាំងសន្តិសុខតាមប្រព័ន្ធអ៊ីនធឺណិត និងបានបញ្ជាក់យ៉ាងច្បាស់ ថាសហរដ្ឋអាមេរិកនឹងធ្វើការឆ្លើយតបប្រសិនបើរុស្ស៊ីបំពានលើផលប្រយោជន៍ទាំងនោះ។
មេដឹកនាំទាំង ២ ក៏បានឈានដល់កិច្ចព្រមព្រៀងដ៏សំខាន់មួយ ប៉ុន្តែស្ទើរតែមិនមានការផ្លាស់ប្តូរទំនាក់ទំនងក្នុងបញ្ជូនឯកអគ្គរដ្ឋទូតរៀងៗខ្លួនឱ្យត្រឡប់ទៅប្រចាំការនៅម៉ូស្គូ និងវ៉ាស៊ីន តោនវិញ បន្ទាប់ពីភាគីទាំង ២ កោះហៅប្រមុខការទូតឱ្យត្រឡប់មកមាតុភូមិវិញ ខណៈពេលដែលទំនាក់ទំនងបានអន់ថយកាលពីដើមឆ្នាំនេះ។
បុរសទាំង ២ បានប្រើប្រាស់ពាក្យពេចន៍សមរម្យ ដើម្បីពិពណ៌នាអំពីកិច្ចប្រជុំនេះ ដោយលោក ពូទីន ការពិភាក្សាមានភាពស្ថាបនា និងគ្មានការគំរាមកំហែង ហើយលោក បៃដិន បាននិយាយថា គ្មានអ្វីអាចជំនួសការប្រជុំទល់មុខបានទេ។ ប៉ុន្តែការពិភាក្សារយៈពេល ៣ ម៉ោង របស់ពួកគេនៅក្រុងហ្សឺណែវ បានបញ្ចប់ដោយបុរសទាំង ២ នៅប្រកាន់ជំហរយ៉ាងរឹងមាំដូចដែលពួកគេមានមុនការចាប់ផ្ដើមកិច្ចប្រជុំ។
«ខ្ញុំមិនមានទំនុកចិត្តថា គាត់នឹងផ្លាស់ប្ដូរអាកប្បកិរិយារបស់គាត់ទេ» លោក បៃដិន បាននិយាយបែបនេះក្នុងសន្និសីទកាសែតក្រោយកិច្ចប្រជុំ ហើយបន្តទៀតថា៖ «អ្វីដែលនឹងផ្លាស់ប្តូរអាកប្បកិរិយារបស់គាត់គឺ ការប្រតិកម្មរបស់ពិភពលោក ហើយបន្ថយជំហរនៅលើពិភពលោក។ ខ្ញុំមិនមានទំនុកចិត្តលើអ្វីផ្សេងទៀតទេ»។
លោក បៃដិន បាននិយាយថា នឹងមានផលវិបាក «ធ្ងន់ធ្ងរ» សម្រាប់ប្រទេសរុស្សី ប្រសិនបើមេដឹកនាំចលនាប្រឆាំងលោក Alexei Navalny បាត់បង់ជីវិត ខណៈពេលឃុំឃាំង។
ថ្លែងទៅកាន់ក្រុមអ្នកសារព័ត៌មានមុនលោក បៃដិន លោក ពូទីន បានច្រានចោលការព្រួយបារម្ភរបស់សហរដ្ឋអាមេរិកចំពោះលោក Navalny និងការបង្កើនវត្តមានយោធានៅជិតព្រំដែនភាគខាងកើតនៃប្រទេសអ៊ុយក្រែន។ លោកបាននិយាយថា ទីក្រុងវ៉ាស៊ីនតោនគ្មានជំហរក្នុងការបង្រៀនក្រុងម៉ូស្គូ ជុំវិញបញ្ហាសិទ្ធិមនុស្សទេ ហើយនិយាយថា ការបង្ក្រាបនៅក្នុងរុស្សី គឺធ្វើឡើងដើម្បីបង្ការការកើតភាពចលាចលដូចដែលកើតឡើងនៅអាមេរិក។
ទំនាក់ទំនងរុស្ស៊ី-អាមេរិក មានភាពយ៉ាប់យ៊ឺនក្នុងរយៈពេលប៉ុន្មានឆ្នាំចុងក្រោយនេះ ជាពិសេសបន្ទាប់ពីកាត់យកឧបទ្វីបគ្រីមាដោយរុស្ស៊ី ការអន្តរាគមន៍ក្នុងសង្គ្រាមនៅប្រទេសស៊ីរី និងលីប៊ី និងការចោទប្រកាន់ជ្រៀតជ្រែកកិច្ចការផ្ទៃក្នុងទៅវិញទៅមក។
កិច្ចប្រជុំនេះមានគោលបំណងសម្រាប់បន្ធូរបន្ថយភាពតានតឹង និងធ្វើឱ្យទំនាក់ទំនងមានស្ថិរភាព ហើយអាចព្យាករបាន។ ប៉ុន្តែភាគីទាំង ២ បានដាក់ការរំពឹងទុកទាបសម្រាប់ការសម្រេចសមិទ្ធផលធំដុំណាមួយ៕