វ៉ារ្យ៉ង់ Delta ថ្មី ឬ ត្រូវបានគេស្គាល់ថាជាវ៉ារ៉្យង់មកពីប្រទេសឥណ្ឌា កំពុងរីករាលដាលដល់ប្រទេសជាង ៨០ នៅទូទាំងពិភពលោក និងត្រូវបានអង្គការសុខភាពពិភពលោក បានដាក់វ៉ារ៉្យង់នេះទៅក្នុងចំណាត់ថ្នាក់ ប្រភេទដ៏គួរឱ្យបារម្ភខ្ពស់។
វ៉ារ្យ៉ងថ្មីនេះ ត្រូវបានអ្នកសិក្សានានាព្រមានថាមានសមត្ថភាពចម្លងខ្លាំង និងកាចសាហាវជាងវ៉ារ៉្យង់កូវីដ ១៩ ដទៃទៀតផងដែរ។ ប៉ុន្តែទោះយ៉ាងណាក្ដី អ្នកសិក្សាក៏បង្ហាញភ័ស្តុតាងនានា ដែលបញ្ជាក់បានពីប្រសិទ្ធភាពរបស់វ៉ាកសាំង បន្ទាប់ពីដូសទី២។
ការសិក្សារបស់អង់គ្លេសចេញផ្សាយនៅក្នុងទស្សនាវដ្តីវេជ្ជសាស្ត្រ Lancet កាលពីដើមខែមិថុនា បានពិនិត្យមើលកម្រិតនៃការបន្សាបអង្គបដិបក្ខប្រាណដែលផលិតនៅក្នុងរាងកាយមនុស្សទទួលបានវ៉ាក់សាំង ដើម្បីប្រឆាំងនឹងវ៉ារ៉្យង់ Delta នេះ។
គេបានរកឃើញថា កម្រិតនៃអង្គបដិបក្ខប្រាណរបស់អ្នកទទួលបានវ៉ាក់សាំង Pfizer-BioNTech ដូសទី២ មានកម្រិតទាបជាងវត្តមានរបស់វ៉ារ៉្យង់ Delta ជាង ៦ ដង បើធៀបនឹងវត្តមាននៃប្រភេទវ៉ារ៉្យង់កូវីដ ១៩ ដទៃ។
ដោយឡែក ការសិក្សាពីវិទ្យាស្ថានប៉ាស្ទ័របារាំងបានសន្និដ្ឋានថា ការបន្សាបអង្គបដិបក្ខប្រាណដែលផលិតដោយចាក់វ៉ាក់សាំង Pfizer-BioNTech មានប្រសិទ្ធភាពតិចជាង ៣ ទៅ ៦ ដង ក្នុងការប្រឆាំងនឹងវ៉ារ៉្យង់ Delta ជាងវ៉ារ្យង់ Alpha។
ទោះបីជាពួកគេបង្ហាញពីភាពខ្លាំងក្នុងការប្រឆាំងនឹងវ៉ារ្យ៉ង់នេះក្ដី កម្រិតប្រសិទ្ធភាពនៃការបង្កើតអង្គបដិបក្ខប្រាណ ដែលត្រូវបានគេពិនិត្យមើលក្នុងពិសោធន៍ នៅមិនទាន់មានកម្រិតគ្រប់គ្រាន់ ដើម្បីកំណត់ប្រសិទ្ធភាពនៃវ៉ាក់សាំងនៅឡើយទេ។ ជាពិសេសវ៉ាក់សាំងទាំងនេះ បានបង្កើតប្រព័ន្ធភាពស៊ាំជាលើកទី២ ក្នុងទម្រង់កោសិកា T ដែលមាននាទីជួយវាយប្រហារកោសិកាដែលឆ្លងរួច ប៉ុន្តែមិនបានសម្លាប់លើវីរុសនោះទេ។
យោងតាមទិន្នន័យចេញផ្សាយកាលពីថ្ងៃច័ន្ទនេះ ដោយសុខភាពសាធារណៈអង់គ្លេសបានឱ្យដឹងថា វ៉ាក់សាំង Pfizer-BioNTech និង AstraZeneca មានប្រសិទ្ធភាពក្នុងការការពារមិនឱ្យមានករណីធ្ងន់ធ្ងរ ដែលតម្រូវឱ្យសម្រាកនៅមន្ទីរពេទ្យ និងធ្វើឱ្យករណី ដែលឆ្លងដោយវ៉ារ៉្យង់ Delta មានលក្ខណៈស្រាលដូចករណីឆ្លងដោយវ៉ារ៉្យង់ Alpha ផងដែរ។
វ៉ាក់សាំង Pfizer-BioNTech ចំនួន ២ ដូស អាចជួយការពារវ៉ារ៉្យង់ Delta មិនឱ្យមានករណីធ្ងន់ធ្ងរត្រូវសម្រាកនៅមន្ទីរពេទ្យ បានទៅដល់ ៩៦% ឯណោះ ខណៈវ៉ាក់សាំង AstraZeneca មានប្រសិទ្ធភាពប្រមាណ ៩២%។ នេះបើយោងតាមការសិក្សាលើមនុស្សជាង ១៤ ពាន់នាក់។
បើយោងតាម ទិន្នន័យចេញផ្សាយដោយអាជ្ញាធរសុខាភិបាលអង់គ្លេសនៅចុងខែឧសភា ក៏បានធ្វើការសន្និដ្ឋានស្រដៀងគ្នាផងដែរ ចំពោះប្រសិទ្ធភាពរបស់វ៉ាក់សាំងលើករណីស្រាល។
វ៉ាក់សាំង Pfizer-BioNTech មានប្រសិទ្ធភាពប្រឆាំងនឹងវ៉ារ៉្យង់ Delta បានទៅដល់ ៨៨% ក្រោយ ២ សប្តាហ៍ បន្ទាប់ពីការចាក់ដូសលើកទី២ ខណៈវ៉ាក់សាំងដដែលនេះមានប្រសិទ្ធភាពការពារដល់ទៅ ៩៣% ចំពោះករណីវ៉ារ៉្យង់ Alpha។ ដោយឡែក សម្រាប់វ៉ាក់សាំង AstraZeneca បានបង្ហាញពីប្រសិទ្ធភាពដល់ទៅ ៦០% ប្រឆាំងនឹងករណីដែលបណ្តាលមកពីវ៉ារ៉្យង់ Delta និងប្រមាណ ៦៦% ក្នុងករណីវ៉ារ៉្យង់ Alpha។
យ៉ាងណាមិញ អ្នកវិទ្យាសាស្ត្រភាគច្រើនយល់ស្របថា ការការពារដ៏ល្អបំផុតក្នុងការប្រឆាំងនឹងវ៉ារ៉្យង់ Deltaគឺប្រជាជនត្រូវតែទទួលបានវ៉ាក់សាំងទាំង ២ ដូស។អ្នកវិទ្យាសាស្ត្របារាំងជាន់ខ្ពស់ Jean-François Delfraissy បាននិយាយថា ការបង្កើតឱ្យមានតំបន់ចាក់វ៉ាក់សាំងពេញលេញគ្រប់គ្នា គឺជាវិធីសាស្ត្រដ៏ល្អក្នុងការការពារកុំឱ្យវ៉ារ៉្យង់ Delta រីករាលដាលពេញសហគមន៍។
ការសិក្សារបស់សហរដ្ឋអាមេរិក កាលពីថ្ងៃទី ១០ ខែមិថុនានេះ ក៏បានចង្អុលបង្ហាញពីសារៈសំខាន់នៃការចាក់វ៉ាក់សាំង ដើម្បីការពារកុំឱ្យករណីឆ្លងថ្មីកើនឡើងខ្លាំងផងដែរ។ ប្រភពដដែលបានឱ្យដឹងថា៖ «ការបង្កើនសមាមាត្រនៃចំនួនប្រជាជន ដែលទទួលបានវ៉ាក់សាំងគឺជាគន្លឹះ ក្នុងការកាត់បន្ថយការលេចចេញនូវវ៉ារ៉្យង់ថ្មី និងបញ្ចប់ការរីករាលដាលនៃជំងឺកូវីដ ១៩ ផងដែរ»។
លោក Antoine Flahault ប្រធានវិទ្យាស្ថានសុខភាពសកលនៃសាកលវិទ្យាល័យ Geneva បានទទូចថា ការសង្កេតមើលការរក្សាគម្លាតសង្គម ការចែករំលែកព័ត៌មានអំពីការឆ្លង និងសង្កេតមើលការរឹតត្បិតនៅពេលមានករណីជួបជុំ នៅតែមានសារៈសំខាន់ក្នុងការទប់មិនឱ្យករណីឆ្លងកើនឡើងខ្លាំងព្រោះ ករណីឆ្លងកាន់តែច្រើនឱកាសនៃការបំលែងខ្លួននៃវីរុសក៏កាន់តែច្រើនដូចគ្នា៕