.jpg)
វ៉ាក់សាំងកូវីដ១៩របស់ក្រុមហ៊ុន Moderna។ AFP
កាលពីថ្ងៃសៅរ៍ ទី ១៩ មិថុនា សហរដ្ឋអាមេរិកបានបញ្ជូនវ៉ាក់សាំងកូវីដ ១៩ របស់ក្រុមហ៊ុន Moderna ចំនួន ២,៥ លានដូស ជូនកោះតៃវ៉ាន់ ដែលច្រើនជាងការបម្រុងទុកមុនដោយក្រុងវ៉ាស៊ីនតោន សម្រាប់កោះនេះរហូតទៅដល់ ៣ ដង។
វ៉ាក់សាំងទាំងអស់ចំនួន ២,៥ លានដូស បានចាកចេញពីក្រុង Memphis រដ្ឋ Tennessee សហរដ្ឋអាមេរិកនៅព្រឹកថ្ងៃសៅរ៍ តាមរយៈជើងហោះហើរក្រុមហ៊ុនអាកាសចរតៃវ៉ាន់ China Airlines ហើយត្រូវបានគេរំពឹងថា នឹងចុះចតនៅកោះតៃវ៉ាន់នៅល្ងាចថ្ងៃអាទិត្យនេះ។
ក្រុងវ៉ាស៊ីនតោន ដែលកំពុងប្រកួតប្រជែងភូមិសាស្ត្រនយោបាយជាមួយក្រុងប៉េកាំងតាមរយៈ «ការទូតវ៉ាក់សាំង» ដើមឡើយបានសន្យាបរិច្ចាគវ៉ាក់សាំងចំនួន ៧៥០,០០០ ដូសជូនកោះតៃវ៉ាន់ ប៉ុន្តែបានបង្កើនចំនួននេះបន្ទាប់ពីរដ្ឋបាលលោកប្រធានាធិបតី ចូ បៃដិន បានធ្វើការសន្យាចែកចាយវ៉ាក់សាំងអាមេរិកចំនួន ៨០ លានដូសជុំវិញពិភពលោក។
ក្រុងប៉េកាំង ដែលចាត់ទុកកោះតៃវ៉ាន់ជាផ្នែកសំខាន់មួយនៃទឹកដីរបស់ពួកគេ ម្ដងហើយម្ដងទៀតបានព្យាយាមធ្វើការផ្ដល់ជូនវ៉ាក់សាំងចិនទៅកាន់កោះតៃវ៉ាន់ ដែលកំពុងប្រយុទ្ធនឹងការកើនឡើងករណីវិជ្ជមានរបស់កូវីដ ១៩ ប៉ុន្តែក្រុងតៃប៉ិបានបដិសេធមិនទទួលដោយសម្ដែងការមិនទុកចិត្តលើសុវត្ថិភាព និងប្រសិទ្ធភាព៕
