.jpg)
កាលពីល្ងាចថ្ងៃសៅរ៍ ទី ១៩ មិថុនា កម្មករចំនួន ៣ នាក់ បានរងរបួសស្រាលក្នុងការផ្ទុះរោងចក្រផលិតគ្រាប់រំសេវនៅទីក្រុង Cacak ប្រទេសស៊ែប៊ី។ នេះបើតាមការរាយការណ៍របស់ទូរទស្សន៍រដ្ឋ RTS។
RTS បានរាយការណ៍ថា អភិបាលក្រុង Cacak បានបញ្ជាឱ្យភៀសខ្លួនប្រជាពលរដ្ឋ ដែលរស់នៅជិតរោងចក្រនោះ។ ប៉ូលិសបានបិទការចូលទៅកាន់បរិវេណនៃរោងចក្រនេះ ហើយរថយន្តសង្គ្រោះបន្ទាន់ និងពន្លត់អគ្គិភ័យត្រូវបានគេឃើញនៅជិតទីនោះ។
នេះគឺជាការផ្ទុះលើកទី២ ក្នុងខែនេះនៅឯរោងចក្រ Sloboda ដែលផលិតឧបករណ៍ប្រើប្រាស់ក្នុងផ្ទះ ក៏ដូចជាគ្រាប់កាំភ្លើងធំ រំសេវ និងសារធាតុផ្ទុះផ្សេងទៀត។ មិនមាននរណាម្នាក់រងរបួសនៅក្នុងការផ្ទុះកាលពីលើកមុន ដែលបានកើតឡើងនៅឃ្លាំងនៃរោងចក្រ។
ការផ្ទុះស្រដៀងនឹងនេះកាលពីឆ្នាំ ២០០៣ បានធ្វើឱ្យកម្មករ៣នាក់ស្លាប់ ខណៈការផ្ទុះមួយទៀតកាលពីឆ្នាំ ២០១០ មិនបានធ្វើឱ្យមានជនរងគ្រោះទេ៕
