យុទ្ធនាការចាក់វ៉ាក់សាំងកូវីដ ១៩ នៅទូទាំងប្រទេសចិន សម្រេចបានជិត ១ ពាន់លានដូសហើយ បើគិតត្រឹមចុងសប្តាហ៍មុន ដែលត្រូវបានគេចាត់ទុកថា ជាជំហានដ៏សំខាន់មួយរបស់ចិនក្នុងការអនុវត្តកម្មវិធីចែកចាយវ៉ាក់សាំងធំបំផុត ខណៈប្រទេសនេះកំពុងការពារករណីឆ្លងថ្មីចូលស្រុក។
នេះបើតាមការឱ្យដឹងពីគណៈកម្មការសុខភាពជាតិបានប្រកាសកាលពីថ្ងៃអាទិត្យ ដោយលើកឡើងថា ការសម្រេចនេះ គឺជាការបោះជំហានដ៏សំខាន់របស់ប្រទេសចិន។ យ៉ាងណាមិញបើយោងតាមសារព័ត៌មាន Bloomberg ទិន្នន័យនេះ ហាក់មិនត្រូវគ្នាជាមួយនឹងទិន្នន័យចែកចាយវ៉ាក់សាំងនៅទូទាំងពិភពលោកទេ ដោយចំនួន ដែលបានប្រកាសនេះមានចំនួនច្រើនជាង ១ ភាគ ៣ នៃចំនួនចែកចាយនៅទូទាំងពិភពលោកពេលបច្ចុប្បន្នទៀត។
ប្រភពដដែលបានរាយការណ៍ថា ការចែកចាយវ៉ាក់សាំងសរុបនៅទូទាំងពិភពលោកមានចំនួនដល់ទៅ ២,៥ ពាន់លានដូស កាលពីសប្តាហ៍មុន ឬស្មើនឹង ៣៧ លានដូស ជាមធ្យមក្នុង ១ ថ្ងៃ។ យ៉ាងណាមិញ កម្រិតចែកចាយវ៉ាក់សាំងជាប្រចាំថ្ងៃជាមធ្យមរបស់ប្រទេសចិន ក្នុងខែនេះ មានចំនួនជាង ១៨ លានដូស ដែលជាចំនួនខ្ពស់បំផុត (គិតត្រឹមថ្ងៃសុក្រ) ដោយបានចែកចាយវ៉ាក់សាំងជាង ២៣ លានដូស ក្នុង ១ ថ្ងៃ។
អ្នកស្រាវជ្រាវនៅឯមជ្ឈមណ្ឌលផលិតវ៉ាក់សាំង Imperial College លោក Zolta nKis បាននិយាយថា៖ «ទិន្នន័យនេះ ពិតជាចំនួនមួយដ៏គួរឱ្យចាប់អារម្មណ៍ណាស់ ទាំងការចែកចាយ និងការផលិត»។
ប្រទេសចិន គ្រោងនឹងចែកចាយវ៉ាក់សាំងឱ្យបាន ៤០ ភាគរយ នៃប្រជាជនចំនួន ១,៤ ពាន់លាននាក់ របស់ខ្លួនឱ្យបានមុនខែកក្កដា ហើយគ្រោងនឹងចែកចាយយ៉ាងហោចណាស់ឱ្យបាន ៧០ ភាគរយនៃចំនួនប្រជាជនគោលដៅនៅចុងឆ្នាំនេះ ដោយរហូតមកទល់បច្ចុប្បន្នប្រទេសនេះពឹងផ្អែកតែលើវ៉ាក់សាំង ដែលផលិតក្នុងស្រុកទាំងស្រុងប៉ុណ្ណោះ។
ប៉ុន្តែវាត្រូវប្រឈមនឹងបញ្ហាចំនួនប្រជាជនច្រើនពេក ហើយ គេនៅមិនទាន់ដឹងច្បាស់ថា តើចំនួនប្រជាជនដែលទទួលបានវ៉ាក់សាំងពេញលេញមានប៉ុនណានោះឡើយ ព្រោះទិន្នន័យនេះគេនៅមិនទាន់បែងចែកចេញឱ្យច្បាស់លាស់នៅឡើយ។
ដូចគ្នានេះដែរ កាលពីដើមខែនេះ ក្រុមមន្រ្តីចិនក៏បានបង្ហាញទិន្នន័យកម្រដែលថា ប្រជាជនចំនួន ៦២២ លាននាក់ ទទួលបានវ៉ាក់សាំងហើយ បើគិតត្រឹមថ្ងៃទី ១០ ខែមិថុនា ប៉ុន្តែមិនបានបញ្ជាក់ថា តើមានប្រជាជនប៉ុន្មាននាក់ ទទួលបានវ៉ាក់សាំងពេញលេញនៅឡើយនោះទេ។
ដោយឡែក ក្រុមហ៊ុនផលិតវ៉ាក់សាំងចិនក៏បានពឹងផ្អែកលើបទពិសោធរបស់ពួកគេក្នុងការផលិតវ៉ាក់សាំង ដើម្បីពន្លឿនការផលិតវ៉ាក់សាំង និងប្រសិទ្ធភាព ដោយប្រើបច្ចេកវិទ្យាស្រដៀងគ្នាផងដែរ។
វីរុស វិទូ និងជាសាស្ត្រាចារ្យនៅសាកលវិទ្យាល័យហុងកុង លោក Jin Dong-yan បានឱ្យដឹងថា៖ «ទាំងវ៉ាក់សាំង Sinopharm និងវ៉ាក់សាំង Sinovac បានបង្កើតវ៉ាក់សាំងអសកម្ម (ផលិតដោយប្រើភ្នាក់ងារបង្កជំងឺ ដែលត្រូវបានគេចិញ្ចឹម និងសម្លាប់នៅក្នុងមន្ទីរពិសោធន៍) ដើម្បីសម្លាប់វីរុសដទៃទៀត ឧទាហរណ៍ដូចជា វីរុសជំងឺរលាកថ្លើមប្រភេទ A ដែលមានប្រសិទ្ធភាព ប៉ុន្តែបើឱ្យធ្វើការផលិតឱ្យបានច្រើននោះ មិនមែនជារឿងងាយស្រួលនោះទេ»។
លោកបន្ថែមថា បើចង់ពន្លឿន នោះ មិនមែនជារឿងពិបាកទេ តែបញ្ហាគឺថា ការរក្សាការត្រួតពិនិត្យគុណភាពតឹងរ៊ឹង ដើម្បីរក្សាប្រសិទ្ធភាពនៃវ៉ាក់សាំងអសកម្ម ពោលគឺជារឿងពិបាក ព្រោះវ៉ាក់សាំងនេះមិនដូចវ៉ាក់សាំងខ្លះទៀតត្រូវការតែគ្រឿងបក្ខារជីវឧស្ម័នពិសេស ដើម្បីរក្សានោះឡើយ។ ការគ្រប់គ្រងវ៉ាក់សាំងចំនួន ២០ លានដូស ដែលផលិតបានក្នុង ១ ថ្ងៃ មានការលំបាក ហើយដំណើរការនៃការដឹកជញ្ជូនក៏មានភាពស្មុគស្មាញទៀត។
យោងតាមការប៉ាន់ស្មានមួយចំនួនអ្នកផលិតវ៉ាក់សាំងរបស់ចិនអាចផលិតវ៉ាក់សាំងបានយ៉ាងហោចណាស់ ៣ ពាន់លានដូសក្នុងឆ្នាំ ២០២១។
លោក Feng Duojia ប្រធានសមាគមឧស្សាហកម្មវ៉ាក់សាំងចិនកាលពីដើមឆ្នាំនេះបានព្យាករថា វ៉ាក់សាំងចំនួន ៥ ពាន់លានដូស អាចនឹងត្រូវបានផលិតនៅក្នុងរោងចក្រនៅឆ្នាំ ២០២២ ហើយនាយកប្រតិបត្តិខ្លះមកពីក្រុមហ៊ុនផលិតវ៉ាក់សាំង ក៏បាននិយាយថា តួលេខអាចនឹងខ្ពស់ជាងនេះក៏ថាបាន៕