.jpg)
ប្រព័ន្ធការពារដែនអាកាសដែលមានរយៈកម្ពស់ខ្ពស់បំផុត (THAAD) របស់អាមេរិក។ AFP
សារព័ត៌មានអាមេរិកមួយបានរាយការណ៍កាលពីថ្ងៃសុក្រថា រដ្ឋការលោក ចូ បៃដិន កំពុងដកកាំភ្លើងធំប្រឆាំងមីស៊ីល Patriot ចេញពីប្រទេសចំនួន ៤ នៅមជ្ឈិមបូព៌ា ខណៈអាមេរិកកាត់បន្ថយចំនួនយោធារបស់ខ្លួននៅក្នុងតំបន់នេះ ស្របពេលមានការបន្ធូរបន្ថយភាពតានតឹងជាមួយអ៊ីរ៉ង់។
សារព័ត៌មាន Wall Street Journal បានរាយការណ៍ ដោយបានដកស្រង់សម្តីមន្ត្រីអាមេរិកមិនបញ្ចេញឈ្មោះថា មន្ទីរបញ្ចកោណ កំពុងដកកាំភ្លើងធំប្រឆាំងមីស៊ីល Patriot ចំនួន ៨ គ្រឿង ចេញពីប្រទេសអារ៉ាប៊ី សាអ៊ូឌីត អ៊ីរ៉ង់ កូវែត និងហ្ស៊កដានី រួមទាំងប្រព័ន្ធការពារតំបន់មានរយៈកម្ពស់ខ្ពស់បំផុត (THAAD) ចេញពីអារ៉ាប៊ី សាអ៊ូឌីត ដែលត្រូវបានដាក់ពង្រាយដោយរដ្ឋការអតីតប្រធានាធិបតី ដូណាល់ ត្រាំ។
ការដាក់ពង្រាយឡើងវិញ រួមមានទាហានអាមេរិករាប់រយនាក់ដែលប្រតិបត្តិការប្រព័ន្ធទាំងនេះ និងបានចាប់ផ្តើមកាលពីដើមខែនេះ បន្ទាប់ពីការសន្ទនាតាមទូរស័ព្ទកាលពីថ្ងៃទី ២ មិថុនា ដែលលោករដ្ឋមន្ត្រីការពារជាតិអាមេរិក Lloyd Austin បានផ្តល់ព័ត៌មានដល់ព្រះអង្គម្ចាស់ Mohammed bin Salman អំពីការផ្លាស់ប្តូរនេះ។ នេះបើយោងតាមសារព័ត៌មាន Journal។
សារព័ត៌មាន Journal បានរាយការណ៍ថា ការដកកាំភ្លើងធំប្រឆាំងមីស៊ីលទាំងនេះ បង្ហាញឱ្យឃើញពីការវិលទៅរកការការពារកម្រិតធម្មតា ជាទីដែលអាមេរិកបន្តរក្សាទុកទាហានរាប់ម៉ឺននាក់ ទោះបីជាខ្លួន បានកាត់បន្ថយចំនួនទ័ពដែលត្រូវបានដាក់ពង្រាយទៅកាន់ប្រទេសអាហ្វហ្គានីស្ថាន និងអ៊ីរ៉ាក់ក្តី។
មន្ត្រីការពារជាតិជាន់ខ្ពស់ម្នាក់បានប្រាប់ Journal ថា៖ «យើងនៅមានមូលដ្ឋានជាច្រើននៅក្នុងប្រទេសជាច្រើននៃដៃគូឈូងសមុទ្ររបស់យើង មូលដ្ឋានទាំងនោះ មិនបិទទេ»។
អាមេរិកបានដាក់ពង្រាយកាំភ្លើងធំប្រឆាំងមីស៊ីល Patriot និងទាហានទៅកាន់ប្រទេសអារ៉ាប៊ី សាអ៊ូឌីត ក្រោយពីការវាយប្រហារដោយដ្រូនរបស់អ៊ីរ៉ង់ បានចំរោងចក្រប្រេងជាច្រើនកន្លែងនៅអារ៉ាប៊ី សាអ៊ូឌីត និងដាក់ពង្រាយទៅកាន់ប្រទេសអ៊ីរ៉ាក់នៅក្នុងឆ្នាំ ២០២០ ក្រោយពីមានការវាយប្រហារមីស៊ីល និងរ៉ុក្កែតទៅលើកងកម្លាំងអាមេរិក ដោយអ៊ីរ៉ង់និងជនសកម្មប្រយុទ្ធគាំទ្រដោយអ៊ីរ៉ង់៕
