កាលពីថ្ងៃពុធ ទី ១៦ មិថុនា នាយករដ្ឋមន្ត្រីប្រទេសថៃលោក Prayut Chan-O-Cha បានសន្យាបើកប្រទេសវិញក្នុងរយៈពេល ១២០ ថ្ងៃ ដើម្បីជួយសម្រួលដល់សេដ្ឋកិច្ចជាតិ ខណៈប្រជាជនជាច្រើនបានបាត់បង់ការងារដោយសារជំងឺកូវីដ ១៩។
តាមការស្រង់សម្តីរបស់សារព័ត៌មាន Wall Street Journal នាយករដ្ឋមន្ត្រីថៃ លោក Prayut បានថ្លែងនៅក្នុងប៉ុស្តិ៍ទូរទស្សន៍ថា៖ «ខ្ញុំដឹងថា ការសម្រេចចិត្តនេះគឺមានហានិភ័យខ្លះ ពីព្រោះនៅពេលយើងបើកប្រទេសវិញ វានឹងមានការកើនឡើងនៃការឆ្លងវីរុសនោះ ទោះបីជាមានការប្រុងប្រយ័ត្នយ៉ាងណាក៏ដោយ។ ប៉ុន្តែខ្ញុំគិតថា បើយើងគិតពីតម្រូវការសេដ្ឋកិច្ចរបស់ប្រជាជនគឺដល់ពេលដែលយើងគួរតែសាកប្រថុយហើយ»។
ការប្តេជ្ញារបស់នាយករដ្ឋមន្រ្តីថៃបានធ្វើឡើងក្រោយពីសេដ្ឋកិច្ចប្រទេសថា បានធ្លាក់ចុះប្រមាណ ៦,១ ភាគរយ កាលពីឆ្នាំ ២០២០ ដែលការធ្លាក់ចុះនេះគឺទាបជាងគេបំផុតនៅក្នុងកំឡុងពេល ២ ទសវត្សរ៍ចុងក្រោយ។ នេះបើយោងតាមទិន្នន័យរបស់ធនាគារពិភពលោកកាលពីឆ្នាំមុន។
ប្រទេសថៃ បានចំណាយថវិកាច្រើនក្នុងការទប់ស្កាត់ការរីករាលដាលករណីកូវីដ ១៩។ វិស័យទេសចរណ៍នៅប្រទេសថៃ ដែលមានប្រមាណ ១៥ ភាគរយ នៃផលិតផលក្នុងស្រុកសរុបស្ទើរតែជាប់គាំងអំឡុងពេលមានការរឹតត្បិតក្នុងការធ្វើដំណើរ។ តួលេខផ្លូវការបង្ហាញថា ចំនួនភ្ញៀវទេសចរណ៍បានធ្លាក់ចុះពី ៣៩,៩ លាននាក់ក្នុងឆ្នាំ ២០១៩ មកត្រឹម ៦,៧ លាននាក់នៅឆ្នាំ២០២០ ។
ការសិក្សារបស់មន្រ្តីសុខាភិបាលថៃបានរកឃើញថា វីរុសបំប្លែងខ្លួនប្រភេទអាល់ហ្វាដែលរីករាលដាលកាន់តែខ្លាំងដែលត្រូវបានរកឃើញដំបូងនៅចក្រភពអង់គ្លេស គឺជាវីរុសដែលរកឃើញ ច្រើនជាងគេនៅក្នុងករណីថ្មីៗនេះ។
ក្នុងចំណោមអ្នកជំងឺ ៤ ១៨៥ នាក់ ដែលត្រូវបានស្ទង់មតិនៅចន្លោះខែមេសា និងមិថុនាគឺមានអ្នកជំងឺ ច្រើនជាង ៨៨ ភាគរយបានឆ្លងវីរុសអាល់ហ្វានេះ។ ការផ្ទុះឡើងករណីវិជ្ជមាននាពេលថ្មីៗនេះត្រូវបានរកឃើញនៅក្នុងក្លិបរាត្រីនៅទីក្រុងបាងកកហើយក្រោយមកបានរីករាលដាលដល់ខេត្តផ្សេងទៀតដែលឆ្លងដល់កម្មករដែលធ្វើការក្នុងរោងចក្រ។
លោក Sa-Nga Ruangvatnakul ប្រធានសមាគមអាជីវកម្មផ្លូវ Khaosan ដែលជាគោលដៅទេសចរណ៍ដ៏ពេញនិយមបំផុតមួយក្នុងទីក្រុងបាងកកបាននិយាយថា៖«យើងបានត្រៀមខ្លួនបើកដំណើរការឡើងវិញហើយពីព្រោះប្រជាជនកំពុងរងទុក្ខ»។ លោកបានបន្តនិយាយថា អាជីវកម្មត្រូវបានបិទ បុគ្គលិកមិនបានបើកប្រាក់ខែច្រើនខែទៀត ដូច្នេះយើងមិនអាចរង់ចាំបានទៀតទេ។
រដ្ឋាភិបាលនឹងអនុវត្តផែនការបើកដំណើរការកោះទេសចរណ៍ភូកេតនៅថ្ងៃទី ១ ខែកក្កដា ដែលអនុញ្ញាតឱ្យជនបរទេសដែលចាក់វ៉ាក់សាំងពេញលេញដែលមកពីប្រទេសដែលមានហានិភ័យទាបអាចធ្វើដំណើរដោយគ្មានការរឹតត្បិត។
គួរបញ្ជាក់ផងដែរថា ប្រជាជនថៃប្រមាណតិចជាង ៣ ភាគរយនៃប្រជាជនសរុបដែលមាន ៧០ លាននាក់បានទទួលការចាក់វ៉ាក់សាំងការពារកូវីដ ១៩ ដែលចំនួននេះជាអត្រាទាបបំផុតនៅតំបន់អាស៊ីអាគ្នេយ៍។ យុន្ទាការចាក់វ៉ាក់សាំងការពារកូវីដ ១៩ បានចាប់ផ្តើមនៅក្នុងខែកុម្ភៈទោះបីជាយុន្ទាការទូទាំងប្រទេសដែលមានទ្រង់ទ្រាយធំមិនត្រូវបានដាក់ឱ្យដំណើរការរហូតដល់ខែនេះក៏ដោយ។
ប្រទេសថៃ ពឹងផ្អែកទៅលើវ៉ាក់សាំងដែលផលិតក្នុងប្រទេសដោយក្រុមហ៊ុន Siam Bioscience ដែលសហការជាមួយក្រុមហ៊ុនឱសថ Astrazena។ ក្រុមហ៊ុន AstraZeneca និយាយថា កន្លែងផលិតវ៉ាក់សាំងរបស់ថៃដែលមិនដែលផលិតវ៉ាក់សាំងសោះត្រូវបានគេរំពឹងថា នឹងផលិតវ៉ាក់សាំងបានជាង ៦០ លានដូស ដល់មន្រ្តីថៃនិងជាង ២០០ លានដូសទៅប្រទេសដទៃទៀតក្នុងតំបន់។
ការដាក់ឱ្យដំណើរការចុះឈ្មោះចាក់វ៉ាក់សាំងមានភាពស្មុគស្មាញដោយសារតែមានកម្មវិធីចុះឈ្មោះច្រើន។ ១ សប្តាហ៍ បន្ទាប់ពីការចាប់ផ្តើមយុទ្ធនាការចាក់វ៉ាក់សាំង អ្នកដែលចុះឈ្មោះចាក់វ៉ាក់សាំងជាច្រើនត្រូវបានពន្យារពេលទទួលបានការចាក់វ៉ាក់សាំង៕