កាលពីថ្ងៃអាទិត្យ ទី ២០ មិថុនា មន្ត្រីប្រទេសលោកខាងលិច បានធ្វើការព្រមានទៅអ៊ីរ៉ង់ថា ការចរចាដើម្បីស្ដារកិច្ចព្រមព្រៀងនុយក្លេអ៊ែរ នឹងមិនបន្តរហូតដោយមិនមានការបញ្ចប់ទេ បន្ទាប់ពីគ្រប់ភាគីពាក់ព័ន្ធ បានធ្វើការប្រកាសសម្រាកពីការចរចា បន្ទាប់ពីអ៊ីរ៉ង់ទើបតែជ្រើសរើសប្រធានាធិបតីថ្មី។
ចក្រភពអង់គ្លេស បារាំង និង អាល្លឺម៉ង់ ដែល បានដើរតួជាអ្នកសម្របសម្រួលក្នុងការចរចាបាននិយាយថា កាលណាអ៊ីរ៉ង់រំលោភកិច្ចព្រមព្រៀងកាន់តែយូរទៅហើយផលិតសម្ភារនុយ-ក្លេអ៊ែរហាមឃាត់នឹងធ្វើឱ្យការស្ដារកិច្ចព្រមព្រៀងនេះ គឺកាន់តែលំបាក។ពួកគេបានបន្តទៀត ថា៖«ដូចដែលយើងបានបញ្ជាក់រួចមកហើយពេលវេលា គឺមិននៅខាងនរណាម្នាក់ទេ។កិច្ច ពិភាក្សាទាំងនេះ មិនអាចបើកចំហដោយមិនបញ្ចប់ទេ »។
ការចរចាដើម្បីឱ្យអ៊ីរ៉ង់ និងអាមេរិកត្រឡប់ទៅអនុលោមតាមកិច្ចព្រមព្រៀងនុយក្លេអ៊ែរ ២០១៥ ដែលដាក់កម្រិតលើកម្មវិធីនុយក្លេអ៊ែរអ៊ីរ៉ង់ ជាថ្នូរនឹងការដកទណ្ឌកម្មអន្តរជាតិ បានចាប់ផ្ដើមតាំងពីខែមេសាមកម្ល៉េះ។ កាលពីឆ្នាំ ២០១៨ ក្រុងវ៉ាស៊ីនតោន បានចាកចេញពីកិច្ចព្រមព្រៀងនេះ ហើយបានដាក់ទណ្ឌកម្មលើអ៊ីរ៉ង់វិញ ធ្វើឱ្យក្រុងតេអេរ៉ង់ឈប់អនុលោមតាមលក្ខខណ្ឌ ហើយចាប់ផ្ដើមបន្សុទ្ធនិងស្តុកទុកសារធាតុអ៊ុយរ៉ានីញ៉ូមកាន់តែច្រើនទៅៗ។
ការសម្រាកការចរចាកាលពីថ្ងៃអាទិត្យបានធ្វើឡើងបន្ទាប់ពី លោក Ebrahim Raisi ដែលជាអ្នកនយោបាយអភិរក្សនិយម និងអ្នកប្រឆាំងលោកខាងលិចយ៉ាងខ្លាំង បានឈ្នះការបោះឆ្នោតប្រធានាធិបតីកាលពីថ្ងៃសុក្រ។ ការឡើងកាន់អំណាចរបស់លោក Raisi ទំនងជាមិនផ្លាស់ប្ដូរជំហរចរចារបស់អ៊ីរ៉ង់ទេ ដោយសារមេដឹកនាំកំពូលរបស់អ៊ីរ៉ង់លោក Ayatollah Ali Khamenei គឺជាអ្នកធ្វើការសម្រេចចិត្តចុងក្រោយលើគោលនយោបាយធំៗរបស់អ៊ីរ៉ង់។
បើទោះជាយ៉ាងនេះក៏ដោយ អ្នកវិភាគមួយចំនួនបានគិតថា ក្រុងតេអេរ៉ង់ អាចមានចំណាប់អារម្មណ៍ក្នុងការជំរុញឱ្យមានកិច្ចព្រមព្រៀងមួយមុនពេលប្រធានាធិបតីថ្មីចូលកាន់តំណែងនៅខែសីហា ដែលអនុញ្ញាតឱ្យលោក Raisi ធ្វើការច្រានការចោទប្រកាន់ទៅអតីតប្រធានាធិបតី Hassan Rouhani ប្រសិនបើមានការរិះគន់ពីសាធារណជន៕