.jpg)
លោកឯកអគ្គរដ្ឋទូតរុស្ស៊ីប្រចាំនៅអាមេរិក Anatoly Antonov។ AFP
ឯកអគ្គរដ្ឋទូតរុស្ស៊ីប្រចាំសហរដ្ឋអាមេរិក បានវិលត្រឡប់ទៅប្រចាំការនៅស្ថានទូតក្រុងវ៉ាស៊ីនតោនវិញ ដោយនិយាយថាលោករំពឹងកសាងទំនាក់ទំនង «ស្មើភាពគ្នា និងសមហេតុផល» បន្ទាប់ពីកិច្ចប្រជុំកំពូលអាមេរិក– រុស្ស៊ីនៅទីក្រុងហ្ស៉ឺណែវ ប្រទេសស៊្វីស។
មុននឹងឡើងជើងហោះហើរពីទីក្រុងម៉ូស្គូ ទៅកាន់ទីក្រុងញូវយ៉កកាលពីថ្ងៃអាទិត្យ ទី ២០ មិថុនា លោកឯកអគ្គរដ្ឋទូត Anatoly Antonov បានប្រាប់សារព័ត៌មាន Ria Novosti ថា៖ «ដោយសារលទ្ធផលនៃជំនួបរវាងប្រធានាធិបតីទាំង ២ ខ្ញុំពឹងផ្អែកលើការងារស្ថាបនាជាមួយសហ សេវិកអាមេរិករបស់ខ្ញុំ ដើម្បីកសាងទំនាក់ទំនងស្មើភាពគ្នា និងសមហេតុផល»។
ទំនាក់ទំនងការទូតរវាងប្រទេសទាំង ២ បានបែកបាក់គ្នាយ៉ាងខ្លាំង ចាប់តាំងពីលោក ចូ បៃដិន ចូលកាន់តំណែង ហើយធ្វើការចោទប្រកាន់ថា រុស្ស៊ីបានជ្រៀតជ្រែកក្នុងការបោះឆ្នោតអាមេរិក និងបានធ្វើការវាយប្រហារតាមអ៊ីនធឺណិត។
បន្ទាប់ពីលោក បៃដិន បាននិយាយថាលោកចាត់ទុកប្រធានាធិបតីរុស្សីលោក វ្លាឌីមៀរ ពូទីន ជា«ឃាតករ» កាលពីខែមីនា រុស្ស៉ីបានកោះហៅលោក Antonov ឱ្យត្រឡប់មកមាតុភូមិវិញ ហើយបានប្រាប់ឯកអគ្គរដ្ឋទូតអាមេរិកប្រចាំក្រុងម៉ូស្គូលោក John Sullivan ថា លោកគួរតែត្រឡប់ទៅក្រុងវ៉ាស៊ីនតោនវិញ។
ក្នុងកិច្ចប្រជុំកំពូលក្រុងហ្ស៉ឺណែវលោក បៃដិន និងលោក ពូទីន បានយល់ព្រមបញ្ជូនឯកអគ្គរដ្ឋទូតទាំង ២ ឱ្យត្រឡប់ទៅប្រចាំការនៅស្ថានទូតរៀងៗខ្លួនវិញ៕
