.jpg)
លោក ចូ បៃដិន ថ្លែងនៅសេតវិមានកាលពីថ្ងៃទី ១៧ មិថុនា។ រូប AFP
ផែនការចែកចាយវ៉ាក់សាំងរបស់អាមេរិក ដែលប្ដេជ្ញាថា នឹងចែកចាយវ៉ាក់សាំងកូវីដ ១៩ ប្រមាណ ៨០ លានដូស ទៅប្រទេសទូទាំងពិភពលោកនៅត្រឹមចុងខែមិថុនានេះ ត្រូវយឺតជាងការរំពឹងទុកដោយសារជួបប្រទះឧបសគ្គមួយចំនួន ខណៈប្រទេសនេះប្រកាសពីផែនការថ្មីកាលពីថ្ងៃចន្ទ កន្លងទៅ។
សេតវិមាន (White House) បានប្រកាសពីផែនការចែកចាយវ៉ាក់សាំងចុងក្រោយប្រមាណ ៦០ លានដូស ទៅឱ្យសម្ព័ន្ធភាពវ៉ាក់សាំងសកល COVAX និងចំនួន ២០ លាន ត្រូវចែកចាយដោយផ្ទាល់ដល់ដៃគូជាក់លាក់។ ប៉ុន្តែមានវ៉ាក់សាំងប្រមាណ ១០ លានដូសប៉ុណ្ណោះ ត្រូវបានចែកចាយទូទាំងពិភពលោក ក្នុងនោះវ៉ាក់សាំង ២,៥ លានដូសចែកទៅឱ្យកោះតៃវ៉ាន់ កាលពីចុងសប្តាហ៍ហើយប្រមាណ ១ លាន ដូស ត្រូវចែកទៅឱ្យប្រទេសម៉ិកស៊ិក កាណាដា និងកូរ៉េខាងត្បូង នៅដើមខែនេះ។
ប្រភពដដែលបានឱ្យដឹងថា បើទោះជាការចែកចាយវ៉ាក់សាំងត្រូវបានពន្យារពេលដោយសារឧបសគ្គមួយចំនួនរួមមានតម្រូវការផ្នែកច្បាប់ភ័ស្តុភារ និងបទប្បញ្ញត្តិរវាងអាមេរិក និងប្រទេសអ្នកទទួលក៏ដោយ ក៏វ៉ាក់សាំងផលិតនៅសហរដ្ឋអាមេរិកត្រូវបានត្រៀមរួចរាល់ក្នុងការចែកចាយជានិច្ច។
លេខាធិការនៃសេតវិមានលោកស្រី Jen Psaki បានមានប្រសាសន៍ថា៖ «អ្វីដែលយើងបានរកឃើញថា ជាបញ្ហាប្រឈមធំបំផុត គឺមិនមែនការផ្គត់ផ្គង់ទេយើងផលិតបានវ៉ាក់សាំងជាច្រើនដូសហើយ ប៉ុន្តែយើងត្រូវជួបឧបសគ្គខាងច្បាប់ទាក់ទិននឹងភ័ស្តុភារខាងជលសាស្ត្រ»។
លោកស្រី Psaki បាននិយាយថា ការដឹកជញ្ជូននឹងចេញក្នុងពេលឆាប់ៗ នៅពេលណាដែលប្រទេសនានាត្រៀមខ្លួនទទួលយកដូសនេះ ហើយខាងរដ្ឋបាលនឹងចាត់វិធានការលើភាពស្មុគស្មាញខាងផ្នែកភ័ស្តុភារ រួមទាំងឧបករណ៍សម្រាប់ចាក់វ៉ាក់សាំងដូចជាសេរ៉ាំង និងអាល់កុល ការស្តុកទុកនីតិវិធីគយ និងផលលំបាកនៃការទំនាក់ទំនងផ្នែកភាសាផងដែរ។
យ៉ាងណាមិញ លោកស្រីមិនបានដឹងថា តើមានវ៉ាក់សាំងចំនួនប៉ុន្មាននឹងត្រូវដឹកជញ្ជូននៅចុងខែនេះទេ។
គួរបញ្ជាក់ផងដែរថា កាលពីថ្ងៃទី ១៧ ខែឧសភា ប្រធានាធិបតីអាមេរិក លោក Joe Biden បានប្រកាសថា៖ «ក្នុងរយៈពេល ៦សប្តាហ៍ខាងមុខសហរដ្ឋអាមេរិកនឹងបញ្ជូនវ៉ាក់សាំងចំនួន ៨០ លានដូសទៅបរទេសដែលចំនួននេះនឹងក្លាយជាចំនួនវ៉ាក់សាំងច្រើនជាងប្រទេសផ្សេងៗ ដែលបានចែកចាយវ៉ាក់សាំងកន្លងមកដល់ទៅ ៥ ដង ច្រើនជាងរុស្ស៊ី និងចិនដែលបានបរិច្ចាគ ១៥ លានដូសទៀត»។
កាលពីដើមខែនេះផងដែរ លោក Biden បានប្រកាសថា ក្រៅពីវ៉ាក់សាំង ៨០ លានដូស ដែលអាមេរិកផលិតបាន ប្រទេសនេះ ក៏នឹងទិញវ៉ាក់សាំងប្រមាណ ៥០០ លានដូសពីក្រុមហ៊ុន Pfizer ដើម្បីបរិច្ចាគទៅប្រទេសនៅទូទាំងពិភពលោកក្នុងឆ្នាំខាងមុខនេះ ដែលការចែកចាយលើកដំបូងត្រូវបានគេរំពឹងទុកថា នឹងធ្វើឡើងនៅខែសីហា។
ដំបូងឡើយលោក Joe Biden បានប្តេជ្ញាចែកចាយវ៉ាក់សាំង AstraZeneca ដែលផលិតក្នុងស្រុកប្រមាណ ៦០ លានដូស ដែលមិនទាន់ត្រូវបានអនុញ្ញាតឱ្យប្រើប្រាស់នៅសហរដ្ឋអាមេរិក (ប៉ុន្តែអនុញ្ញាតឱ្យប្រើនៅទូទាំងប្រទេស) ដល់ប្រទេសនៅទូទាំងពិភពលោក។ យ៉ាងណាមិញ វ៉ាក់សាំង AstraZeneca ត្រូវបានគេឃាត់ទុកកុំឱ្យមានការនាំចេញហើយតម្រូវឱ្យមានការត្រួតពិនិត្យសុវត្ថិភាពរយៈពេល ១ សប្តាហ៍ ដោយរដ្ឋបាលចំណីអាហារ និងឱសថអាមេរិកសិន។
ដោយសារតម្រូវការក្នុងស្រុកធ្លាក់ចុះ លោក Biden ត្រូវបានគេរំពឹងថា នឹងត្រូវបំពេញតាមការប្តេជ្ញាចិត្តខ្លួន ដោយចែកចាយវ៉ាក់សាំងចំនួន ៨០ លានដូសដោយមិនចាំបាច់ប្រើវ៉ាក់សាំង AstraZeneca។ សេតវិមានបានបង្ហាញផែនការកាលពីដើមខែនេះ នៃចំនួនវ៉ាក់សាំង ២៥ លានដូសដំបូង សម្រាប់ការនាំចេញវ៉ាក់សាំង Pfizer, Moderna និង Johnson &Johnson ដែលមានរួចហើយ និងមួយចំនួនទៀតបានចាប់ផ្តើមដឹកជញ្ជូនរួចផងដែរ។
គួរបញ្ជាក់ផងដែរថា កាលពីថ្ងៃចន្ទកន្លងទៅ រដ្ឋបាលលោក Biden បានប្រកាសថា ខ្លួននឹងចែកចាយវ៉ាក់សាំងចំនួន ៥៥ លានដូស ទៅប្រទេសនានា នៅអាមេរិកឡាទីន អាស៊ី និងអាហ្វ្រិក ខណៈវីរុសនេះកំពុងឆ្លងរាលដាលយ៉ាងឆាប់រហ័សនៅក្នុងប្រទេសដែលមានប្រាក់ចំណូលទាប និងមធ្យម។
ការចាក់វ៉ាក់សាំងចំនួន ៥៥ លានដូស គឺជាផ្នែកមួយ ដែលនៅសល់ពីការចែកចាយវ៉ាក់សាំងចំនួន ៨០ លានដូស ដែលលោក Biden ប្តេជ្ញាបរិច្ចាគទៅប្រទេសបរទេស។ កាលពីដើមខែនេះ រដ្ឋបាលបាននិយាយថា ខ្លួននឹងបញ្ជូនវ៉ាក់សាំងចំនួន ២៥ លានដូសដំបូងទៅអាមេរិកខាងត្បូង និងកណ្តាលអាស៊ីអាហ្វ្រិក បណ្តាប្រទេសជិតខាង និងសម្ព័ន្ធមិត្តសហរដ្ឋអាមេរិកផងដែរ៕
