.jpg)
ក្រុមសកម្មជន និងបាតុករនៅហុងកុងច្រើនឡើងៗ ស្វែងរកសិទ្ធិជ្រកកោននៅបរទេសបន្ទាប់ពីច្បាប់សន្តិសុខជាតិចូលជាធរមានកន្លងទៅ។ ប្រទេសអូស្ត្រាលី និងអង់គ្លេស ជាជម្រើសកំពូលសម្រាប់ក្រុមតស៊ូមតិសិទ្ធិមនុស្សហុងកុងភៀសខ្លួន ខណៈបណ្តាប្រទេសលោកខាងលិចដែលទទួលយកអ្នកដែលភៀសខ្លួនបានចេញនូវវិធានការលម្អិត ដើម្បីផ្តល់សិទ្ធិជ្រកកោនដល់ជាជនភៀសខ្លួន។
យោងតាមការស្រង់ទិន្នន័យរបស់សារព័ត៌មាន South China Morning Post បានរកឃើញថា មានប្រជាជនហុងកុងប្រហែល ៤៧០ នាក់ បានសុំសិទ្ធិជ្រកកោននៅក្នុងប្រទេសអូស្ត្រាលីអង់គ្លេសអាមេរិកកាណាដាអាល្លឺម៉ង់ និងនូវែលសេឡង់ក្នុងរយៈពេល ២ ឆ្នាំកន្លងមក។
ប្រទេសដែលមានប្រជាជនហុងកុងសុំសិទ្ធិជ្រកកោនច្រើនជាងគេ គឺនៅប្រទេសអូស្ត្រាលី ដែលមានមនុស្ស ៣០៥ នាក់ បានដាក់ពាក្យសុំការពារសិទ្ធិជនភៀសខ្លួនចន្លោះខែមិថុនា ឆ្នាំ ២០១៩ ដល់ខែឧសភា ឆ្នាំនេះ។
កាលពីខែកក្កដា ឆ្នាំ ២០២០ បន្ទាប់ពីច្បាប់សន្តិសុខជាតិបានចូលជាធរមានអ្នកកាន់លិខិតឆ្លងដែនហុងកុង ៣៤ នាក់ បានស្វែងរកសិទ្ធិជ្រកកោននៅទីនោះដែលជាចំនួនខ្ពស់បំផុតក្នុងរយៈពេលតែ ១ ខែបន្ទាប់ពីច្បាប់នេះចូលជាធរមាន។
គួរបញ្ជាក់ផងដែរថា ច្បាប់សន្តិសុខជាតិហុងកុងនេះ បានចូលជាធរមានកាលពីខែមិថុនា ឆ្នាំ ២០២០ ហើយច្បាប់នេះហាមឃាត់សកម្មភាពនៃការធ្វើអបគមន៍ ការធ្វើវិទ្ធង្សនា អំពើភេរវកម្ម និងការឃុបឃិតជាមួយកម្លាំងបរទេស។
ប្រទេសអង់គ្លេស បានទទួលពាក្យសុំចំនួន ១២១ ដោយមាន ៣៥ នៅក្នុងរយៈពេល ៣ ខែដំបូងនៃឆ្នាំ ២០២១។ ប្រទេសកាណាដា មានអ្នកដាក់ពាក្យសុំសិទ្ធិការពារជនភៀសខ្លួនចំនួន ២១ នាក់ នៅចុងឆ្នាំ ២០២០។
រីឯសហរដ្ឋអាមេរិកមិនរក្សាកំណត់ត្រាដាច់ដោយឡែកសម្រាប់អ្នកស្វែងរកសិទ្ធិជ្រកកោនហុងកុងទេប៉ុន្តែប្រហែលជា ១៥ នាក់ ត្រូវបានគេប៉ាន់ស្មានថាបានទៅទីនោះចាប់តាំងពីច្បាប់នេះ ចូលជាធរមាន។ យោងតាមមន្រ្តីអាល្លឺម៉ង់បានឱ្យ ដឹងថា ប្រទេសអាល្លឺម៉ង់ មានប្រជាជនហុងកុងចំនួន ៣ នាក់សុំសិទ្ធិជ្រកកោន៕
