សហរដ្ឋអាមេរិក សហភាពអឺរ៉ុប កាណាដា និងចក្រភពអង់គ្លេស បានដាក់ទណ្ឌកម្មជាផ្លូវការលើអង្គភាព និងមន្រ្តីបេឡារុសហើយបានអំពាវនាវឱ្យទីក្រុង Minsk បញ្ឈប់ការអនុវត្តការគាបសង្កត់ប្រឆាំងនឹងប្រជាជនរបស់ខ្លួន។
តាមការស្រង់សម្តីរបស់សារព័ត៌មាន Aljazeera កាលពីថ្ងៃទី ២១ មិថុនា នៅក្នុងសេចក្តីថ្លែងការណ៍រួមភាគីទាំង ៤ បាននិយាយថា៖ «យើងមានការព្រួយបារម្ភយ៉ាងខ្លាំងពីការបន្តមានការវាយប្រហារទៅលើសិទ្ធិមនុស្សសេរីភាពមូលដ្ឋាន និងច្បាប់អន្តរជាតិនៅក្នុងរបប Lukasheko»។
សេចក្តីថ្លែងការណ៍រួមបន្តសរសេរថា៖ «យើងប្តេជ្ញាចិត្តគាំទ្រប្រជាធិបតេយ្យរបស់ប្រជាជនបេឡារុសដែលត្រូវបានគាបសង្កត់ជាយូរមកហើយ ហើយយើងឈររួមគ្នាដើម្បីដាក់បន្ទុកលើរបបនេះចំពោះ ការមិនគោរពតាមការប្តេជ្ញាចិត្តរបស់អន្តរជាតិ»។
គួរបញ្ជាក់ផងដែរថា កាលពីខែឧសភាយន្តហោះរបស់ក្រុមហ៊ុនអាកាសចរណ៍ Ryanair ត្រូវបានបង្ខំឱ្យចុះ ចតនៅរដ្ឋធានី Minsk របស់ប្រទេសបេឡារុស មុនពេលអាជ្ញាធរប្រទេសនេះ ចាប់ខ្លួនអ្នកកាសែតម្នាក់នៅ លើយន្តហោះនោះ។
អ្នកកាសែតដែលត្រូវបានអាជ្ញាធរបេឡារុសចាប់ខ្លួនមានឈ្មោះ Roman Protasevich អាយុ ២៦ ឆ្នាំ ជាសហស្ថាបនិក និងអ្នកកែសម្រួលអត្ថបទព័ត៌មានរបស់ Nexta ដែលជាសារព័ត៌មានអនឡាញបានផ្សព្វផ្សាយពីការធ្វើបាតុកម្មទ្រង់ទ្រាយធំតាមរយៈកម្មវិធី Telegram។
នៅខែវិច្ឆិកា ឆ្នាំ ២០២០ បេឡារុស បានបើកការស៊ើបអង្កេតប្រឆាំងនឹង Protasevich ពីបទរំខានដល់ សណ្តាប់ធ្នាប់សង្គមនិងញុះញង់ឱ្យមានការស្អប់ខ្ពើមសង្គម។ ការចោទប្រកាន់នេះមានទោសជាប់ពន្ធនាគារជាង ១២ ឆ្នាំ។
លោក Protasevich ត្រូវបានចោទប្រកាន់ពីសកម្មភាពភេរវករខណៈដែលប៉ុស្តិ៍ Telegram របស់ Nexta និងស្លាកសញ្ញារបស់សារព័ត៌មានមួយនេះត្រូវបានដាក់ស្លាកថាជាក្រុមជ្រុលនិយមហើយត្រូវបានបញ្ជាឱ្យរារាំងដោយអាជ្ញាធរបេឡារុស។
ភាគីទាំង ៤ បានអំពាវនាវឱ្យទីក្រុង Minsk សហការជាមួយការស៊ើបអង្កេតអន្តរជាតិក្នុងឧប្បត្តិហេតុនៅយន្ដហោះដោះលែងអ្នកទោសនយោបាយទាំងអស់ជាបន្ទាន់ និងចូលទៅក្នុងកិច្ចពិភាក្សានយោបាយដ៏ទូលំទូលាយនិងពិតប្រាកដមួយជាមួយក្រុមប្រឆាំងប្រជាធិបតេយ្យ និងសង្គមស៊ីវិល។
សហភាពអឺរ៉ុបបាននិយាយថា ខ្លួនកំពុងដាក់បម្រាមលើការធ្វើដំណើរ និងបង្កកទ្រព្យសម្បត្តិមន្រ្តីចំនួន ៧៨ រូប រួមមានរដ្ឋមន្រ្តីក្រសួងការពារជាតិបេឡារុមេបញ្ជាការកងទ័ព អាកាសចៅក្រម សមាជិកសភានិង អង្គភាពនានាដូចជា ក្រុមហ៊ុនធនាគារឬសមាគម។ មនុស្សសរុបចំនួន ១៦៦ នាក់និងអង្គភាពចំនួន ១៥ ឥឡូវនេះស្ថិតនៅក្រោមវិធានការរឹតត្បិតរបស់សហភាពអឺរ៉ុប។
បន្ទាប់ពីកិច្ចព្រមព្រៀងបណ្តោះអាសន្នត្រូវបានព្រមព្រៀងកាលពីសប្តាហ៍មុន បណ្តារដ្ឋនៃសហភាពអឺរ៉ុប ក៏ត្រូវបានកំណត់ឱ្យដាក់ទណ្ឌកម្មសេដ្ឋកិច្ចលើវិស័យហិរញ្ញវត្ថុប្រេងនិងថ្នាំជក់ផងដែរ។
ក្នុងពេលជាមួយគ្នានេះក្រសួងរតនាគារសហរដ្ឋអាមេរិកនៅក្នុងសេចក្តីថ្លែងការណ៍មួយបាននិយាយថា ខ្លួនបានចុះបញ្ជីមនុស្ស ១៦ នាក់ និងអង្គភាពចំនួន ៥ ដើម្បីឆ្លើយតបទៅនឹងអំពើហិង្សានិងការគាបសង្កត់ របស់រដ្ឋាភិបាល Lukasheko រួមទាំងការចុះចតជើងហោះហើរដោយបង្ខំកាលពីខែឧសភា។
ក្រសួងរតនាគារសហរដ្ឋអាមេរិកបាននិយាយថា សកម្មភាពរបស់សហរដ្ឋអាមេរិកបានផ្តោតលើមិត្តជិតស្និទ្ធរបស់លោក Lukasheko រួមទាំងលេខាធិការសារព័ត៌មានរបស់លោក និងជាប្រធានក្រុមប្រឹក្សានៃសាធារណរដ្ឋនៃសភាជាន់ខ្ពស់នៃសភាបេឡារុស។
ចំពោះចក្រភពអង់គ្លេសវិញ បាននិយាយថាខ្លួនបានដាក់បម្រាមការធ្វើដំណើរនិងបង្កកទ្រព្យសម្បត្តិ ដែលមិនត្រឹមត្រូវប្រឆាំងនឹងមន្រ្តីជាន់ខ្ពស់បេឡារុសក៏ដូចជាក្រុមហ៊ុនប្រេង BNK ។
ការិយាល័យការបរទេសអង់គ្លេសបាននិយាយនៅក្នុងសេចក្តីថ្លែងការណ៍មួយថា ការដាក់ទណ្ឌកម្មនេះបានផ្តល់ជាសញ្ញាយ៉ាងខ្លាំងដល់អាជ្ញាធរបេឡារុសថា ចក្រភពអង់គ្លេសនឹងមិនអត់ឱនចំពោះអ្នកដែលគាបសង្កត់សិទ្ធិមនុស្ស ដែលចូលមកចក្រភពអង់គ្លេស ឬប្រើប្រាស់ស្ថាប័នហិរញ្ញវត្ថុរបស់ចក្រភពអង់គ្លេសឡើយ។
ប្រទេសអង់គ្លេសបាននិយាយថា ទណ្ឌកម្មរបស់ខ្លួនត្រូវបានដាក់ដោយឡែកពីសហភាពអឺរ៉ុបដែលខ្លួនបានចេញពីសហភាពកាលពីឆ្នាំមុន ប៉ុន្តែស្របនឹងការដាក់ទណ្ឌកម្មដែលបានប្រកាសដោយទីក្រុងវ៉ាស៊ីនតោន អូតាវ៉ា និងប្រ៊ុចសែល៕