យោងតាមប្រេសិតពិសេសរបស់អង្គការសហប្រជាជាតិ (UN) បានឱ្យដឹងថា តំបន់ជាង ៥០ ក្នុងចំណោមតំបន់សរុប ៣៧០ របស់អាហ្វហ្គានីស្ថាន បានធ្លាក់ទៅក្នុងការគ្រប់គ្រងយោធារបស់ក្រុមសកម្មប្រយុទ្ធតាលីបង់ ចាប់តាំងពីខែឧសភា មកម្ល៉េះ។
ប្រេសិតពិសេសរបស់អង្គការសហប្រជាជាតិ (UN) លោក Deborah Lyons បានប្រាប់ក្រុមប្រឹក្សាសន្តិសុខអង្គការសហប្រជាជាតិកាលពីថ្ងៃអង្គារថា៖ «ការបង្កើនសក្ដានុពលរបស់ក្រុមតាលីបង់នាពេលថ្មីៗនេះ មានសភាពកាន់តែគួរឱ្យបារម្ភ ដែលអាចក្លាយទៅជាលទ្ធផលនៃការពង្រឹងយុទ្ធនាការយោធារបស់ក្រុមនេះ កាន់តែខ្លាំងឡើង»។
លោកបានបន្តថា៖ «ស្រុកភាគច្រើនជាតំបន់ដែលត្រូវបានគេព័ទ្ធជុំវិញទីរួមខេត្ត ដែលជាកន្លែងក្រុម តាលីបង់កំពុងឈរជើង ដើម្បីព្យាយាមកាន់កាប់រដ្ឋធានីទាំងនេះ នៅពេលដែលកម្លាំងបរទេស ត្រូវបានដកចេញទាំងស្រុង»។
ដំណឹងនេះ កើតឡើងក្រោយមានការរាយការណ៍ស្ដីអំពីការប៉ះទង្គិចគ្នា ដោយអំពើហិង្សា ហើយបានធ្វើឱ្យខូចខាតដល់ហេដ្ឋារចនាសម្ព័ន្ធអគ្គិសនីសំខាន់ៗដែលបណ្តាលឱ្យដាច់ចរន្តអគ្គិសនីនៅក្នុងខេត្តចំនួន ១១ រួមទាំងទីក្រុងកាប៊ុល កាលពីថ្ងៃអង្គារ ផងដែរ។
ក្នុងរយៈពេល ២៤ ម៉ោង ក្រុមតាលីបង់បានកាន់កាប់ស្រុកជាច្រើននៅក្នុងខេត្ត Kunduz និងការឆ្លងកាត់ព្រំដែនដ៏សំខាន់ជាមួយរួមមាន Tajikistan ផងដែរ។ នេះបើយោងតាមសមាជិកម្នាក់នៃក្រុមប្រឹក្សាខេត្ត Kunduz។ លោក Rabani បាននិយាយថា សង្កាត់ទាំងនោះរួមមាន Chahar Dara, Khan Abad, Imam Sahib និង Shirkhan Bandar ដែលជាចំណុចឆ្លងកាត់ជាមួយតំបន់ Tajikistan។
កាលពីចុងសប្តាហ៍ក្រុមតាលីបង់ បានអះអាងថា ខ្លួនបានលុកលុយមូលដ្ឋានកងទ័ពអាហ្វហ្គានីស្ថានមួយនៅក្នុងរដ្ឋ Balkh ដែលស្ថិតនៅភាគខាងជើងប្រទេស។ វីដេអូឃោសនារបស់តាលីបង់ បានបង្ហាញពីសកម្មភាពក្រុមនេះ រឹបអូសយានយន្តយោធានិងអាវុធក្នុងតំបន់នេះ។
ពួកគេបានអះអាងនៅក្នុងវីដេអូមួយទៀតថា ពួកគេបានកាន់កាប់តំបន់កងទ័ពជាតិអាហ្វហ្គានីស្ថាន Humvees នៅក្នុងខេត្ត Takhar ភាគឦសានផងដែរ៕