.jpg)
លោកស្រីប្រធានគណៈកម្មការអឺរ៉ុប Ursula von der Leyen (ឆ្វេង) និងលោកនាយករដ្ឋមន្ត្រីអ៊ីតាលី Mario Draghi មកដល់ដើម្បីធ្វើសន្និសីទកាសែតរួមកាលពីថ្ងៃទី ២២ មិថុនា។ AFP
អង្គការសុខភាពពិភពលោក (WHO) បានឱ្យដឹងថា ខ្លួនមានការព្រួយបារម្ភអំពីការបន្ធូរបន្ថយវិធានការ ដើម្បីការពារជំងឺកូវីដ ១៩ របស់ប្រទេសដែលធ្វើជាម្ចាស់ផ្ទះការប្រកួតអឺរ៉ូ ២០២០ដោយកត់សម្គាល់ថា ករណីឆ្លងនៅប្រទេសមួយចំនួនកំពុងតែកើនឡើង។
លោក Robb Butler នាយកប្រតិបត្តិនៅការិយាល័យប្រចាំតំបន់របស់ WHO ប្រចាំអឺរ៉ុប បាននិយាយតាមរយៈអ៊ីមែលទៅកាន់ទីភ្នាក់ងារព័ត៌មាន AFP កាលពីថ្ងៃអង្គារ ទី ២២ មិថុនាថា៖ «អង្គការសុខភាពពិភពលោកព្រួយបារម្ភអំពីការបន្ធូរបន្ថយការរឹតត្បិតនៅក្នុងប្រទេសម្ចាស់ផ្ទះមួយចំនួន»។ លោកបន្តថា៖ «ឥឡូវនេះពហុកីឡដ្ឋានមួយចំនួនដែលរៀបចំការប្រកួតកំពុងបង្កើនចំនួនអ្នកទស្សនា»។
ទោះយ៉ាងណា លោក Butler មិនបានបញ្ជាក់ថា ប្រទេសណាឬក្រុងណាទេ ប៉ុន្តែចក្រភពអង់គ្លេស បានប្រកាសកាលពីថ្ងៃអង្គារថា អ្នកទស្សនាជាង៦ម៉ឺននាក់ នឹងត្រូវបានអនុញ្ញាតឱ្យចូលរួមទស្សនានៅពហុកីឡដ្ឋាន Wembley ក្នុងទីក្រុងឡុងដ៍ សម្រាប់ការប្រកួតវគ្គពាក់កណ្តាលផ្តាច់ព្រ័ត្រថ្ងៃទី ៦ និង ៧ ខែកក្កដា និងវគ្គផ្តាច់ព្រ័ត្រថ្ងៃទី ១១ ខែកក្កដា។ ដើមឡើយអង់គ្លេសមានគោលបំណងកំណត់ចំនួនមនុស្សចូលរួមត្រឹមតែ ៤ ម៉ឺននាក់ ដែលត្រូវនឹង ៥០ ភាគរយនៃចំណុះកីឡដ្ឋានប៉ុណ្ណោះ។
ទោះជាយ៉ាងណា អ្នកដែលមានសំបុត្រចូលរួមទស្សនាទាំងអស់ ត្រូវតែធ្វើតេស្តបញ្ជាក់លទ្ធផលអវិជ្ជមាននៃវីរុសកូវីដ ១៩ ឬបញ្ជាក់ថា ទទួលវ៉ាក់សាំងពេញលេញយ៉ាងហោចណាស់ ១៤ ថ្ងៃ មុនការប្រកួតចាប់ផ្ដើម។
ទន្ទឹមនឹងការព្រួយបារម្ភរបស់អង្គការសុខភាពពិភពលោក ( WHO) នាយករដ្ឋមន្រ្តីអ៊ីតាលីលោក Mario Draghi កាលពីថ្ងៃចន្ទ ក៏បានអំពាវនាវឱ្យមានការផ្លាស់ប្តូរទីតាំងប្រកួតអឺរ៉ូ ២០២០វគ្គផ្ដាច់ព្រ័ត្រចេញពីទីក្រុងឡុងដ៍ ដោយសារតែការរីករាលដាលវ៉ារ្យ៉ង់ដែលតា (Delta) នៃជំងឺកូវីដ ១៩ ដែលបំប្លែងខ្លួនដំបូងនៅប្រទេសឥណ្ឌា ផងដែរ។
លោក Draghi បានប្រាប់អ្នកយកព័ត៌មាននៅទីក្រុងប៊ែរឡាំង ក្នុងសន្និសីទកាសែតរួមគ្នាជាមួយអធិការបតីលោកស្រី Angela Merkel ថា លោកចង់ប្រាកដថា ការប្រកួតផ្តាច់ព្រ័ត្រជើងឯកអឺរ៉ុបនឹងមិនត្រូវធ្វើឡើងក្នុងប្រទេសដែលមានការរីករាលដាលវីរុសយ៉ាងឆាប់រហ័សនោះទេ។
ជាមួយគ្នានេះលោកស្រី Merkel ក៏បានជំរុញឱ្យសហភាពនៃសមាគមបាល់ទាត់សហភាពអ៊ឺរ៉ុបឬហៅកាត់ថា UEFA ធ្វើសកម្មភាពប្រកបដោយទំនួលខុសត្រូវទាក់ទងនឹងផែនការ ដើម្បីប្រកួតវគ្គផ្តាច់ព្រ័ត្រនៅទីក្រុងឡុងដ៍ ដោយសារតែការព្រួយបារម្ភអំពីសុវត្ថិភាពជំងឺនៅទីនោះ។
ចំណែកឯសមាជិកសភាកំពូលរបស់សហភាពអឺរ៉ុបស្តីពីបញ្ហាសុខភាពលោក Peter Liese បានបន្ថែមពីលើការអត្ថាធិប្បាយរបស់លោកស្រីអធិការបតីនិយាយថា៖ «សុខភាពរបស់យើងជាអាទិភាព។ ការរាលដាលនៃវ៉ារ្យ៉ង់ដែលតាអាចធ្វើឱ្យអ្នកទស្សនាចំនួន ៤ ម៉ឺននាក់ ខានមើលការប្រកួតវគ្គផ្ដាច់ព្រ័ត្រនៅពហុកីឡដ្ឋានក្នុងទីក្រុងឡុងដ៍បាន»។
ឆ្លើយតបនឹងការអំពាវនាវរបស់នាយករដ្ឋមន្រ្តីអ៊ីតាលីអ្នកនាំពាក្យ UEFA បាននិយាយប្រាប់ទីភ្នាក់ងារសារព័ត៌មានរ៉យទ័រកាលពីថ្ងៃអង្គារថា UEFA ក៏ដូចជាសមាគមបាល់ទាត់អង់គ្លេស និងអាជ្ញាធរអង់គ្លេសកំពុងធ្វើការយ៉ាងជិតស្និទ្ធជាមួយគ្នាដោយជោគជ័យ ហើយខ្លួនគ្មាន «ផែនការ» ដើម្បីផ្លាស់ប្តូរទីកន្លែងប្រកួតចេញពីពហុកីឡដ្ឋាន Wembley នោះទេ។
សមាគមន៍បាល់ទាត់ UEFA ក៏បានពិភាក្សាជាមួយរដ្ឋាភិបាលអង់គ្លេស ដើម្បីបន្ធូរបន្ថយការរឹតត្បិតការធ្វើដំណើរ ដើម្បីអនុញ្ញាតឱ្យអ្នកចូលរួមទស្សនាលំដាប់វីអាយភីចំនួន ២ ៥០០ នាក់ បានចូលរួមនៅវគ្គផ្តាច់ព្រ័ត្រផងដែរ។
លោក Butler បាននិយាយថា នៅតាមបណ្តាទីក្រុងម្ចាស់ផ្ទះមួយចំនួនករណីជំងឺកូវីដ ១៩ ថ្មីបានកើនឡើងនៅក្នុងតំបន់ដែលការប្រកួតនឹងត្រូវបានធ្វើឡើងហើយ WHO បានអំពាវនាវឱ្យទីក្រុងនានាក្នុងតំបន់ទាំងនោះចាត់វិធានការបន្ទាន់។
អង់គ្លេសបានរាយការណ៍ករណីថ្មីនៃជំងឺកូវីដ ១៩ ជាង ១,១ ម៉ឺននាក់នៅថ្ងៃទី ២២ មិថុនា ដែលចំនួននេះ បង្ហាញថា ការឆ្លងកំពុងតែចាប់ផ្ដើមកើនឡើងវិញ បន្ទាប់ពីស្រាកស្រាន្តមួយរយៈនៅចន្លោះខែមេសា និងឧសភាកន្លងទៅ។ អាជ្ញាធរសុខាភិបាលសាធារណៈនិយាយថា ៩០ ភាគរយនៃករណីថ្មីនេះ ជាចំនួនអ្នកឆ្លងវ៉ារ្យ៉ង់ដែលតា (Delta) ដែលមានសមត្ថភាពចម្លងរហូតដល់៦០ភាគរយជាងវីរុសដើម។
នៅដាណឺម៉ាកមានអ្នកឆ្លងជំងឺកូវីដ ១៩ ចំនួន ២៩ ករណី ត្រូវបានគេរកឃើញថា មានជាប់ទាក់ទងទៅនឹងព្រឹត្តិការណ៍អឺរ៉ូ ២០២០ ដែលបានធ្វើឡើងនៅក្នុងទីក្រុងកូប៉ិនហាក។ នៅប្រទេសនេះចំណុះទស្សនិកជនដែលត្រូវបានអនុញ្ញាត បានកើនឡើងពី ១,៦ ម៉ឺននាក់ដល់ ២,៥ ម៉ឺននាក់។
ចំណែកឯនៅក្រុងប៊ុយដាប៉ែស ប្រទេសហុងគ្រីវិញ ពហុកីឡដ្ឋាន Puskas Arena ដែលអាចដាក់មនុស្សជាង ៦,៨ ម៉ឺននាក់ ត្រូវបានអនុញ្ញាតឱ្យមនុស្សចូលពេញ។ សមាគម បាល់ទាត់ UEFA ក៏បានលុបចោលក្រុងចំនួន ២ គឺក្រុង Dublin និង Bilbao ពីបញ្ជីម្ចាស់ផ្ទះក្នុងការប្រកួតដែរ ព្រោះអនុញ្ញាតឱ្យអ្នកចូលរួមតិចពេក។ ក្រុងSt Petersburg របស់រុស្ស៊ីដែលជាម្ចាស់ផ្ទះម្នាក់ក៏ត្រូវបានរាយការណ៍ផងដែរនូវការកើនឡើងករណីវិជ្ជមានក្នុងប៉ុន្មានថ្ងៃថ្មីៗនេះ។
ទន្ទឹមនឹងនេះករណីឆ្លងថ្មីបានធ្លាក់ចុះនៅក្នុងក្រុង Seville របស់អេស្ប៉ាញនិងក្រុងរ៉ូមហើយអាជ្ញាធរអ៊ីតាលីបាននិយាយថា មិនមានករណីកូវីដ១៩ ត្រូវបានរកឃើញមានការជាប់ទាក់ទងនឹងការប្រកួតនោះទេ។
ទោះបីជាស្ថានភាពនៅទូទាំងទ្វីបអ៊ឺរ៉ុប មានភាពប្រសើរឡើងក្នុងរយៈពេល២ខែកន្លងមកនេះហើយក្ដី ក៏ WHO នៅតែទទូចឱ្យប្រទេសនានាបន្តមានការប្រុងប្រយ័ត្ន។
លោក Hans Kluge ប្រធាននាយកប្រចាំតំបន់របស់អង្គការសុខភាពពិភពលោក WHO ប្រចាំទ្វីបអឺរ៉ុប បានព្រមានកាលពីដើមខែមិថុនាថា៖ «ទោះបីនៅតំបន់យើងបានគ្រាន់បើក៏ពិតមែនប៉ុន្តែមិនមានន័យថា យើងរួចពីគ្រោះថ្នាក់ហើយនោះទេ»។លោកបន្ថែមថា បញ្ហានេះបណ្ដាលមកពីអត្រាទទួលបានវ៉ាក់សាំងនៅទាបនៅឡើយ មិនអាចការពារតំបន់នេះពីការរាលដាលបាន៕
ហួន ឌីណា
