.jpg)
វ៉ាក់សាំងកូវីដ Sinovac។ AFP
ប្រទេសសិង្ហបុរី អនុញ្ញាតឱ្យ ប្រជាជនក្នុងប្រទេសប្រើប្រាស់វ៉ាក់សាំង Sinovac ដែលជាវ៉ាក់សាំងផលិតដោយប្រទេសចិន ប៉ុន្តែចំពោះការទទួលការចាក់វ៉ាក់សាំងប្រភេទនេះគឺមានលក្ខខណ្ឌ។
ប្រជាជនដែលជ្រើសរើសយកការចាក់វ៉ាក់សាំងដែលផលិតដោយប្រទេសចិនត្រូវបង់ថ្លៃរដ្ឋបាលបន្តិចបន្តួចដែលមានតម្លៃចាប់ពី ១០ ទៅ ២៥ ដុល្លារសិង្ហបុរី ហើយនឹងត្រូវដកចេញពីគម្រោងសំណងរបស់ប្រទេសសិង្ហបុរី ប្រសិនបើពួកគេរងផលប៉ះពាល់ធ្ងន់ធ្ងរឬស្លាប់ក្រោយចាក់វ៉ាក់សាំង។
គួរបញ្ជាក់ផងដែរថា ប្រទេសសិង្ហបុរីបច្ចុប្បន្នដាក់ឱ្យ ប្រើប្រាស់នូវវ៉ាក់សាំងការពារកូវីដ ១៩ មួយចំនួនដូចជា Moderna និង Pzfier ដែលជាវ៉ាក់សាំងផលិតដោយសហរដ្ឋអាមេរិក។
វ៉ាក់សាំងការពារកូវីដ ១៩ ប្រភេទ Sinovac ហាក់ដូចជាមានប្រជាប្រិយភាពចំណោមប្រជាជនចិន និងប្រជាជនសិង្ហបុរីមួយចំនួននៅក្នុងប្រទេសសិង្ហបុរី ទោះបីជាវ៉ាក់សាំងប្រភេទនេះត្រូវបានអ្នកជំនាញមួយចំនួនបារម្ភពីប្រសិទ្ធភាពក៏ដោយ។
យោងតាមការស្រង់សម្តីរបស់សារព័ត៌មាន South China Morning Post លោក Leong Hoe Nam អ្នកជំនាញផ្នែកជំងឺឆ្លងនៃគ្លីនិក Rophi បាននិយាយថា បន្ទាប់ពីមានការប្រកាសដាក់ឱ្យ ប្រើប្រាស់វ៉ាក់សាំងប្រភេទ Sinovac កាលពីសប្តាហ៍មុន គ្លីនិកទទួលបានការទំនាក់ទំនងស្តីពីព័ត៌មានចាក់វ៉ាក់សាំងនេះជាច្រើន។
គ្លីនិករបស់លោកត្រូវបានផ្តល់សិទ្ធិឱ្យផ្តល់ឱ្យនូវការចាក់វ៉ាក់សាំង ហើយអាចចែកចាយវ៉ាក់សាំងចំនួន ២០០ ដូស ប៉ុន្តែប្រជាពលរដ្ឋជាង ១ ០០០ នាក់ កំពុងស្ថិតនៅក្នុងបញ្ជីរង់ចាំទទួលការចាក់វ៉ាក់សាំងនៅឡើយ។
លោក Leong Hoe Nam អ្នកជំនាញផ្នែកជំងឺឆ្លងនៃគ្លីនិក Rophi បាននិយាយថា វ៉ាក់សាំងដែលផលិតនៅប្រទេសចិន គឺប្រើប្រាស់បច្ចេកវិទ្យាបុរាណដោយប្រើប្រាស់វីរុសអសកម្មដើម្បីឆ្លើយតបទៅនឹងវីរុស។
ក្រសួងសុខាភិបាលបានប្រកាសនៅដើមខែមិថុនានេះ ពីការអនុញ្ញាតស្ថាប័នថែទាំសុខភាពឯកជនអាចចែកចាយវ៉ាក់សាំង Sinovac នេះហើយវាមិនមាននៅក្នុងយុទ្ធនាការចែកចាយវ៉ាក់សាំងរបស់ប្រទេសសិង្ហបុរីឡើយ។
ទោះជាយ៉ាងណាក៏ដោយ វ៉ាក់សាំងដែលផ្ទុកវីរុសប្រភេទ mRNA មិនសមស្របសម្រាប់មនុស្សដែលមានប្រវត្តិប្រតិកម្មធ្ងន់ធ្ងរដូចជាប្រតិកម្មអាណាហ្វីឡាក់ទិច និងចំពោះអ្នកដែលមានប្រព័ន្ធការពាររាងកាយខ្សោយនោះទេ។
អង្គការសុខភាពពិភពលោកបានណែនាំវ៉ាក់សាំងប្រភេទនេះសម្រាប់មនុស្សពេញវ័យដែលមានអាយុចាប់ពី ១៨ ឆ្នាំឡើងទៅ ដោយប្រើប្រាស់ចំនួន ២ ដូស ក្នុងរយៈពេល ២ ទៅ ៤ សប្តាហ៍រវាងដូសនីមួយៗ។
តាមសេចក្តីថ្លែងការណ៍ទីភ្នាក់ងារពិភពលោក លទ្ធផលនៃការចាក់វ៉ាក់សាំងប្រភេនេះ បានបង្ហាញថា វ៉ាក់សាំងនេះអាចការពារជំងឺនេះពីការឆ្លងក្នុងអត្រា ៥១ ភាគរយក្នុង ១០០ ភាគរយនៃប្រជាពលរដ្ឋដែលត្រូវបានគេសិក្សានិងស្ទង់មតិ៕
