មន្ត្រីក្រសួងការបរទេសអាមេរិក ១ រូប បាននិយាយនៅថ្ងៃពុធថា អាមេរិក និងចិន មិនបានរៀបចំកិច្ចចរចារវាងរដ្ឋមន្រ្តីក្រសួងការបរទេសអាមេរិក លោក Antony Blinken និងរដ្ឋមន្រ្តីការបរទេសចិន លោក Wang Yi នៅក្នុងកិច្ចប្រជុំកំពូល G20 នៅប្រទេសអ៊ីតាលីនា សប្តាហ៍នេះទេ។
ការប្រកាសបែបនេះ ធ្វើឡើងក្រោយពេលកាសែត Financial Times រាយការណ៍ថា ទីក្រុងប៉េកាំង និងទីក្រុងវ៉ាស៊ីនតោន គ្រោងនឹងបើកកិច្ចពិភាក្សានេះ។ ប្រភពដដែល បានដកស្រង់សម្ដីសង្ខេបចេញពីកិច្ចពិភាក្សានេះថា រដ្ឋបាលរបស់ប្រធានាធិបតីអាមេរិក លោក Joe Biden បានជូនដំណឹងដល់សមភាគីនៅក្នុងទីក្រុងប៉េកាំងថា អាមេរិកចង់ឱ្យលោកស្រី Wendy Sherman អនុរដ្ឋលេខាធិការអាមេរិក ចុះមកបំពេញទស្សនកិច្ចនៅប្រទេសចិន នៅរដូវក្តៅឆ្នាំនេះ។
ប្រភពដដែល បានឱ្យដឹងទៀតថា សេតវិមាន The White House ក៏បានធ្វើកិច្ចពិភាក្សាផ្ទៃក្នុងបឋមមួយ ស្ដីអំពីការបញ្ជូនទីប្រឹក្សាសន្តិសុខជាតិ លោក Blinken ឬ Jake Sullivan ទៅកាន់ប្រទេសចិននៅចុងឆ្នាំនេះ ដែលជាដំណាក់កាលមួយក្នុងកិច្ចពិភាក្សាទ្វេភាគីរវាងលោក Biden និងមេដឹកនាំចិនលោក Xi Jinping ក្នុងកិច្ចប្រជុំកំពូល G20 នៅទីក្រុង Rome នៅខែតុលា ខាងមុខនេះ។
ជាការឆ្លើយតប មន្ត្រីក្រសួងការបរទេស បានបដិសេធនូវសេចក្ដីខាងលើ តែមិនបានបញ្ជាក់ពីសេចក្ដីលម្អិតបន្ថែមឡើយ។ ដោយឡែក អ្នកនាំពាក្យក្រសួងការបរទេសចិន លោក Zhao Lijian ក៏បានបញ្ជាក់ថា ខាងភាគីចិនក៏មិនទាន់មានព័ត៌មានអ្វី ផ្តល់ជូនអ្នកសារព័ត៌មានពេលបច្ចុប្បន្នដែរ។
គួរបញ្ជាក់ផងដែរថា ភាគីទាំង ២ មិនបានជួបគ្នា ចាប់តាំងពីពួកគេនិងក្រុមមន្រ្តីផ្សេងទៀត បានចូលរួមក្នុងការផ្លាស់ប្តូរមតិយោបល់គ្នាយ៉ាងក្តៅគគុកនៅរដ្ឋ Alaska ក្នុងអំឡុងពេលកិច្ចប្រជុំជាន់ខ្ពស់របស់ រដ្ឋបាលលោក Biden ជាមួយនឹងសមភាគីចិនកាលពីខែមីនា កន្លងទៅ។
គួររំឭកផងដែរថា លោក Blinken ក៏ធ្លាប់បានធ្វើការអំពាវនាវឱ្យអ្នកការទូតកំពូលរបស់ប្រទេសចិន លោក Yang Jiechi កាលពីដើមខែ និងបានសង្កត់ធ្ងន់លើភាពចាំបាច់នៃកិច្ចសហប្រតិបត្តិការ និងតម្លាភាពលើការស៊ើបអង្កេតលើដើមកំណើតនៃជំងឺកូវីដ ១៩ ក៏ដូចជាបញ្ហាចម្រូងចម្រាសនានារួមមាន បញ្ហារំលោភសិទ្ធិមនុស្ស ចំពោះពលរដ្ឋមូស្លីមអ៊ុយហ្គ័រ ពលរដ្ឋហុងកុង និងតៃវ៉ាន់ជាដើម៕