.jpg)
យោងតាមមជ្ឈមណ្ឌលការពារ និងគ្រប់គ្រងជំងឺអឺរ៉ុប (ECDC) បានឱ្យដឹងថា នៅដំណាច់ខែសីហា វ៉ារ្យ៉ង់Delta ថ្មី ត្រូវបានគេរំពឹងថា នឹងមានចំនួនដល់ ៩០ ភាគរយ នៃករណីឆ្លងកូវីដសរុបនៅក្នុងសហគមន៍អឺរ៉ុប។
នេះបើតាមឱ្យដឹងពីការព្យាករពីទីភ្នាក់ងារសុខាភិបាលកាលពីថ្ងៃពុធ កន្លងទៅ។ អង្គការសុខភាពពិភពលោក (WHO) បានចេញសេចក្តីថ្លែងការណ៍ស្រដៀងគ្នានេះ កាលពីសប្តាហ៍មុន ដែលថា វ៉ារ្យ៉ង់មកពីឥណ្ឌា ឬ វ៉ារ្យ៉ង់ Delta ថ្មី បាននិងកំពុងលេចរីករាលដាលនៅទូទាំងពិភពលោក។
ជាមួយគ្នានេះដែរ មជ្ឈមណ្ឌល ECDC ក៏បានប៉ាន់ប្រមាណថា វ៉ារ្យ៉ង់ Delta ថ្មី (B.1.617.2) មានសមត្ថភាពចម្លងចន្លោះពី ៤០ ទៅ ៦០ ភាគរយ ជាងវ៉ារ្យង់ អាល់ហ្វា (B.1.1.7) ដែលបានរកឃើញដំបូងបង្អស់នៅចក្រភពអង់គ្លេស ដែលជាវ៉ារ្យ៉ង់លេចធ្លោជាងគេនៅក្នុងប្លុកនេះ។
ដោយសារតែសមត្ថភាពចម្លងរបស់វ៉ារ្យ៉ង់ Delta ថ្មី មានលក្ខណៈខ្លាំងក្លាជាងវ៉ារ្យ៉ង់ដទៃ វ៉ារ៉្យង់នេះ បានក្លាយជាក្តីកង្វល់មួយដល់រដ្ឋាភិបាលជាច្រើននៅទូទាំងទ្វីបអឺរ៉ុប បើទោះបីជាប្រទេសភាគច្រើន កំពុងចាប់ផ្ដើមបន្ធូរបន្ថយការរឹតត្បិតជាបណ្ដើរៗ ដោយសារចំនួនករណីថ្មីធ្លាក់ចុះជាបន្តបន្ទាប់។
មជ្ឈមណ្ឌល ECDC បានបន្ថែមថា៖ «វ៉ារ្យ៉ង់ Delta ថ្មីនឹងសាយភាយយ៉ាងច្រើនក្នុងរដូវក្តៅ ជាពិសេសក្នុងចំណោមយុវវ័យដែលមិនមាននៅក្នុងគោលដៅនៃការចាក់វ៉ាក់សាំង។ នេះអាចបណ្តាលឱ្យមានហានិភ័យខ្ពស់ដល់អ្នកងាយរងគ្រោះ ដែលធ្លាប់ឆ្លងជំងឺកូវីដធ្ងន់ធ្ងរ ឬអាចបណ្ដាលឱ្យស្លាប់ ប្រសិនបើពួកគេមិនបានទទួលយកវ៉ាក់សាំងពេញលេញ»។
មជ្ឈមណ្ឌលការពារ និងគ្រប់គ្រងជំងឺអឺរ៉ុប ECDC បានបញ្ជាក់ថា៖ «នេះ គឺជាដំណាក់កាលសំខាន់ខ្លាំងណាស់ ក្នុងការពន្លឿនល្បឿននៃការចាក់វ៉ាក់សាំងក្នុងល្បឿនខ្ពស់បំផុត ដើម្បីបញ្ឈប់ការរីករាលដាល និងកាត់បន្ថយផលប៉ះពាល់ដល់សុខភាពធ្ងន់ធ្ងរ»។
ប្រភពដដែលបានឱ្យដឹងថា រហូតមកដល់បច្ចុប្បន្នប្រមាណជា ៣០ ភាគរយនៃចំនួនប្រជាជនអាយុចាប់ពី ៨០ ឆ្នាំឡើងទៅ និងប្រមាណ ៤០ ភាគរយនៃប្រជាជនអាយុចាប់ពី ៦០ ឆ្នាំឡើងទៅ នៅសហភាពអឺរ៉ុបនៅតែមិនទាន់បានចាក់វ៉ាក់សាំងពេញលេញដូចទិន្នន័យរបស់មជ្ឈមណ្ឌល ECDC៕
