ទីក្រុងក្វាងចូវ (Guangzhou) ប្រទេសចិន គ្រោងនឹងសាងសង់មជ្ឈមណ្ឌលសម្រាប់ភ្ញៀវទេសចរអន្តរជាតិ និងប្រជាជនក្នុងតំបន់ធ្វើចត្តាឡីស័ក ដែលធ្វើដំណើរមកពីតំបន់ហានិភ័យខ្ពស់ក្នុងការចម្លងកូវីដ ១៩។ ការបង្កើតមជ្ឈមណ្ឌលធ្វើចត្តាឡីស័កនេះគឺដោយសារសណ្ឋាគារក្នុងស្រុកមិនអាចទប់ទល់នឹងការរីករាលដាលករណីកូវីដ ១៩ ដូចជាវារ្យ៉ង់បំប្លែងថ្មីប្រភេទ Delta ជាដើម។
យោងតាមការស្រង់សម្តីរបស់សារព័ត៌មាន South China Morning Postអ្នកជំនាញខាងជំងឺផ្លូវដង្ហើម លោក Zhong Nanshan បាននិយាយនៅក្នុងបទសម្ភាសកាលពីថ្ងៃទី ២៥ មិថុនាថា បន្ទាប់ពីបានសង្កេតឃើញពីករណីមេរោគកូវីដ ១៩ ប្រភេទបំប្លែងថ្មី Delta នៅខេត្តក្វាងទុងក្នុងអំឡុងពេល ១ ខែកន្លងមកនេះ លោកជឿជាក់ថា ការប្រើប្រាស់សណ្ឋាគារជាកន្លែងដាក់ដាច់ដោយឡែកនឹងមិនគ្រប់គ្រាន់បញ្ឈប់ការរីករាលដាលនៃជំងឺនេះទេ។ លោកបន្ថែមថា ព្រោះមេរោគប្រភេទនេះអាចងាយចម្លងជាងមុនការបំប្លែងមេរោគនេះក៏មានន័យថា នាពេលអនាគតក៏អាចមានមេរោគបំប្លែងថ្មីផងដែរ។
លោក Zhong បាននិយាយថា៖ «ក្នុងរយៈពេលវែងមួយក្វាងចូវនិងហ្សិនជិនត្រូវតែសាងសង់និងបំពាក់នូវគ្រឿងបរិក្ខារនានា។ បើមិនដូច្នោះទេនៅពេលដែលមានករណីជាច្រើននាពេលអនាគតហើយយើងត្រូវដាក់ពួកគេនៅតាមសណ្ឋាគារវានឹងប៉ះពាល់ដល់សេដ្ឋកិច្ច។លោក Zhong បានិយាយថា ទីតាំងដែលសាងសង់មជ្ឈមណ្ឌលនោះមានផ្ទៃដីប្រមាណ ២៥ ហិកតា ដែលមានទំហំប៉ុនទីលានបាល់ទាត់ចំនួន ៤៦ ដង»។
ប្រទេសចិនបានចាត់តាំងខេត្តក្វាងចូវ ជាតំបន់ដើម្បីទទួលនិងដាក់ឱ្យ អ្នកទេសចរអន្តរជាតិធ្វើចត្តាឡីស័កមុនពេលពួកគេធ្វើដំណើរទៅកាន់តំបន់ផ្សេងទៀតក្នុងប្រទេសចិន។ ភ្ញៀវទេសចរអន្តរជាតិប្រមាណពី ៨០ ទៅ ៩០ ភាគរយចូលមកប្រទេសនេះតាមរយៈខេត្តភាគខាងត្បូង។
ខេត្តក្វាងចូង ក៏ត្រូវបានស្នើឱ្យជាកន្លែងដែលចូលរួមការពារពីការរាលដាលដល់ខេត្តដទៃទៀតក្នុងពេលមានការផ្ទុះឡើងថ្មីៗនេះដោយកាត់បន្ថយចំនួនអ្នកធ្វើដំណើរក្នុងតំបន់។ ប្រជាជនដែលធ្វើដំណើរមកពីទីក្រុងជាច្រើនក្នុងខេត្តក្វាងចូវត្រូវបានស្នើសុំឱ្យ ធ្វើតេស្តរកកូវីដ ១៩ មុនពេលអនុញ្ញាតឱ្យចាកចេញទីតំបន់ផ្សេងទៀត។
ចាប់តាំងពីថ្ងៃទី ២១ ខែឧសភា តំបន់ក្វាងចូវនិងហ្សិជិនមានករណីកូវីដ ១៩ ប្រភេទបំប្លែងថ្មីសរុបចំនួន ១៦៧ ករណី ហើយតំបន់ហ្សិនជិនមានឆ្លងចំនួន ៧ ករណី គិតត្រឹមសប្តាហ៍មុន៕