.jpg)
ក្រុមអ្នកជួយសង្គ្រោះស្វែងរកអ្នកនៅរស់ក្នុងបំណែកអគារស្រុតបាក់ក្នុងទីក្រុងម៉ៃអាមី រដ្ឋហ្វ្លរីដា។ AFP
អគារលំនៅឋានមួយដួលរលំនៅក្រុងម៉ៃអាមី រដ្ឋហ្វ្លរីដា សហរដ្ឋអាមេរិកបង្កឱ្យ មានអ្នកស្លាប់ចំនួន ៩ នាក់ ខណៈការស្រាវជ្រាងរកជនរងគ្រោះនៅតែបន្ត។
កាលពីសប្តាហ៍មុន អគារស្នាក់នៅមួយនៅរដ្ឋ ហ្វ្លរីដាបានដួលរលំហើយបង្កឱ្យ គ្រួសារដែលស្នាក់នៅក្នុងអគារនោះស្លាប់ ហើយមនុស្សមួយចំនួនទៀតរកពុំទាន់ឃើញ។ចំនួនអ្នកស្លាប់បានកើនឡើងដល់ ៩ នាក់ដែលធ្វើឱ្យ សាច់ញាតិរបស់សាកសពអស់សង្ឃឹមចំពោះដំណឹង និងព្រួយបារម្ភដោយការស្វែងរកនេះមានភាពយឺតយ៉ាវ។
លោក Earl Tilton ម្ចាស់ក្រុមហ៊ុនពិគ្រោះយោបល់សេវាកម្មជួយសង្គ្រោះជីវិតនៅរដ្ឋ North Carolina បាននិយាយថា ក្រុមអ្នកជួយសង្គ្រោះនៅតំបន់ Miami-Dade កំពុងបំពេញការងារបានយ៉ាងល្អ។ លោក Tilton បាននិយាយថា ការប្រញាប់ប្រញាល់ចូលទៅក្នុងគំនរអគារដោយមិនមានផែនការ និងការប្រតិបត្តិដោយប្រុងប្រយ័ត្ននឹងអាចបណ្តាលឱ្យ មានគ្រោះថ្នាក់ដល់អ្នកជួយសង្គ្រោះ និងមនុស្សដែលពួកគេកំពុងព្យាយាមជួយសង្គ្រោះ។
តាមការស្រង់សម្តីរបស់សារព័ត៌មានសិង្ហបុរី CNA លោក Tilton បាននិយាយថា៖ «ខ្ញុំយល់ពីកង្វល់របស់ក្រុមគ្រួសារចំពោះបញ្ហានេះ។ ប្រសិនបើអ្នកដែលនៅក្នុងអគារនោះជាសមាជិកគ្រួសារខ្ញុំ ខ្ញុំចង់ឱ្យអ្នករាល់គ្នានៅទីនោះទាញកម្ទេចថ្មឱ្យ លឿនបំផុតតាមដែលអាចធ្វើទៅបាន។ ប៉ុន្តែការផ្លាស់ប្តូរបំណែកកម្ទេចកម្ទីដោយមិនពិចារណាអាចបណ្តាលឱ្យថ្មទាំងនោះធ្លាក់ទៅលើពួកគេ» ។
របាយការណ៍របស់វិស្វករសំណង់បានបង្ហាញពីការព្រួយបារម្ភអំពីការខូចខាតរចនាសម្ព័ន្ធចំពោះការចាក់បេតុងនៅខាងក្រោមអាងហែលទឹករបស់អាគារនោះ និងស្នាមប្រេះនៅកន្លែងចតរថយន្ត។ ការការពារទឹកជ្រាបនៅខាងក្រោមអាងទឹកមិនបានល្អបានបណ្តាលឱ្យខូចខាតរចនាសម្ព័ន្ធសំខាន់ៗ។
តែទោះជាយ៉ាងណារបាយការណ៍នេះមិនបានបញ្ជាក់ថា តើរចនាសម្ព័ន្ធនោះស្ថិតក្នុងហានិភ័យនៃការដួលរលំ ឬយ៉ាងណានោះទេ។ តាមការរាយការណ៍របស់សារព័ត៌មាន CNN ថា របាយការណ៍ Morabito បានបង្ហាញថា ពួកគេបានផ្តល់ការប៉ាន់ប្រមាណអំពីការចំណាយទៅសមាគមអគារស្នាក់នៅក្នុងការជួសជុលឱ្យបានទូលំទូលាយ និងចាំបាច់ហើយធានាសុវត្ថិភាពដល់ប្រជាជន និងសាធារណជនទូទៅ។
គួរបញ្ជាក់ផងដែរថា កាលពីខែវិច្ឆិកាឆ្នាំ ២០១៨ មន្ត្រីសាងសង់ទីក្រុងម្នាក់បានប្រាប់ប្រជាជនថា អគារនោះស្ថិតក្នុងសភាពល្អបន្ទាប់ពីទទួលបានរបាយការណ៍ដែលបានព្រមានអំពីការខូចខាតរចនាសម្ព័ន្ធសំខាន់ៗដែលជាកត្តាអាចបណ្តាលឱ្យ មានការបាក់រលំ៕
