.jpg)
បុគ្គលិកថៃចាក់វ៉ាក់សាំងកូវីដ ១៩ AstraZeneca ឱ្យប្រជាជនមានវ័យចំណាស់ខេត្តភូកេតកាលពីថ្ងៃទី ២៩ មិថុនា។ AFP
ការសិក្សាមួយដោយសាកលវិទ្យាល័យ Oxford បានរកឃើញថា ការចាក់វ៉ាក់សាំងលាយបញ្ចូលគ្នារវាងវ៉ាក់សាំងដែលផលិតដោយក្រុមហ៊ុន Pfizer-BioNTech និងវ៉ាក់សាំង AstraZeneca ផលិតដោយសាកលវិទ្យាល័យ Oxford អាចបង្កើននូវប្រព័ន្ធភាពស៊ាំខ្លាំងប្រឆាំងនឹងវីរុសកូវីដ ១៩។
ក្រុមអ្នកស្រាវជ្រាវដែលកំពុងសិក្សាលើការស្រាវជ្រាវមួយហៅថា Com-COV ស្ដីអំពីការពិនិត្យមើលលើលទ្ធភាពនៃការប្រើវ៉ាក់សាំងផ្សេងគ្នាសម្រាប់ការចាក់វ៉ាក់សាំងលើកទី១ ឬ «បឋម» និងការចាក់លើកទី២ ឬ «បង្កើន» ដើម្បីបង្កើតបាននូវភាពស៊ាំខ្លាំងប្រឆាំងនឹងវីរុសកូវីដ ១៩។
ទោះយ៉ាងណាក្ដី ការសិក្សានេះបានរកឃើញថា ការឆ្លើយតបនៃប្រព័ន្ធភាពស៊ាំរបស់វ៉ាក់សាំងមានលក្ខណៈខុសគ្នាទៅតាមលំដាប់នៃការចាក់វ៉ាក់សាំង ពោលគឺការចាក់វ៉ាក់សាំង Oxford-AstraZeneca លើកទី១ ហើយចាក់វ៉ាក់សាំង Pfizer-BioNTech ជាលើកទី២ វានឹងមានប្រសិទ្ធភាពល្អប្រសើរជាងលំដាប់មួយទៀត។
គម្លាតនៃការចាក់ដូសនីមួយៗ ត្រូវបានកំណត់ជារយៈពេលចំនួន ៤ សប្តាហ៍ ហើយទិន្នន័យស្ដីអំពីគម្លាត ១២ សប្តាហ៍ នឹងបង្ហាញឆាប់ៗនេះ។ នេះបើតាមឱ្យដឹងពី ក្រុមអ្នកស្រាវជ្រាវក្រោយមានរបាយការណ៍នៃការសិក្សាបានចេញផ្សាយកាលពីថ្ងៃចន្ទ។
ប្រភពដដែលបានឱ្យដឹងថា៖ «ការលាយវ៉ាក់សាំងទាំង ២ (តាមលំដាប់ Pfizer-BioNTech មុនរួចហើយ Oxford-AstraZeneca ក្រោយ និងលំដាប់ Oxford-AstraZeneca មុនហើយ Pfizer-BioNTech ក្រោយ) ជាការបង្កើនអង្គបដិបក្ខប្រាណខ្ពស់ប្រឆាំងនឹងប្រូតេអ៊ីន SARS-CoV2 ដូចគ្នានឹងប្រូតេអ៊ីន IgG ក្រោយពេលវ៉ាក់សាំងទាំង ២ ដូស ត្រូវបានគេចាក់ក្នុងគម្លាត ៤ សប្ដាហ៍»។
ប្រភពដដែលបានបន្តថា៖ «នេះមានន័យថា រាល់កាលវិភាគចែកចាយវ៉ាក់សាំងណាដែលរួមមាននឹងការចាក់វ៉ាក់សាំង Oxford-AstraZeneca និងវ៉ាក់សាំង Pfizer-BioNTech អាចនឹងត្រូវប្រើប្រាស់ដើម្បីប្រឆាំងនឹងជំងឺកូវីដ ១៩ ទៅតាមកាលវិភាគដែលបានកំណត់»។
លោក Matthew Snape សាស្រ្តាចារ្យនៃសាកលវិទ្យាល័យ Oxford បានឱ្យដឹងថា ការស្រាវជ្រាវនេះ នឹងត្រូវប្រើប្រាស់ ដើម្បីជួយសម្រួលដល់ដំណើរការនៃការចែកចាយវ៉ាក់សាំង ប៉ុន្តែមិនមានទំហំធំគ្រប់គ្រាន់ ដែលអាចផ្លាស់ប្តូរកាលវិភាគ ដែលត្រូវបានអនុម័តដោយរដ្ឋាភិបាលហើយនោះទេ។
ក្រុមអ្នកស្រាវជ្រាវបានធ្វើកំណត់សម្គាល់ឃើញថា ការលាយវ៉ាក់សាំងទាំង ២ នេះ បញ្ចូលគ្នាអាចបង្កើនសមត្ថភាពអង្គបដិបក្ខប្រាណខ្ពស់ជាងសមត្ថភាពរបស់វ៉ាក់សាំង Oxford-AstraZeneca ចំនួន ២ ដូសទៅទៀត។
បច្ចុប្បន្ននេះ វ៉ាក់សាំង AstraZeneca ត្រូវបានគេណែនាំឱ្យចាក់ក្នុងចន្លោះរយៈពេលពី ៨ ទៅ ១២ សប្តាហ៍ រវាងដូសទាំង ២។ ការសាកល្បងមុនៗ បានរកឃើញថា គម្លាតកាន់តែយូរប្រសិទ្ធភាពវ៉ាក់សាំង AstraZeneca-Oxford នឹងកាន់តែមានប្រសិទ្ធភាពពោល គឺអាចកើនដល់ ៨២,៤ ភាគរយ ក្នុងការប្រឆាំងនឹងរោគសញ្ញានៃជំងឺកូវីដ ១៩។
សាស្រ្តាចារ្យផ្នែកវេជ្ជសាស្ត្រអង់គ្លេសលោក Jonathan Van-Tam ក៏បានឱ្យដឹងដែរថា មិនមានហេតុផលណាមួយដែលថា ការចាក់វ៉ាក់សាំងលាយគ្នានេះអាចនឹងប្ដូរកាលវិភាគនៃការចាក់វ៉ាក់សាំង ឬធ្វើឱ្យវាទទួលបានជោគជ័យដូចគ្នា នឹងចក្រភពអង់គ្លេសនាពេលបច្ចុប្បន្ននេះទេ។
លោកបានបន្តថា៖ « ទោះជាយ៉ាងណាក្ដី ការសិក្សានេះ គឺជាអ្វីដែលគេគួរសម្លឹងមើលនាពេលអនាគត។ ការលាយវ៉ាក់សាំងបញ្ចូលគ្នានេះ អាចផ្តល់ឱ្យយើងសម្របខ្លួន និងសម្រួលដំណើរការនៃការចែកវ៉ាក់សាំង ខណៈពេលដែលប្រទេសនានា កំពុងខិតខំការចែកចាយវ៉ាក់សាំងកំពុងជួបប្រទះនឹងការលំបាកនៃការផ្គត់ផ្គង់វ៉ាក់សាំង»។
បច្ចុប្បន្ន ប្រទេសខ្លះកំពុងប្រើវ៉ាក់សាំងលាយគ្នាផងដែររួមមាន ប្រទេសអេស្ប៉ាញ និងអាល្លឺម៉ង់ ដែលកំពុងចាក់វ៉ាក់សាំង Pfizer ឬ Moderna mRNA ជាវ៉ាក់សាំងទី២ ដោយប្រើប្រាស់វ៉ាក់សាំង AstraZeneca ជាវ៉ាក់សាំងទី១ បើទោះជាមានការព្រួយបារម្ភអំពីករណីឈាមកម្រកកក៏ដោយ ប៉ុន្តែប្រសិទ្ធភាពរបស់វ៉ាក់សាំងមានប្រសិទ្ធភាពខ្ពស់គួរឱ្យកត់សម្គាល់។
ការលាយវ៉ាក់សាំងនេះ បច្ចុប្បន្នកំពុងត្រូវបានអនុញ្ញាតឱ្យប្រើប្រាស់នៅសហរដ្ឋអាមេរិក និងចក្រភពអង់គ្លេសក្នុងការជំរុញឱ្យប្រព័ន្ធភាពស៊ាំរបស់យើងឱ្យបង្កើតអង្គបដិបក្ខប្រាណ ដើម្បីការពារយើងពីវីរុស។
ជាមួយគ្នានេះ កម្មវិធីចាក់វ៉ាក់សាំងរបស់ចក្រភពអង់គ្លេស កំពុងត្រូវបានគេសាទរពាសពេញពិភពលោកដោយសារល្បឿននៃការចែកចាយវ៉ាក់សាំងរបស់ខ្លួន ដោយមកដល់បច្ចុប្បន្នប្រជាជនប្រមាណ ៨៤,១ ភាគរយ នៅចក្រភពអង់គ្លេសសុទ្ធតែទទួលបានវ៉ាក់សាំងដូសទី១ ហើយ ខណៈប្រជាជន ៦១,៦ ភាគរយ បានទទួលវ៉ាក់សាំងទាំង ២ ដូសហើយ៕
