បន្ទាប់ពីបានរកឃើញសាកសពក្មេងៗជនជាតិដើមភាគតិចរាប់រយនាក់នៅក្នុងរណ្តៅនៅលើអតីតបរិវេណសាលា ក្រុមជនជាតិដើមភាគតិចបានអំពាវនាវឱ្យ លុបចោលថ្ងៃទិវាជាតិកាណាដា។
កាលពីសប្តាហ៍មុន ផ្នូរកប់ខ្មោចចំនួន ៧៥០ ត្រូវបានរកឃើញនៅលើផ្ទៃដីដែលជាអតីតសាលាសម្រាប់ជនជាតិដើមភាគតិចដែលឧបត្ថម្ភដោយរដ្ឋាភិបាលនៅប្រទេសកាណាដា។ ការរកឃើញនេះ ត្រូវបានធ្វើឡើងក្នុងរយៈពេលប៉ុន្មានថ្ងៃ បន្ទាប់ពីមេដឹកនាំជនជាតិដើមភាគតិចបានចាប់ផ្តើមស្រាវជ្រាវរកនៅឯសាលារៀននៅថ្ងៃទី ១ ខែមិថុនានេះ។
ប្រធានសហព័ន្ធប្រជាជាតិជនជាតិដើមភាគតិចសហព័ន្ធលោក Bobby Cameron បាននិយាយនៅក្នុងសន្និសីទកាសែត កាលពីសប្តាហ៍មុននេះថាវាគឺជាបទប្រឆាំងមនុស្សជាតិ។ លោកបាននិយាយថា៖ «យើងជាមនុស្សដែលមានមោទនភាពហើយបទល្មើសដែលយើងប្រព្រឹត្តតែមួយគត់គឺកើតមកជាជនជាតិដើមភាគតិច»។
ផ្នូរទាំងនោះត្រូវបានរកឃើញនៅអតីតសាលារៀនដែលកុមារជនជាតិដើមភាគតិចទទួលរងអំពើ ហិង្សាលើរាងកាយផ្លូវភេទការបំផ្លាញផ្លូវចិត្តភាពស្រេក ឃ្លាននិងការរំលោភបំពានផ្សេងៗទៀត។
នៅក្នុងរយៈពេលប៉ុន្មានថ្ងៃមុនឈានដល់ទិវាបុណ្យជាតិកាណាដាមេដឹកនាំសហគមន៍ និងអ្នកតស៊ូមតិជនជាតិដើមភាគតិចបានជំរុញឱ្យប្រជាជនកាណាដាលុបចោលការប្រារព្ធពិធីណាមួយ។ ផ្ទុយទៅវិញពួកគេកំពុងស្នើសុំឱ្យថ្ងៃនោះក្លាយជាថ្ងៃមួយដើម្បីឆ្លុះបញ្ចាំងពីប្រវត្តិពិតរបស់កាណាដានិងគាំទ្រដល់ជនជាតិដើម។
សមាជិកក្រុមប្រឹក្សា Oshkaatisak លោក Mallory Solomon បាននិយាយនៅក្នុងសេចក្តីថ្លែងការណ៍មួយកាលពីថ្ងៃទី ២៩ មិថុនាថា៖ «ក្នុងនាមជាជនជាតិដើមភាគតិច យើងត្រូវតែឈរ ហើយស្រែកវាទៅកាន់ប្រទេសកាណាដា។ ទីបំផុតប្រវត្តិសាស្ត្រពិតរបស់ប្រទេសនេះត្រូវបានបង្ហាញហើយវាដល់ពេលដែលត្រូវរួមគ្នា និងទាមទារយុត្តិធម៌និងគណនេយ្យភាព។»
ទីក្រុងកាណាដាជាច្រើនបានលុបចោលពិធីអបអរសាទរទិវាបុណ្យជាតិកាណាដារបស់ពួកគេ ដើម្បីឆ្លើយតបទៅនឹងការរកឃើញផ្នូរសាកសពកុមារជនជាតិដើមចំនួន ២១៥ នាក់ នៅឯសាលា Kamloops Indian Residential School ក្នុងតំបន់ British Columbia (BC) និងកន្លែងបញ្ចុះសពដែលមិនមានស្លាកសម្គាល់ចំនួន ៧៥១ នាក់នៅឯសាលា Marieval Indian Residential នៅតំបន់ Saskatchewan។
នាយករដ្ឋមន្រ្តីកាណាដា លោក Justin Trudeau បាននិយាយកាលពីសប្តាហ៍មុនថាទិវាជាតិកាណាដាជាពេលវេលាសម្រាប់ជនជាតិកាណាដាឆ្លុះបញ្ចាំងពីការផ្សះផ្សាទំនាក់ទំនងជាមួយជនជាតិដើមភាគតិចនិងរបៀបដែលវាបានវិឌ្ឍ និងរបៀបដែលវាត្រូវការ ដើម្បីបន្តវិវឌ្ឍយ៉ាងឆាប់រហ័ស។
អំពាវនាវឱ្យលុបចោលទិវាជាតិកាណាដានេះ មិនមែនសុទ្ធតែអ្នករាល់គ្នាយល់ស្របនឹងការអំពាវនាវនេះទេដូចជាមេដឹកនាំគណបក្សអភិរក្សសហព័ន្ធ លោក Erin O’Toole ដែលលោកបាននិយាយថា លោកមានការព្រួយបារម្ភថាភាពអយុត្តិធម៌ក្នុងពេលអតីតកាលឬក្នុងពេលបច្ចុប្បន្ននេះ ត្រូវបានក្រុមសកម្មជនមួយក្រុមតូចប្រមូលផ្តុំគ្នាដោយប្រើវា ដើម្បីវាយប្រហារគំនិតរបស់ប្រទេសកាណាដា៕