វ៉ារ៉្យង់ Delta ថ្មី បានឆ្លងរីករាលដាលរាប់ចាប់តាំងពីអូស្រ្តាលីរហូតដល់ហុងកុង ដែលសុទ្ធតែជាប្រទេស ដែលមានផលប៉ះពាល់ផ្នែកសេដ្ឋកិច្ច ដោយសារកូវីដទាប និងមានអត្រាចាក់វ៉ាក់សាំងរួចទាបដូចគ្នា។ វ៉ារ៉្យង់ Delta ថ្មី កំពុងសាយភាយដល់ប្រទេសយ៉ាងហោចណាស់ចំនួន ៨៥ នៅលើពិភពលោក និងមានសមត្ថភាពចម្លងបានលឿនជាង វ៉ារ្យ៉ង់ Alpha ដល់ទៅ ៦០ ភាគរយទៀតផង។
ខណៈពេលដែលសេដ្ឋកិច្ចអាស៊ី-ប៉ាស៊ីហ្វិកជាច្រើន កំពុងប្រឈមនឹងការរីករាលដាលនៃវ៉ារ៉្យង់ថ្មី និងកំពុងដាក់ចេញនូវវិធានការតឹងរ៊ឹងនៅតាមព្រំដែនយ៉ាងណាក្ដី ការរឹតបន្តឹងជាបណ្តោះអាសន្នមិនមែនមានន័យថា នឹងមានប្រសិទ្ធភាពជាងការចាក់វ៉ាក់សាំងនោះទេ។
ជាឧទាហរណ៍ ប្រទេសអូស្រ្តាលីដែលត្រូវបានគេចាត់ទុកថា ទទួលបានជោគជ័យក្នុងការទប់ស្កាត់នូវការរីករាលដាលពេលកន្លងមក ក្នុងប៉ុន្មានថ្ងៃថ្មីៗនេះ ខ្លួនទើបតែបានបិទខ្ទប់ប្រទេសទាំងមូលដោយសាររកឃើញនូវវ៉ារ៉្យង់ Delta មានប្រភពមកពីប្រទេសឥណ្ឌា ហើយបានឆ្លងពីប្រទេសមួយទៅប្រទេសមួយយ៉ាងលឿនគួរឱ្យកត់សម្គាល់។
លោក Hassan Vally អ្នកជំនាញផ្នែករោគសាស្ត្រនៃសាកលវិទ្យាល័យ La Trobe University ក្នុងទីក្រុង Melbourneបានមានប្រសាសន៍ថា៖ «ដរាបណាប្រទេសយើងនៅមិនទាន់ទទួលបានការចាក់វ៉ាក់សាំងខ្ពស់ នោះយើងនៅតែស្ថិតក្នុងស្ថានភាពមិនស្ថិតស្ថេរ និងងាយរងគ្រោះជានិច្ច ហើយយើងមិនត្រូវធ្វើអើពើចំពោះបញ្ហានេះទេ»។
គួរបញ្ជាក់ផងដែរថា ប្រជាជនប្រមាណតិចជាង ៥ ភាគរយនៃចំនួនប្រជាជនអូស្រ្តាលីសរុប ទើបតែទទួលបានការចាក់វ៉ាក់សាំងទាំង ២ ដូស បើគិតចាប់ពីការចាប់ផ្ដើមយុទ្ធនាការវ៉ាក់សាំងពីខែកុម្ភៈ មកដែលអត្រានេះ បានធ្វើឱ្យប្រទេសអូស្ត្រាលី ក្លាយជាប្រទេស ដែលមានអត្រាអ្នកទទួលវ៉ាក់សាំងទាបបំផុតក្នុងចំណោមប្រទេសអភិវឌ្ឍន៍។
ក្នុងអំឡុងពេលត្រូវបានគេរិះគន់ជុំវិញការចាក់វ៉ាក់សាំងនេះ លោកនាយករដ្ឋមន្រ្តី Scott Morrison នៅសប្តាហ៍នេះ បានប្រកាសថា ការចាក់វ៉ាក់សាំងនឹងត្រូវចាក់ជាចាំបាច់សម្រាប់តែបុគ្គលិក ដែលធ្វើការក្នុងវិស័យសុខាភិបាល និងចាស់ជរា និងនិយោជិតសណ្ឋាគារប៉ុណ្ណោះ ហើយវ៉ាក់សាំង AstraZeneca ដែលកំណត់សម្រាប់ចាក់តែលើមនុស្សវ័យចំណាស់នឹងត្រូវប្រើប្រាស់លើប្រជាជន ដែលមានអាយុក្រោម ៦០ ឆ្នាំដូចគ្នា ប៉ុន្តែត្រូវយល់ព្រមលើលក្ខខណ្ឌលើកលែងការសងជំងឺចិត្តពីរដ្ឋាភិបាល។
ដោយឡែកនៅហុងកុងវិញប្រជាជនតិចជាង ២០ ភាគរយ ទើបទទួលការចាក់វ៉ាក់សាំងទាំង ២ ដូស ក្នុងនោះប្រជាជនមានអាយុលើសពី ៧០ ឆ្នាំ មានចំនួនតិចជាង ៥ ភាគរយ។ អាជ្ញាធរកាលពីថ្ងៃចន្ទ ក៏បានហាមឃាត់ជើងហោះហើរពីចក្រភពអង់គ្លេសដែលជាប្រទេសមានករណីវ៉ារ៉្យង់ Delta ថ្មី ស្មើនឹង ៩៩ ភាគរយចំនួនករណីឆ្លងសរុប។
ទន្ទឹមនឹងនេះ នៅប្រទេសនូវែលសេឡង់ ឯណោះវិញ មានប្រជាជនទទួលបានវ៉ាក់សាំងតិចជាង ១០ ភាគរយនៃចំនួនប្រជាជនរបស់ខ្លួន កាលពីសប្តាហ៍មុន ក៏បានបិទគោលការណ៍ឆ្លងប្រទេសដោយគ្មាន ចត្តាឡីស័ករបស់ខ្លួនជាមួយប្រទេសអូស្រ្តាលី ដើម្បីចៀសវាងការរីករាលដាលនៃវ៉ារ៉្យង់ Delta ថ្មី។
លោកវេជ្ជបណ្ឌិត Michael Baker ជាសាស្រ្តាចារ្យផ្នែកសុខភាពសាធារណៈនៃសាកលវិទ្យាល័យ Otago នៅទីក្រុង Wellington ប្រទេសនូវែលសេឡង់ បានមានប្រសាសន៍ថា វិធីសាស្រ្តលុបបំបាត់នូវគោលការណ៍ធ្វើដំណើរដោយគ្មានចត្តាឡីស័កនេះ បានបង្កើតនូវលទ្ធផល ដែលមិនសូវប៉ះពាល់ដល់សេដ្ឋកិច្ច និងសុខុមាលភាព អាជ្ញាធរមិនអាចចេះតែយកការចាក់វ៉ាក់សាំងជាអ្វី ដែលគ្រប់គ្រាន់ក្នុងការទប់ស្កាត់ការរីករាលដាលនេះទេ។
ទោះបីជាវ៉ារ្យ៉ង់ថ្មីនេះ មានលក្ខណៈឆ្លងខ្លាំង និងមានភាពស៊ាំទៅនឹងវ៉ាក់សាំងជាងប្រភេទដទៃទៀត ក៏ដោយ ប្រទេសដែលមានអត្រាទទួលបានវ៉ាក់សាំងទាប រមែងទទួលរងនូវហានិភ័យខ្ពស់នៃការរីករាលដាលនៃវ៉ារ្យ៉ង់នេះ។
វ៉ាក់សាំងមួយចំនួនរួមមាន វ៉ាក់សាំង Pfizer មានប្រសិទ្ធភាព ៩៦ ភាគរយ ប្រឆាំងនឹងករណីធ្ងន់ធ្ងរ ដែលត្រូវការកាសម្រាកព្យាបាលនៅមន្ទីរពេទ្យ ក្រោយដូសទី២ រីឯវ៉ាក់សាំង AstraZeneca ផ្តល់ប្រសិទ្ធភាព ៩២ ភាគរយ។ នេះបើយោងតាមការវិភាគសុខភាពសាធារណៈអង់គ្លេសចេញផ្សាយកាលពីខែមិថុនា។ ប្រសិទ្ធភាព Pfizer បានធ្លាក់ចុះដល់ ៩៤ ភាគរយ ខណៈ AstraZeneca ធ្លាក់ចុះដល់ ៧១ ភាគរយ ក្រោយទទួលបានវ៉ាក់សាំងដូសទី១។
តួយ៉ាង នៅចក្រភពអង់គ្លេសប្រជាជនជាង ៨០ ភាគរយ បានទទួលវ៉ាក់សាំងដូសលើកទី១ ដោយករណីស្លាប់ដោយសារវ៉ារ្យ៉ង់នេះស្ថិតនៅក្នុងកម្រិតទាប បើទោះជាករណីឆ្លងនៅតែមានការកើនឡើងចាប់តាំងពីចុងខែឧសភា ហើយបើទោះបីជាបានពន្យារពេលការបើកប្រទេសឡើងវិញ រហូតដល់ថ្ងៃទី ១៩ ខែកក្កដា ក៏ដោយ។
លោក Peter Horby ប្រធានក្រុមផ្តល់យោបល់ដល់ក្រុមប្រឹក្សារដ្ឋស្តីពីការគំរាមកំហែង និងការស្ដារប្រទេសពីវិបត្តិកូវីដ បានប្រាប់វិទ្យុ BBC នៅចុងសប្តាហ៍នេះថា វ៉ាក់សាំងទាំងនេះ បានធ្វើឱ្យករណីឆ្លង និងការស្លាប់ធ្លាក់ចុះជាងមុន បើទោះបីវាមិនទាន់ត្រូវបានបាត់ទាំងស្រុងក៏ដោយ។
លោក Sajid Javid រដ្ឋមន្រ្តីក្រសួងសុខាភិបាលអង់គ្លេសដែលទើបត្រូវបានតែងតាំងកាលពីថ្ងៃចន្ទ បានបង្ហាញថា«ទិវាសេរីភាព» របស់ប្រទេសនេះនឹងដំណើរការដូចការគ្រោងទុកនៅខែក្រោយ ដោយលើកឡើងថាប្រទេសអង់គ្លេសត្រូវតែចេះរៀនរស់នៅជាមួយនឹងវីរុសនេះ។
ទោះយ៉ាងណាក្ដី អ្នកជំនាញមួយចំនួននៅអង់គ្លេសបារម្ភថា មេរៀនសំខាន់ៗអំពីលទ្ធផលរបស់វ៉ារ្យ៉ង់នៅប្រទេសនេះ អាចនឹងត្រូវបានប្រទេសនេះព្រងើយកន្តើយ។ប្រភពដដែលបាន ជំរុញឱ្យប្រទេសផ្សេងទៀតឃ្លាំមើលអង់គ្លេសយ៉ាងដិតដល់ ជាពិសេសក្រោយប្រទេសនេះបានបើកដំណើរការឡើងវិញ ក្នុងពេលដែលវ៉ារ៉្យង់ថ្មីកំពុងរីករាលដាលពេញប្រទេស។
ដោយសារភាពចចេសរឹងរូសរបស់ប្រទេសនេះ អ្នកជំនាញព្រួយបារម្ភនឹងជំរុញឱ្យមានវិធីសាស្រ្តរួមមួយ ដើម្បីទប់ស្កាត់លទ្ធផលអាក្រក់ ដែលអាចនឹងកើតមានឡើង។ អ្នកជំនាញបានលើកឡើងថា អ្វីដែលក្រុមអ្នកជំនាញមើលឃើញនាពេលបច្ចុប្បន្ន គឺគ្រោះថ្នាក់នៃយុទ្ធសាស្ត្រចែកចាយវ៉ាក់សាំងតែប៉ុណ្ណោះ។ វ៉ាក់សាំង គឺជាផ្នែកមួយដ៏សំខាន់នៃការឆ្លើយតបនឹងការរីករាលដាល ប៉ុន្តែយើងចាំបាច់ត្រូវការពារកុំឱ្យមានការឆ្លងច្រើនដូចគ្នា។
ស្រដៀងគ្នានេះដែរ លោក Peter Collignon អ្នកជំនាញជំងឺឆ្លងសាលាវេជ្ជសាស្ត្រនៃសាកលវិទ្យាល័យជាតិអូស្ត្រាលី បាននិយាយថា លោករំពឹងថា ប្រទេសអូស្ត្រាលី នឹងអាចបញ្ឈប់ការបិទបើកប្រទេសដូចអំពិលអំពែក ដោយប្រទេសនេះគួរបិទខ្ទប់រហូតដល់ពាក់កណ្តាលឆ្នាំក្រោយ នៅពេលដែលវ៉ាក់សាំង Pfizer និង Moderna បានមកដល់ និងបានចែកចាយដល់ប្រជាជនរួច ដោយលោកលើកឡើងថា ប្រទេសនេះត្រូវការពេលប្រមាណពី ៤ ទៅ ៥ ខែទៀត៕