កាលពីថ្ងៃទី ២០ ខែមិថុនា ប្រទេសចិន បានសម្រេចចែកចាយវ៉ាក់សាំងកូវីដ ១៩ ចំនួនជាង ១ ពាន់លានដូស ឬស្មើនឹងជិត ៤០ ភាគរយនៃចំនួនវ៉ាក់សាំង ដែលបានចែកចាយប្រមាណ ២,៥ ពាន់លានដូសនៅទូទាំងពិភពលោក។ វ៉ាក់សាំងដែលបាននាំចេញភាគច្រើន គឺវ៉ាក់សាំង Sinopharm និង Sinovac ក្នុងប្រមាណរាប់រយលានដូស ត្រូវបានចែកចាយទៅកាន់ប្រទេសជាង ៨០ នៅទូទាំងពិភពលោក។
យ៉ាងណាមិញ ករណីឆ្លងកូវីដ ១៩ បានផ្ទុះឡើងយ៉ាងខ្លាំងនៅក្នុងប្រទេសជាច្រើននៅទូទាំងពិភពលោក បានចោទជាសំណួរដល់ប្រសិទ្ធភាពនៃវ៉ាក់សាំង Sinopharm និង Sinovac ក្នុងការប្រឆាំងនឹងការរីករាលដាលនៃជំងឺកូវីដ ១៩។
តួយ៉ាង វ៉ាក់សាំងផលិតដោយចិនជាង ៦០ ភាគរយ គឺជាការទទួលទិញ ដោយឥណ្ឌូនេស៊ី ដែលជាប្រទេសមានចំនួនករណីឆ្លងធំបំផុតក្នុងប្រទេស ដែលករណីឆ្លងថ្មីប្រមាណជិត ២ម៉ឺនករណីក្នុង ១ ថ្ងៃ នៅដើមសប្តាហ៍នេះ ដែលភាគច្រើនជាករណីវ៉ារ៉្យង់ Delta ថ្មី។
លោកស្រី Olivia Herlinda ប្រធានគោលនយោបាយនៅ មជ្ឈមណ្ឌលសម្រាប់ គំនិតផ្តួចផ្តើមអភិវឌ្ឍន៍ យុទ្ធសាស្ត្រឥណ្ឌូណេស៊ីបានប្រាប់សារព័ត៌មានតួគី TRT World ថា៖ «ការសន្និដ្ឋានណាមួយអំពីប្រសិទ្ធភាពរបស់វ៉ាក់សាំង Sinovac បច្ចុប្បន្នវាពិបាកថា ដោយសារអត្រាចាក់វ៉ាក់សាំងនៅប្រទេសនេះនៅទាបនៅឡើយ ហើយអ្នកដែលទទួលបានវ៉ាក់សាំង Sinovac ភាគច្រើនជាបុគ្គលិកក្នុងវិស័យសុខាភិបាល និងចំនួនប្រជាជនមានអាយុក្រោម ៦០ ឆ្នាំ នៅមានកម្រិតទាបនៅឡើយ។
ដូចប្រទេសកំពុងអភិវឌ្ឍន៍ដទៃទៀតដែរ អាជ្ញាធរសុខាភិបាលឥណ្ឌូនេស៊ី ដឹងថា មានតែប្រទេសចិនទេ ដែលអាចផ្គត់ផ្គង់នូវចំនួនដូសក្នុងកម្រិត ដែលចាំបាច់សម្រាប់ផ្ដល់ឱ្យប្រជាជនចំនួន ៧០ ភាគរយ ដើម្បីសម្រេចគោលដៅទទួលបានភាពស៊ាំជាសហគមន៍នៅឆ្នាំនេះ។
វេជ្ជបណ្ឌិត Pawin Numthavaj អ្នកជំនាញផ្នែករោគរាតត្បាតនៅមន្ទីរពេទ្យ Ramathibodi ក្នុងប្រទេសថៃ បានប្រាប់សារព័ត៌មាន TRT World ថា អាជ្ញាធរថៃកំពុងពិចារណាទិញ Sinovac ពីព្រោះ វាងាយស្រួលក្នុងការទិញជាងវ៉ាក់សាំងដទៃ។លោក បានបន្ថែមថា ថ្មីៗនេះរដ្ឋាភិបាលកំពុងស្វែងរកវ៉ាក់សាំង ដែលផលិតដោយក្រុមហ៊ុនវ៉ាក់សាំងផលិតផ្សេងៗទៀត ប៉ុន្តែក្រុមហ៊ុនទាំងនោះផលិតយឺតពេលបន្តិច ហើយត្រូវរង់ចាំផលិតកម្មយូរ ត្រូវចាំយ៉ាងហោចក៏ដំណាច់ឆ្នាំនេះដែរ។
បើក្រឡេកមើល ប្រទេសម៉ុងហ្គោលី បើទោះជាមានការបិទខ្ទប់ និងចំនួនប្រជាជនទទួលបានវ៉ាក់សាំងទាំង ២ ដូស ក្នុងប្រទេសមានដល់ទៅ ៥០ ភាគរយនៃចំនួនប្រជាជនរបស់ពួកគេ (ភាគច្រើនជាវ៉ាក់សាំងចិន) ក៏ដោយក៏ចំនួននៃការឆ្លងក្នុងស្រុកនៅ តែមានចំនួនច្រើនជានិច្ច ពោលគឺច្រើនជាង ១០០ ករណី ក្នុង ១ ថ្ងៃ។
វេជ្ជបណ្ឌិត Fiona Russell អ្នកជំនាញខាងរោគឆ្លង និងវ៉ាក់សាំងនៅសាកលវិទ្យាល័យ University of Melbourne បាននិយាយថា៖ «មានហេតុផលជាច្រើនដែលអាចកើតមានចំពោះបញ្ហានេះ។
យើងត្រូវសិក្សាឱ្យបានល្អិតល្អន់ ជាជាងការនិយាយដោយស្មាន។លោកស្រីបាននិយាយថា ករណី ដែលកើនឡើងនោះ កើតចំពោះអ្នកមិនទាន់ចាក់វ៉ាក់សាំង ឬ ចាក់មិនទាន់គ្រប់ ឬប្រសិទ្ធភាពនៃវ៉ាក់សាំងប្រឆាំងនឹងវ៉ារ៉្យង់ថ្មីនៅ មិនទាន់គ្រប់គ្រាន់ ឬការចែកចាយវ៉ាក់សាំងដល់ប្រជាជនទូទាំងប្រទេសនៅមិនទាន់ដល់កម្រិតឱ្យបង្កើតភាពស៊ាំជាសហគមន៍ ឬយ៉ាងណា»។
អ្នកនាំពាក្យក្រសួងការបរទេសចិន លោក Wang Wenbin បានច្រានចោលនូវចម្ងល់ពីប្រសិទ្ធភាពនៃវ៉ាក់សាំង Sinopharm និង Sinovac របស់ប្រទេសចិនថា ជាការរិះគន់ បែបលម្អៀង និងលាបពណ៌ផងដែរ។
ទោះយ៉ាងណា ក្រុមអ្នកជំនាញនិយាយថាទោះបីវ៉ាក់សាំងចិនទាំងនេះ មិនមានប្រសិទ្ធភាពខ្លាំងដូចវ៉ាក់សាំងដទៃក៏មិនមែនមានន័យថាវ៉ាក់សាំងចិនមិនមានប្រសិទ្ធភាពដែរ។ មិនមានវ៉ាក់សាំងណាមួយផ្តល់ការការពារ ១០០ ភាគរយប្រឆាំងនឹងកូវីដ ១៩ ទេ។ វ៉ាក់សាំងចិនមានសារៈសំខាន់ក្នុងការការពារកុំឱ្យមានករណីស្លាប់និងការសម្រាកនៅមន្ទីរពេទ្យច្រើន មិនមែនធ្វើឱ្យករណីឆ្លងធ្លាក់ដល់សូន្យនោះទេ។
សាស្រ្តាចារ្យ Jin Dong-yan សាកលវិទ្យាល័យហុងកុង បាននិយាយថា៖ «ប្រសិនបើយើងចង់កាត់បន្ថយករណីធ្ងន់ធ្ងរ និងចំនួនអ្នកស្លាប់ វ៉ាក់សាំង Sinopharm និង Sinovac អាចជួយបាន»។ លោក Ben Cowling សាស្ត្រាចារ្យផ្នែករោគឆ្លងនៃសាកលវិទ្យាល័យតែមួយបាននិយាយថា៖ «វ៉ាក់សាំងចិន ហាក់ដូចជាបន្ថយចំនួនអ្នកឆ្លងធ្ងន់ធ្ងរ និងអ្នកស្លាប់ បានជួយជីវិតមនុស្សច្រើនណាស់»។
អ្នកស្រី Enkhsaihan Lkhagvasuren មន្ត្រីក្រសួងសុខាភិបាលម៉ុងហ្គោលី បានអះអាងថា វ៉ាក់សាំង Sinopharm មានប្រសិទ្ធភាពណាស់។ អ្នកស្រីបានបន្ថែមថា៖ «យើងមិនអាចបែងចែកប្រសិទ្ធភាពវ៉ាក់សាំងដោយនិយាយថា វ៉ាក់សាំងនេះ មិនល្អឬវ៉ាក់សាំងមួយណាល្អជាងឡើយ»៕