ការធ្វើបាតុកម្មប្រឆាំងនឹងលោកប្រធានាធិបតី Jair Bolsonaro ធ្វើឡើងពាសពេញប្រទេសប្រេស៊ីលកាលពីថ្ងៃសៅរ៍ ក្នុងអំឡុងពេល ១ ថ្ងៃ បន្ទាប់ពីតុលាការកំពូលបានអនុញ្ញាតឱ្យមានការស៊ើបអង្កេតព្រហ្មទណ្ឌទៅលើការឆ្លើយតបរបស់លោក ចំពោះការចោទប្រកាន់អំពីអំពើពុករលួយ ដែលអាចកើតមានពាក់ព័ន្ធនឹងកិច្ចព្រមព្រៀងវ៉ាក់សាំង។
ក្រុមបាតុករបានប្រមូលផ្តុំគ្នាដោយមនុស្សរាប់ពាន់នាក់នៅក្នុងទីក្រុងជាង ៤០ ដើម្បីឱ្យមានការចែកចាយវ៉ាក់សាំងឱ្យកាន់តែច្រើនជាងនេះ បើមិនដូចនេះទេ លោក Bolsonaro ត្រូវតែលាលែងពីតំណែង។
នៅក្នុងសេចក្តីសម្រេចកាលពីថ្ងៃសុក្រ តុលាការកំពូលបានឱ្យដឹងថា ការស៊ើបអង្កេតត្រូវបានគាំទ្រដោយសក្ខីកម្មថ្មីៗនៅក្នុងគណៈកម្មាធិការព្រឹទ្ធសភាមួយដែលស៊ើបអង្កេតលើការដោះស្រាយរបស់រដ្ឋាភិបាលលើការរីករាលដាលនៃជំងឺកូវីដ ១៩។
រដ្ឋអាជ្ញាក៏នឹងស៊ើបអង្កេតថា តើ Bolsonaro បានប្រព្រឹត្តបទឧក្រិដ្ឋជាអាទិ៍ ដែលតម្រូវឱ្យមានការពន្យារពេលឬបដិសេធសកម្មភាព ដែលជាផ្នែកមួយនៃកាតព្វកិច្ចរបស់មន្ត្រីសាធារណៈសម្រាប់ហេតុផល ប្រយោជន៍ផ្ទាល់ខ្លួន ឬយ៉ាងណា? តុលាការមិនបានបញ្ជាក់ថា តើករណីចោទប្រកាន់ផ្សេងទៀតរបស់លោក Bolsonaro នឹងត្រូវបានគេស៊ើបអង្កេតដែរ ឬយ៉ាងណាឡើយ?
ការស៊ើបអង្កេតនេះ ធ្វើឡើងបន្ទាប់ពីលោក Luis Ricardo Miranda ប្រធានផ្នែកនាំចូលផលិតផលឱសថសាស្ត្ររបស់ក្រសួងសុខាភិបាល បាននិយាយថា លោកត្រូវគេបង្ខំឱ្យចុះហត្ថលេខាលើការនាំចូលវ៉ាក់សាំងចំនួន ២០ លានដូសពីឱសថឥណ្ឌា Bharat Biotech ។
លោកបាននិយាយថា កិច្ចព្រមព្រៀងនោះ មានភាពមិនប្រក្រតីនៅក្នុងវិក្កយបត្រជាពិសេសការទូទាត់ប្រាក់ចំនួន ៤៥ លានដុល្លារដល់ក្រុមហ៊ុន ដែលមានមូលដ្ឋាននៅប្រទេសសិង្ហបុរី ផងដែរ៕