.jpg)
លោកនាយករដ្ឋមន្ត្រីអ៊ីស្រាអែល ណាហ្វតាលី បេននីត ធ្វើសេចក្តីថ្លែងការណ៍នៅសភាក្នុងទីក្រុងហ្ស៊េរុយសាឡិមកាលពីថ្ងៃទី ៥ កក្កដា។ AFP
សារព័ត៌មានបោះពុម្ពប្រចាំថ្ងៃ ឆ្វេងនិយម Haaretz បានដកស្រង់សម្តី លោកនាយករដ្ឋមន្រ្តីអ៊ីស្រាអែល Naftali Bennett ចេញពីកាសែតក្នុងស្រុកមួយថា ប្រទេសនេះ បានយល់ព្រមផ្គត់ផ្គង់វ៉ាក់សាំង Pfizer-BioNTech ចំនួន ៧០ ម៉ឺនដូសដល់ប្រទេសកូរ៉េខាងត្បូង។
លោក Bennett បាននិយាយថា ការចែកចាយចំនួនដូសទាំងនេះ គឺនឹងចាប់ផ្តើមនៅចុងខែកក្កដានេះ។ នៅក្នុងកិច្ចព្រមព្រៀង អ៊ីស្រាអែលនឹងទទួលបាននូវចំនួនវ៉ាក់សាំងដដែលវិញពីខាងភាគីកូរ៉េនៅខែកញ្ញា និងខែតុលា។
អ្នកនាំពាក្យក្រសួងសុខាភិបាលកូរ៉េខាងត្បូងបាននិយាយកាលពីថ្ងៃអង្គារថា ខ្លួនមិនមានមតិយោបល់អ្វីទាក់ទិននឹងរបាយការណ៍ខាងលើនេះទេ។
កូរ៉េខាងត្បូងបានចែកចាយវ៉ាក់សាំងកូវីដ ១៩ ដែលខ្លួនមានទាំងប៉ុន្មានឱ្យបានលឿនតាមដែលអាចធ្វើទៅបាន ប៉ុន្តែបច្ចុប្បន្នប្រទេសនេះ ត្រូវប្រឈមនឹងវិបត្តិខ្វះវ៉ាក់សាំងគ្រប់គ្រាន់ចែកចាយ ក្នុងអំឡុងពេលការផ្គត់ផ្គង់វ៉ាក់សាំងនៅទូទាំងពិភពលោកមិនទាន់តម្រូវការជាពិសេសនៅអាស៊ី។
រដ្ឋាភិបាលប្រទេសដដែលនេះ បាននិយាយកាលពីសប្តាហ៍មុនថា ខ្លួនសង្ឃឹមថា ប្រទេសខ្លួនអាចនឹងបង្កើតនូវភាពស៊ាំសហគមន៍ឱ្យបានមុនខែវិច្ឆិកា ដោយគ្រោងនឹងចែកចាយវ៉ាក់សាំងដូសទី១ ដល់ប្រជាជនយ៉ាងតិច ៧០ ភាគរយ ទូទាំងប្រទេស ដោយប្រើប្រាស់វ៉ាក់សាំងប្រភេទ mRNA ដូចជាវ៉ាក់សាំង Pfizer នេះជាដើម៕
