ក្រុមហ៊ុនអាកាសចរណ៍នៅក្នុងទីផ្សារកាបូនធំជាងគេបំផុតនៅលើពិភពលោក នឹងត្រូវបង់ថ្លៃលើការបំពុលចេញពីយន្តហោះ ក្រោយសហភាពអឺរ៉ុបពង្រឹងគោលនយោបាយនៃការកាត់បន្ថយការប្រែប្រួលអាកាសធាតុរបស់ខ្លួនក្រោមកិច្ចព្រមព្រៀងបៃតងថ្មី (Green New Deal)។
សំណើរបស់គណៈកម្មការអឺរ៉ុប រួមបញ្ចូលទាំងដំណាក់កាល នៃការបង់ថ្លៃស្ដីអំពីការបំភាយឧស្ម័នជាបណ្តើរៗ សម្រាប់ក្រុមហ៊ុនដឹកជញ្ជូន ដែលជាផ្នែកមួយនៃវិធានការដែលត្រូវប្រកាសនៅថ្ងៃទី ១៤ ខែកក្កដា ខាងមុខ។ វិធានការនេះ ក៏នឹងជួយណែនាំឱ្យក្រុមហ៊ុនក្នុងវិស័យដឹកជញ្ជូនឱ្យចេះប្រើប្រាស់ប្រេងស្អាតជាងមុន និងថាមពលផ្សេងៗ ដែលមិនប៉ះពាល់បរិស្ថាន។
សហគមន៍អឺរ៉ុបមានគោលបំណងប្រែក្លាយកិច្ចព្រមព្រៀងបៃតងនិងមហិច្ឆតានៃការថែរក្សាបរិស្ថាន ឱ្យក្លាយទៅជា យុទ្ធសាស្ត្រកំណើនសេដ្ឋកិច្ចថ្មីពីការងើបឡើងវិញនៃវិបត្តិកូវីដ១៩។ វិធានការថ្មីនេះ ក៏រួមបញ្ចូលទាំងការពង្រឹង និងពង្រីកទីផ្សារកាបូនរបស់ប្លុក ដោយបង្កើតកម្មវិធីពាណិជ្ជកម្មការបំភាយឧស្ម័នថ្មីសម្រាប់អគារនិងការដឹក ជញ្ជូនតាមផ្លូវនិងកំណត់ស្តង់ដាការបំភាយឧស្ម័នថ្មីសម្រាប់រថយន្តផងដែរ។
ប្រភពមួយ ដែលសុំមិនបញ្ចេញឈ្មោះ ដោយសារសេចក្ដីព្រាងនេះ នៅមិនទាន់បានផ្សព្វផ្សាយជាសាធារណៈនៅឡើយ បានឱ្យដឹងថាគណៈកម្មការនេះចង់ធ្វើឱ្យក្រុមហ៊ុនផ្គត់ផ្គង់ប្រេងឥន្ធនៈបង្កើនការផ្គត់ផ្គង់ប្រេងឥន្ធនៈ ដល់ក្រុមហ៊ុនអាកាសចរណ៍ប្រកបដោយចីរភាពឱ្យដូចទៅនឹងប្រេងឥន្ធនៈយន្តហោះ ដែលមានលក់ស្រាប់នៅអាកាសយានដ្ឋានសហភាពអឺរ៉ុប។ លើសពីនេះទៀតនាយកប្រតិបត្តិសហភាពអឺរ៉ុប គ្រោងនឹងជំរុញឱ្យមាន ការស្រូបយកឥន្ធនៈកាបូនសំយោគទាប ឬ អ្វីដែលគេហៅថាFit for 55 package។
ឥន្ធនៈមិនប៉ះពាល់បរិស្ថាន ក៏នឹងទទួលបានការអនុគ្រោះពន្ធ ក្រោមក្របខ័ណ្ឌពន្ធថាមពលថ្មីរបស់សហភាពអឺរ៉ុបផងដែរ។ការជំរុញផ្នែកនីតិប្បញ្ញត្តិនេះ គឺសំដៅតម្រឹមសេដ្ឋកិច្ចអឺរ៉ុបជាមួយនឹងគោលដៅថ្មី ដើម្បីកាត់បន្ថយឧស្ម័នផ្ទះកញ្ចក់យ៉ាងហោចណាស់ ៥៥ ភាគរយ នៅឆ្នាំ ២០៣០ ពីឆ្នាំ ១៩៩០។
វិធានដដែលនេះ ក៏នឹងរួមបញ្ចូលនូវសំណើដើម្បីបង្កើនចំណែកថាមពលកកើតឡើងវិញ បង្កើនប្រសិទ្ធភាពថាមពលនិងគោលដៅកាត់បន្ថយការបំភាយជាតិពុលជាដើម។ នៅក្នុងសេចក្តីព្រាងឯកសារដែលនឹងត្រូវបញ្ជូនទៅរដ្ឋា ភិបាលជាតិនិងសភាអឺរ៉ុបនៅសប្តាហ៍ក្រោយ គណៈកម្មការនេះគ្រោងនឹងធ្វើឱ្យការផ្លាស់ប្តូរនេះក្លាយជាការផ្លាស់ប្ដូរ «ប្រកបដោយប្រសិទ្ធភាពចំណាយនិងស្មើភាព»៕