ប្រទេសកាណាដា បានប្រកាសពីវិធានការថ្មីៗ ដើម្បីការពារភ្លើងឆេះព្រៃ ក្រោយពីមានការកើនឡើងកម្តៅខ្លាំងកាលពីខែមុនបណ្តាលឱ្យមានអគ្គិភ័យកើតឡើងជាច្រើននៅតំបន់ភាគខាងលិចរបស់ប្រទេស។
កាលពីថ្ងៃអាទិត្យ នាយកដ្ឋានដឹកជញ្ជូនបានចេញសេចក្តីថ្លែងការណ៍រៀបរាប់ថា ការធ្វើដំណើរតាមផ្លូវដែកនឹងត្រូវកាត់បន្ថយល្បឿនរថភ្លើង នៅពេលសីតុណ្ហភាពឡើងដល់ ៣០ អង្សាសេ ហើយអ្នកត្រួតពិនិត្យរថភ្លើងត្រូវធានាថា រថភ្លើងមិនមានផ្ទុកវត្ថុធាតុដើមដែលអាចឆេះបាន។
អ្នកត្រួតពិនិត្យនឹងត្រូវតម្រូវឱ្យចុះផ្សាយ និងរាយការណ៍អំពីអគ្គិភ័យដែលមាននៅតាមបណ្តោយផ្លូវរបស់ពួកគេផងដែរ។ វិធានការនេះបានចូលជាធរមាននៅពាក់កណ្តាលអធ្រាត្រថ្ងៃទី ១១ កក្កដា។
តាមការស្រង់សម្តីរបស់សារព័ត៌មាន Aljazeera រដ្ឋមន្រ្តីក្រសួងដឹកជញ្ជូន លោក Omar Alghabra បាននិយាយនៅក្នុងសេចក្តីថ្លែងការណ៍ថា ស្ថានភាពអាកាសធាតុបែបនេះ គឺមិនធ្លាប់មានពីមុនឡើយ ហើយស្ថានភាពអាកាសធាតុនេះបន្តបង្កការគំរាមកំហែងយ៉ាងធ្ងន់ធ្ងរដល់ប្រតិបត្តិការសុវត្ថិភាពសាធារណៈ និងផ្លូវដែក។
លោក Alghabra បានបន្តថា រដ្ឋាភិបាលប្រទេសកាណាដា នៅតែប្តេជ្ញាចិត្តជួយដល់អ្នកដែលរងផលប៉ះពាល់ដោយភ្លើងឆេះព្រៃ ហើយនឹងមិនស្ទាក់ស្ទើរក្នុងការធ្វើសកម្មភាពចាំបាច់ ដើម្បីកាត់បន្ថយហានិភ័យទាំងនេះ ចំពោះសុវត្ថិភាពសាធារណៈនៃផ្លូវដែក និងហេដ្ឋារចនាសម្ព័ន្ធឡើយ។
ក្រុមអ្នកជំនាញបានចង្អុលបង្ហាញអំពីការប្រែប្រួលអាកាសធាតុដែលជាកត្តាមួយ ដែលបានធ្វើឱ្យអាកាសធាតុកាន់តែអាក្រក់ឡើងដែលបណ្តាលឱ្យមានភ្លើងឆេះព្រៃរលកកម្តៅ និងព្យុះត្រូពិក។
នាយកគ្រប់គ្រងផ្នែកភ្លើងឆេះព្រៃនៅប្រទេសកាណាដា លោក Brian Wiens ដែលជាក្រុមស្រាវជ្រាវបាននិយាយថា កម្តៅនាពេលថ្មីៗនេះ នៅឆ្នេរសមុទ្រភាគខាងលិចប្រទេសកាណាដា ត្រូវបានផ្សារភ្ជាប់ទៅនឹងរលកកម្តៅដែលមានលក្ខណៈខ្យល់ក្តៅស្ងួតគ្របដណ្តប់លើផ្ទៃដីធំ និងធ្វើឱ្យសីតុណ្ហភាពឡើងខ្ពស់។
លោក Wiens បាននិយាយថា រលកកម្តៅបានធ្វើឱ្យមិនមានទឹកភ្លៀងមានសីតុណ្ហភាពខ្ពស់មានសំណើមទាបនៅលើផែនដី។
គួរបញ្ចាក់ផងដែរថា ប្រទេសកាណាដា កាលពីខែមុនបានបំបែកកំណត់ត្រា កម្តៅអាកាសធាតុនៅក្នុងប្រទេសរបស់ខ្លួនដោយរយៈពេល ៣ ថ្ងៃ ជាប់គ្នាអាកាសធាតុមានកម្តៅរហូតដល់ ៤៩,៦ អង្សាសេ ក្នុងទីក្រុង Lytton ខេត្ត British Columbia។
ក្រុមអ្នកជំនាញបាននិយាយថា សត្វសមុទ្រជាង ១ ពាន់លានក្បាលនៅតាមបណ្តោយឆ្នេរសមុទ្រប៉ាស៊ីហ្វិករបស់កាណាដា ទំនងជាបានងាប់ដោយសារការកើនឡើងកម្តៅផែនដីកាលពីសប្តាហ៍មុន។ រលកកម្តៅនេះ ត្រូវបានគេជឿថា បានសម្លាប់មនុស្សអស់ ៥០០ នាក់ នៅក្នុងរដ្ឋ British Columbia ហើយអ្នកជំនាញបារម្ភពីការជះឥទ្ធិពលដែលអាចប៉ះពាល់ដល់ជីវិតសត្វសមុទ្រផងដែរ៕