ភាពវឹកវរ​និង​អំពើ​អានាធិបតេយ្យ ​ដោយ​ក្រុមបាតុករ​ប្រដាប់អាវុធ​ រីករាលដាល​ពាសពេញ​ទីក្រុង ​Johannesburg កាលពី​ថ្ងៃ​អាទិត្យ ​ខណៈ​អំពើហិង្សា ​បានកើត​ឡើង​ជា​បន្តបន្ទាប់​ ក្រោយ​អតីត ប្រធានាធីបតី​អាហ្វ្រិក​ខាងត្បូង​លោក Jacob Zuma ​ជាប់ពន្ធ​នាគារ។

ភាព​ចលាចលនេះ​ត្រូវបាន​គេផ្តោតជា​សំខាន់នៅ​ក្នុងខេត្ត​កំណើត​របស់ហ្សូ​ម៉ាគឺ​ KwaZulu-Natal (KZN) ​ជា​កន្លែងដែល​រូបលោក​បានចាប់ផ្តើម​ទទួលការ​កាត់ទោស​ចំនួន​ ១៥ ខែពី​បទ​មើលងាយ​តុលាការ​នៅ​យប់ថ្ងៃពុធ​។

ប្រធានា​ធិបតី​អាហ្វ្រិក​ខាងត្បូង​បច្ចុប្បន្ន​ លោក Cyril Ramaphosa​ បាននិយាយ​កាលពីថ្ងៃ​អាទិត្យថា ​អំពើហិង្សា​នេះ មិនមាន​គោលបំណង​ពិតប្រាកដទេ​ហើយវា​បាន និងកំពុង​ធ្វើឱ្យខូច​ខាតដល់​កិច្ចខិតខំ​ប្រឹងប្រែង​ដើម្បីស្តារ​សេដ្ឋកិច្ច​ឡើងវិញ​ក្រោយ​វិបត្តិកូវីដ ១៩ ​ទៀតផង​។

ការផ្តន្ទាទោស​និង​ដាក់​ពន្ធនាគារ​លោក Zuma ត្រូវបាន​គេ​មើលឃើញថា​ជា​ការសាកល្បង​សមត្ថភាព​របស់​ប្រទេស​ប្រកាន់របប ​Apartheid ក្នុងការ​អនុវត្តច្បាប់​ដោយ​យុត្តិធម៌​ប្រឆាំងនឹង​អ្នក​គ្រប់គ្នា មិនថា​អ្នកនយោបាយ​មាន​អំណាច​ក៏ដោយ។ ​ប៉ុន្តែការ​ជាប់ឃុំឃាំង​របស់​លោក​បានធ្វើឱ្យ​អ្នកគាំទ្រ​ខឹង​សម្បា​យ៉ាងខ្លាំង​។

ប៉ូលិស​បាន​និយាយថា ​ពួកឧក្រិដ្ឋជន​កំពុង​ទាញយក​ផលប្រយោជន៍​ពីការចលាចល ​ដោយចូលលួច ​និងបង្កការ​ខូចខាត​ជា​សាធារណៈ​ និងឯកជន។​ស្ថាប័នស៊ើប​ការណ៍ជាតិ ​Nat Joints បានព្រមាន​ថា​អ្នកដែល​ញុះញង់ឱ្យ​មានអំពើ​ហិង្សាអាច​ប្រឈមនឹង​ការ​ចោទប្រកាន់​ពី​បទ​ឧក្រិដ្ឋ​ផងដែរ​។

នៅក្នុង​សេចក្តីថ្លែង​ការណ៍​មួយលោក ​Nat Joints ​បាននិយាយថា​មនុស្សចំនួន​ ៦២ នាក់​ ត្រូវបាន​ចាប់ខ្លួន​នៅក្រុង ​KZN និង ​Gauteng ដែលជា​មជ្ឈមណ្ឌល​សេដ្ឋ​កិច្ចដ៏​សំខាន់​របស់​ប្រទេស​៕