នេះមិនមែនជាលើកទី១ ទេ ដែលរដ្ឋាភិបាលចិនបានចាត់វិធានការប្រឆាំងនឹងក្រុមហ៊ុនបច្ចេកវិទ្យាយក្សចិន ដែលចង់ចុះបញ្ជីនៅក្នុងទីផ្សារសហរដ្ឋអាមេរិក ជាក់ស្ដែងដូចករណីថ្មីៗលើក្រុមហ៊ុន DiDi ដែលវិធានទាំងនេះ បង្កឱ្យមានការព្រួយបារម្ភយ៉ាងខ្លាំងអំពីអនាគតនៃការចុះបញ្ជីរបស់ក្រុមហ៊ុនចិននៅអាមេរិក និងភាគហ៊ុនចិនជាទូទៅ។
រយៈពេលតែ ២ ថ្ងៃបន្ទាប់ពីរដ្ឋញូវយ៉កបានព្រមព្រៀងឱ្យក្រុមហ៊ុននេះ ចុះបញ្ជីជាសាធារណៈ ការិយាល័យត្រួតពិនិត្យសន្តិសុខនៃប្រព័ន្ធអ៊ីនធឺណិតដែលជាអង្គភាពឃ្លាំមើលមួយនៃរដ្ឋបាល Cyberspace ចិន (CAC) បានបញ្ជាឱ្យក្រុមហ៊ុននេះ បញ្ឈប់ការចុះឈ្មោះអ្នកប្រើប្រាស់ថ្មី ជាបន្ទាន់។ ៤ ថ្ងៃ បន្ទាប់ពីការចុះបញ្ជីអង្គភាពដដែលនេះ ក៏បានបញ្ជាឱ្យបិទការទាញយកកម្មវិធី Didi ជាបណ្ដោះអាសន្នដោយសារអង្គភាពនេះ បានរកឃើញអំពីបទល្មើសប្រមូល និងប្រើទិន្នន័យឯកជនភាពរបស់អ្នកប្រើប្រាស់របស់ក្រុមហ៊ុន។
ក្រោយមកគេសង្កេតឃើញតម្លៃភាគហ៊ុនរបស់ក្រុមហ៊ុននេះ ធ្លាក់ចុះជាលំដាប់ពោល គឺធ្លាក់ចុះ ៥ ភាគរយ នៅថ្ងៃសុក្រ ទី ២ ខែកក្កដា និងធ្លាក់ចុះ ២៥ ភាគរយបន្ថែមទៀតនៅថ្ងៃអង្គារ ទី ៦ ខែកក្កដា និង ៤,៦ ភាគរយ នៅថ្ងៃពុធ ទី ៧ ខែកក្កដា។ នេះបើតាមឱ្យដឹងពីអត្ថបទចេញពីវេបសាយទីផ្សារហិរញ្ញវត្ថុ Seeking Alpha។
ទោះយ៉ាងណារដ្ឋាភិបាលចិនបានអះអាងថា សកម្មភាពនេះ ត្រូវបានធ្វើឡើងដោយសារតែក្រុមហ៊ុនបានរំលោភច្បាប់ស្តីពីការប្រមូល និងការប្រើប្រាស់ទិន្នន័យឯកជនរបស់អ្នកប្រើប្រាស់ ទោះបីជាសកម្មភាពនេះ ផ្ដល់ផលប៉ះពាល់អវិជ្ជមានដល់វិនិយោគិនអាមេរិកក៏ដោយ។
ទីផ្សារបច្ចេកវិទ្យាកាន់តែចាប់ផ្ដើមព្រួយបារម្ភបន្ថែមទៀតក្រោយក្រុមប្រឹក្សារដ្ឋរបស់ប្រទេសចិន បានប្រកាសថា ខ្លួននឹងពិនិត្យមើលលើ «ការទទួលខុសត្រូវខាងព័ត៌មានវិទ្យា» របស់ក្រុមហ៊ុន ដែលចុះបញ្ជីនៅក្រៅប្រទេស ហើយខ្លួនកំពុងបង្កើត «ប្រព័ន្ធនៃការអនុវត្តកម្មវិធីសិក្សាបន្ថែមនៃច្បាប់ទីផ្សារមូលធនរបស់ប្រទេសចិន» ថែមទៀតផង។
ខណៈពេលដែលក្រុមហ៊ុនយក្សបច្ចេកវិទ្យារបស់ចិនគ្រប់គ្រងទិន្ន័យឯកជនអ្នកប្រើប្រាស់ស្ទើគ្រប់ផ្នែកពោលពីទម្លាប់នៃការប្រើប្រាស់សេវាដឹកជញ្ជូនរហូតដល់ការបង់ប្រាក់បានផ្ដល់ភាពមិនងាយស្រួលដល់រដ្ឋាភិបាលចិន ជាពិសេស លោក ស៊ី ជីនភីង។ ការព្រួយបារម្ភមួយផ្នែកគឺថា តើទិន្នន័យសំខាន់ៗអាចលេចធ្លាយហួសព្រំដែនប្រទេសដែរ ឬយ៉ាងណា?
យ៉ាងណាមិញ វេបសាយដដែលនេះ បានឱ្យដឹងដែរថា វាជារឿងធម្មតាហើយនៅពេលអាជ្ញាធរក្នុងស្រុកព្រួយបារម្ភពីទិន្នន័យសន្តិសុខជាតិ និងការការពារទិន្នន័យឯកជន និងគោលនយោបាយប្រកួតប្រជែងរវាងក្រុមហ៊ុនបច្ចេកវិទ្យាធំៗ។ សកម្មភាពរបស់ចិន ហាក់ដូចជាឆ្លើយតបទៅនឹងច្បាប់អាមេរិក ដែលបានអនុម័តកាលពីខែធ្នូ ដែលតម្រូវឱ្យក្រុមហ៊ុនចិនចុះបញ្ជីជាមួយសហរដ្ឋអាមេរិកឱ្យមានការធ្វើសវនកម្មពីសំណាក់ក្រុមហ៊ុនសវនកម្មអាមេរិក។
ដោយឡែក ក្រុមអ្នកវិភាគក៏បាននិយាយថា ក្រៅពីក្ដីព្រួយបារម្ភពីសុវត្ថិភាពអ្នកប្រើប្រាស់នៅមានកត្តាស៊ីជម្រៅផ្សេងទៀតនៅពីក្រោយវិធានការទាំងនេះ។
«គ្មានអ្វីដែលគណបក្សកុម្មុយនីស្តស្អប់ជាងពេល ដែលស្ថានភាពមិនស្ថិតនៅក្រោមការគ្រប់គ្រងរបស់ខ្លួននោះទេ»។លោក Kendra Schaefer ទីប្រឹក្សាត្រីសិល្ប៍វិទ្យាចិន (Trivium China) (សំដៅលើគណបក្សកុម្មុយនីស្តចិនកំពុងកាន់អំណាច) បានឱ្យដឹងយ៉ាងដូច្នេះ។
គោលបំណងរបស់គណបក្សនេះហាក់ដូចជាបង្កើតយន្តការត្រួតពិនិត្យមួយ ហើយលទ្ធផលដែលអាចទៅរួចនោះ គឺការត្រួតពិនិត្យសុវត្ថិភាពតាមប្រព័ន្ធអ៊ីនធឺណិត អាចអនុញ្ញាតឱ្យអាជ្ញាធរដាក់ហ្វ្រាំងលើការចុះបញ្ជីជាមួយក្រុមហ៊ុនអន្តរជាតិខ្លះ។
បើទោះជាទីក្រុងប៉េកាំង បានលើកទឹកចិត្តដល់ក្រុមហ៊ុននានាឱ្យចុះបញ្ជីជាសកល ប៉ុន្តែការប្រញាប់ប្រញាល់របស់ក្រុមហ៊ុនបច្ចេកវិទ្យាដែលចុះបញ្ជីនៅបរទេសទំនងជាទាក់ទាញចំណាប់អារម្មណ៍របស់ក្រុមនិយតករនៅចិន។
លោក Schaefer បានប្រាប់សារព័ត៌មាន AFP ថា៖ «ការចុះបញ្ជីនៅបរទេសទាំងនេះ កំពុងកើតឡើងដោយគ្មានបទប្បញ្ញត្តិគ្រប់គ្រាន់។ វាគួរតែមាននិយតករចិនយ៉ាងហោចម្នាក់ ដើម្បីត្រួតពិនិត្យ»។
វេបសាយដដែលបានបន្តថា សកម្មភាពដដែលនេះ ក៏អាចជាប្រតិកម្មពីប្រទេសចិន ចំពោះការកើនឡើងនៃការចុះបញ្ជីនៃក្រុមហ៊ុនចិននៅអាមេរិក ដែលមានមូលធននីយកម្មទីផ្សារកើនឡើងជាង ២៤ ពាន់លានដុល្លារ ក្នុងរយៈពេល ១៨ ខែ ងក្រោយនេះ រួមទាំងចំនួនដ៏ច្រើនមិនធ្លាប់មាន ដែលស្មើប្រមាណ ១២,៤ ពាន់លានដុល្លារ នៅឆមាសទី១ នៃឆ្នាំ ២០២១ ផងដែរ។
ការប្រកាសដែលថា ចិនមានគោលបំណងរឹតបន្តឹងការរឹតត្បិតលើការចុះបញ្ជីនៅបរទេសធ្វើឱ្យមានការភ្ញាក់ផ្អើលដល់មជ្ឈមណ្ឌលហិរញ្ញវត្ថុពិភពលោកជាពិសេសទីក្រុងញូវយ៉ក ដែលមានក្រុមហ៊ុនចិនជិត ២៥០ ក្រុមហ៊ុន និងមានមូលធននីយកម្មទីផ្សារជាង ២ ទ្រីលានដុល្លារ ដែលបានចុះបញ្ជី។
ក្រៅពីនេះអាជ្ញាធរក៏បានខិតខំប្រឹងប្រែងទប់ស្កាត់ភាពផ្តាច់មុខនៃក្រុមហ៊ុនបច្ចេកវិទ្យាធំៗ ក្នុងនោះក៏មានការបង្ក្រាបលើក្រុមហ៊ុន Alibaba និងក្រុមហ៊ុនយក្សបច្ចេកវិទ្យា Tencent ដែលត្រូវទទួលការផាកពិន័យពីរដ្ឋាភិបាលក្នុងតម្លៃរាប់ពាន់លានដុល្លារផងដែរ៕