កាលពីថ្ងៃអាទិត្យ មន្ទីរបញ្ចកោណអាមេរិកបានឱ្យដឹងថា ក្រុមអ្នកជំនាញខាងសន្តិសុខ និងការអនុវត្តច្បាប់សហរដ្ឋអាមេរិកកំពុងធ្វើដំណើរទៅកាន់ប្រទេសហៃទី ដើម្បីផ្ដល់នូវជំនួយផ្នែកសន្តិសុខតាមតែអាចផ្ដល់ឱ្យ ក្រោយប្រទេសមានករណីធ្វើឃាតប្រធានាធិបតីប្រទេសហៃទី កាលពីសប្តាហ៍មុន។
អ្នកនាំពាក្យមន្ទីរបញ្ចកោណ John Kirby បានប្រាប់សារព័ត៌មាន Fox News កាលពីថ្ងៃអាទិត្យថា៖ «ក្រុមទីភ្នាក់ងារសន្តិសុខក្នុងស្រុក និងភ្នាក់ងារស៊ើបអង្កេត FBI បាននិងកំពុងធ្វើដំណើរទៅកាន់ប្រទេសហៃទី ដើម្បីពិនិត្យមើលនូវអ្វីដែលយើងអាចធ្វើបាន ដើម្បីជួយក្នុងដំណើរការស៊ើបអង្កេត»។
មន្ត្រីរដ្ឋបាលជាន់ខ្ពស់លោក Joe Biden បានប្រាប់សារព័ត៌មាន Reuter ថា ក្រុមភ្នាក់ងារទាំងនេះនឹងរាយការណ៍សង្ខេបឱ្យប្រធានាធិបតីលោក Joe Biden នៅពេលត្រឡប់មកវិញ ដើម្បីឱ្យលោកធ្វើការសម្រេចចិត្តអំពីអ្វី ដែលអាចធ្វើបាននៅថ្ងៃខាងមុខ។
គួរបញ្ជាក់ផងដែរថា ប្រទេសហៃទី បានស្វែងរកជំនួយពីសហរដ្ឋអាមេរិកក្នុងការធានាសន្តិសុខប្រទេសនិងស៊ើបអង្កេតការធ្វើឃាត ប្រធានាធិបតី JovenelMoise កាលពីថ្ងៃពុធនៅឯគេហដ្ឋាននៅទីក្រុងព័រអូប្រាំងរបស់គាត់ កាលពីសប្ដាហ៍មុនដែលបានធ្វើឱ្យប្រទេសកោះក្រីក្រមួយនេះ ធ្លាក់ចូលក្នុងភាពវឹកវរ៕