ការកើនឡើងនូវករណីកូវីដ ១៩ បំប្លែងថ្មីប្រភេទ Alpha និង Delta នៅទីក្រុងបាងកក និងព្រំដែនខាងត្បូងនៅជិតប្រទេសម៉ាឡេស៊ី បានបង្កើនការភ័យខ្លាចក្នុងចំណោមអាជីវកម្មទេសចរណ៍។
អាជីវកម្មទេសចរណ៍ទាំងនោះ ភ័យខ្លាចវីរុសបំប្លែងថ្មីនេះ អាចនឹងចម្លងចូលកោះទេសចរណ៍រួមមានកោះភូកេត (Koh Phuket) និងកោះសាមុយ (Koh Samui) បន្ទាប់ពីមានការបើកដំណើរការវិស័យទេសចរណ៍ឡើងវិញនៅតំបន់កោះទាំងនោះ។
កោះភូកេត បានបើកស្វាគមន៍ភ្ញៀវទេសចរអន្តរជាតិឡើងវិញ កាលពីថ្ងៃទី ១ កក្កដា ហើយភ្ញៀវទេសចរដែលទទួលការចាក់វ៉ាក់សាំងពេញលេញប្រហែលចំនួន ៤ ០០០ នាក់ បានធ្វើដំណើរមកកោះនេះ ដែលចំនួននេះប្រហែលនឹង ៥ ភាគរយ នៃផលិតផលក្នុងស្រុក មុនពេលមានរោគរាតត្បាតផ្ទុះឡើង កាលពីដើមឆ្នាំ ២០២០។
ទោះយ៉ាងណា បច្ចុប្បន្នទីក្រុងបាងកក កំពុងស្ថិតក្នុងការរឹតត្បិតដោយសារចំនួនករណីវិជ្ជមានកូវីដ ១៩ កើនឡើងច្រើនដែលបណ្តាលឱ្យមន្ទីរពេទ្យខ្វះគ្រែសម្រាប់ដាក់ព្យាបាលអ្នកជំងឺ។ អាជ្ញាធរក្រុងបាងកក បានដាក់បម្រាមគោចរ ដោយបិទភោជនីយដ្ឋាន និងស្ប៉ា និងរឹតត្បិតការធ្វើដំណើរផងដែរ។
ការផ្ទុះឡើងវិញនៃករណីកូវីដ ១៩ នៅប្រទេសថៃនេះ គឺជាពេលវេលាមិនសមស្របសម្រាប់បើកដំណើរការកោះភូកេតឡើងវិញ ទោះបីកោះនេះមានអត្រាឆ្លងទាប និងមានអ្នកទទួលបានការចាក់វ៉ាក់សាំងប្រមាណ ៤២០ ០០០ នាក់ ដែលចំនួននេះ ជិត ៧០ ភាគរយ នៃប្រជាជននៅលើកោះនោះ។
គួរបញ្ជាក់ផងដែរថា ការបើកដំណើរការកោះភូកេតឡើងវិញនេះ នឹងក្លាយជាគំរូសម្រាប់ខេត្តផ្សេងៗទៀតដែលមានន័យថា ខេត្តនីមួយៗត្រូវតែមានវ៉ាក់សាំង និងធានាឱ្យមានការចាក់វ៉ាក់សាំងការពារកូវីដ ១៩ ចំនួន ៧០ ភាគរយ នៃប្រជាជនសរុបនៅក្នុងតំបន់នោះ និងបុគ្គលិកដែលធ្វើការក្នុងវិស័យទេសចរណ៍ ត្រូវទទួលបានការចាក់វ៉ាក់សាំងទាំងអស់គ្នា។
ទោះជាយ៉ាងណា កោះភូកេតអាចនឹងបិទវិញបើសិនជាមានអ្នកវិជ្ជមានកូវីដ ១៩ ចំនួន ៩០ ករណី ក្នុងរយៈពេល ១ សប្តាហ៍។ បន្ថែមពីការបើកកោះភូកេត កោះចំនួន ៣ បន្ថែមនឹងបើកដំណើរការឡើងវិញ នៅថ្ងៃទី ១៥ កក្កដា ដោយយកគំរូតាមកោះភូកេតដែលកោះទាំង ៣ នោះរួមមាន កោះសាមុយ កោះផែង (Koh Phangan) និងកោះតាវ (Koh Tao)។
គួរបញ្ជាក់ផងដែរថា កាលពីខែមិថុនា លោកនាយករដ្ឋមន្រ្តី ប្រាយុធ ចាន-អូចា បាននិយាយថា លោកប្តេជ្ញានឹងបើកប្រទេសឡើងវិញនៅពាក់កណ្តាលខែតុលា ដើម្បីជួយស្តារសេដ្ឋកិច្ចរបស់ប្រទេសជាតិឡើងវិញ។
តាមការស្រង់សម្តីរបស់សារព័ត៌មាន The Diplomat នៅថ្ងៃបើកដំណើរការកោះភូកេតឡើងវិញ លោក Prayut បាននិយាយថា បន្ទាប់ពីបើកដំណើរការតំបន់ទេសចរណ៍កោះឡើងវិញ រដ្ឋាភិបាលបានដឹងពីកម្រិតហានិភ័យដែលអាចមាន។ ប៉ុន្តែយើងត្រូវទទួលយកហានិភ័យនេះ ដូច្នេះប្រជាជនថៃ អាចបើកដំណើរការរកស៊ីបាន។
ប្រទេសថៃ អាចគ្រប់គ្រងស្ថានភាពកូវីដ ១៩ បានជោគជ័យនៅឆ្នាំដំបូងនៅពេលដែលមានរោគរាតត្បាតនេះកើតឡើង ប៉ុន្តែវាបានបំផ្លាញវិស័យទេសចរណ៍របស់ប្រទេសនេះ ហើយវិស័យនេះ ធ្លាប់តែបានផ្តល់ការងារដល់ប្រជាជនថៃរាប់លាននាក់ឯណោះ និងរួមចំណែកប្រមាណ ២០ ភាគរយនៃផលិតផលក្នុងស្រុកសរុបរបស់ប្រទេសថៃ។
យោងតាមការផ្សាយរបស់សារព័ត៌មានរ៉យទ័រ ប្រទេសថៃ បានខាតបង់ថវិកាប្រមាណ ៥០ ពាន់លានដុល្លារនៅពេលដែលចំនួនភ្ញៀវទេសចរបានធ្លាក់ចុះក្នុងអំឡុងពេលមានជំងឺរាតត្បាតនេះ។ យ៉ាងណាមិញ កោះភូកេត គឺពឹងផ្អែកលើវិស័យទេសចរណ៍នេះ ដោយប្រហែល ៩៥ ភាគរយនៃសកម្មភាពសេដ្ឋកិច្ចនៅលើកោះនេះ ផ្តោតលើវិស័យទេសចរណ៍ទាំងស្រុង៕