ការបៀតបៀន និងការយារយី ទៅលើស្ត្រីដែលកាន់សាសនាអ៊ិ ស្លាមបណ្តាលឱ្យ ស្ត្រីដែលរស់នៅប្រទេសកាណាដាមានការភ័យខ្លាចនឹងសុវត្ថិភាពរបស់ខ្លួន។
កាលពីប៉ុន្មានខែមុននេះ នៅប្រទេសកាណាដាមានការវាយប្រហារមួយទៅលើគ្រួសារកាន់សាសនាអ៊ិស្លាម ដែលបង្កដោយអ្នកបើកបររថយន្តម្នាក់បើកទៅបុកគ្រួសារនោះដែលបណ្តាលឱ្យ មានអ្នកស្លាប់ និងរងរបួស។ អាជ្ញាធរបានសន្មតការវាយប្រហារនេះជាបទល្មើសស្អប់ខ្ពើមទៅលើអ្នកកាន់សាសនាអ៊ិស្លាម។
នេះគឺជាហេតុការណ៍មួយដែលកើតមានឡើងទៅលើអ្នកកាន់សាសនាអ៊ិស្លាមនៅប្រទេសកាណាដា ដែលក្លាយជាហេតុការណ៌មួយធ្វើឱ្យអ្នកកាន់សាសនាអ៊ិស្លាមនៅទីនោះមានការភ័យខ្លាចពីសុវត្ថិភាពរបស់ខ្លួន។
លោកស្រី Nur ដែលជាជនជាតិសូម៉ាលីកាត់កាណាដា និងជាសហស្ថាបនិកនៃក្រុមប្រឹក្សាទំនាក់ទំនងស៊ីវិលរវាងអាហ្វ្រិក និងកាណាដាបានបញ្ចេញភាពភ័យខ្លាចរបស់នាងបន្ទាប់ពីបានជួបប្រទះនឹងភាពរើសអើង នៅប្រទេសកាណាដាផ្ទាល់ ព្រមទាំងដឹងពីហេតុការណ៍មួយចំនួនទៅលើអ្នកកាន់សាសនាអ៊ិស្លាមដូចអ្នកស្រីដែរ។
តាមការស្រង់សម្តីរបស់សារព័ត៌មាន Aljazeera លោកស្រី Nur បាននិយាយថា៖ «ស្ត្រីស្បែកខ្មៅកាន់សាសនាអ៊ិស្លាមកំពុងត្រូវបានគេវាយប្រហារហើយពួកគេត្រូវបានគេវាយប្រហារដោយសារតែការរើសអើងជាតិសាសន៍ស្បែកខ្មៅពួកគេត្រូវបានគេវាយប្រហារដោយសារតែជំនឿសាសនាអ៊ិស្លាមហើយពួកគេត្រូវបានគេវាយប្រហារដោយសារតែពួកគេជាស្ត្រី។ ចំណុចទាំងនេះធ្វើឱ្យយើងមិនប្រាកដថានឹងមានអ្វីកើតឡើងចំពោះយើងនៅពេលយើងចេញទៅខាងក្រៅ»។
គួរបញ្ជាក់ផងដែរថា កាលពីចុងខែមិថុនាបងប្អូនស្រី ២ នាក់ ដែលជាស្ត្រីជនជាតិមូស្លីមដែលស្លៀកសម្លៀកបំពាក់ហ៊ីចាប់ត្រូវបានវាយប្រហារដោយបុរសកាន់កាំបិត ហើយបុរសនោះបានបានជេរប្រមាថជាតិសាសន៍របស់អ្នកទាំង ២ លើផ្លូវមួយនៅខាងក្រៅទីក្រុង។ ក្នុងករណីផ្សេងទៀតស្ត្រីមូ ស្លីមត្រូវបានគេបណ្តាញចេញ ឬគំរាមកំហែងខណៈពេលពួកគេរង់ចាំមធ្យោបាយធ្វើដំណើរសាធារណៈ។
ប៉ូលិស Edmonton បានទទួលសេចក្តីរាយការណ៍អំពីឧប្បត្តិហេតុចំនួន ៥ ដែលពាក់ព័ន្ធនឹងស្ត្រីស្បែកខ្មៅដែលពាក់ហ៊ីចាប់តាំងពីថ្ងៃទី ៨ ខែ ធ្នូ ឆ្នាំ ២០២០ ហើយអង្គភាពប្រឆាំងល្មើសរបស់កម្លាំងប៉ូលិសបានចាប់ខ្លួននិងបានធ្វើការចោទប្រកាន់ទៅលើជនសង្ស័យក្នុងករណីនីមួយៗ។
ការទាមទារឱ្យមានវិធានការន្ថែមទៀតចំពោះស្ត្រីកាន់សាសនាអ៊ិស្លាមនៅ Edmonton កើតឡើងចំពេលប្រទេសកាណាដាអំពាវនាវឱ្យរដ្ឋាភិបាលអនុវត្តផែនការសកម្មភាពមួយចំនួន ដើម្បីទប់ស្កាត់ការស្អប់ខ្ពើមសាសនាអ៊ិស្លាម។
សម្រាប់មនុស្សជាច្រើនការវាយប្រហារនៅខែមិថុនា នៅរដ្ឋ Ontario ក៏ដូចជាការបាញ់សម្លាប់ដ៏សាហាវនៅឆ្នាំ ២០១៧ នៅឯវិហារអ៊ិស្លាមនៅក្នុងទីក្រុង Quebec និងការចាក់សម្លាប់កាលពីឆ្នាំមុននៅខាងក្រៅវិហារអ៊ិស្លាមមួយនៅចុងខាងលិចនៃទីក្រុង Toronto បង្ហាញពីបញ្ហាដែលអាចបង្កគ្រោះថ្នាក់ដល់អាយុជីវិតអ្នកកាន់សាសនាអ៊ិស្លាមដែលរស់នៅក្នុងប្រទេសកាណាដា។
តាមការស្រង់សម្តីរបស់សារព័ត៌មាន CBC លោកស្រី Sahada Alolo ប្រធានសមាគមនារីស្ត្រីមូស្លីមអូតាវ៉ា (Ottawa Muslim Women’s Association) បាននិយាយថាលោកស្រីបានកត់សម្គាល់ឃើញនិន្នាការគួរឱ្យរំខានក្នុងប៉ុន្មានឆ្នាំថ្មីៗនេះ បន្ទាប់ពីបទល្មើសស្អប់ខ្ពើមដូចជាការបាញ់សម្លាប់នៅវិហារអ៊ិស្លាមក្នុងទីក្រុង Quebec ឆ្នាំ ២០១៧ ។
លោកស្រី Alolo បាននិយាយថា៖ «យើងរស់នៅដោយភាពភ័យខ្លាច។ វាពិតជាការភ័យខ្លាចហើយខ្ញុំមានអារម្មណ៍ថាយើងមិនសូវយកចិត្តទុកដាក់ខ្ពស់ឡើយ»។ កាលពីខែមិថុនា មានស្ត្រីមូស្លីមជាច្រើនបានទាក់ទងទៅលោកស្រី ដោយមានការព្រួយបារម្ភអំពីសុវត្ថិភាពរបស់ពួកគេ ពេលចេញពីផ្ទះរបស់ពួកគេ៕