សហគមន៍អឺរ៉ុបបានបង្ហាញច្បាប់ថ្មី ដើម្បីកាត់បន្ថយការបំភាយឧស្ម័នផ្ទះកញ្ចក់ត្រឹម ៥៥ ភាគរយ ក្នុងទសវត្សរ៍នេះ។
កាលពីថ្ងៃទីពុធសហភាពអឺរ៉ុបបានស្នើឱ្យមានការផ្លាស់ប្តូរសេដ្ឋកិច្ចទូលាយមួយក្នុងប្លុកនេះដែលនឹងកាត់បន្ថយការពឹងផ្អែកទៅលើឥន្ធនៈផូស៊ីល។
តាមការស្រង់សម្តីរបស់សារព័ត៌មាន Aljazeera អនុប្រធានប្រតិបត្តិនៃគណៈកម្មការអឺរ៉ុបលោក Frans Timmermans បាននិយាយថា៖ «បើខកខានមិនបានធ្វើសកម្មភាពឥឡូវ នេះយើងនឹងធ្វើឱ្យ កូនៗនិងចៅៗរបស់យើងខកចិត្តដែរ ប្រសិនបើខ្ញុំមិនដោះស្រាយបញ្ហានេះទេវានឹងធ្វើឱ្យ មានសង្គ្រាមដណ្តើមទឹកនិងចំណីអាហារ»។
ទីក្រុងប៉េកាំងនិងប្រ៊ុច សែលក៏កំពុងធ្វើសកម្មភាពជាច្រើនខែមុនសន្និសីទស្តីពីការប្រែប្រួលអាកាសធាតុ បន្ទាប់របស់ពិភពលោកដែលគ្រោងនឹងធ្វើនៅខែវិច្ឆិកាឆ្នាំនេះនៅទីក្រុង Glasgow ប្រទេសស្កុតលែនសង្ឃឹមថា នឹងដាក់ចេញគំនិតផ្តួចផ្តើមថ្មីៗ ដើម្បីកំណត់ការបំភាយឧស្ម័ននៅក្នុងបរិយាសផែនដី។
សេចក្ដីព្រាងច្បាប់ដោយគណៈកម្មការអឺរ៉ុបដែលជាក្រុមប្រតិបត្តិរបស់សហភាពអឺរ៉ុបដែលស្ថិតក្នុងមហាអំណាចសេដ្ឋកិច្ចដ៏សំខាន់ ដើម្បីកាត់បន្ថយការបំភាយឧស្ម័នកាបូនឌីអុកស៊ីត និងឧស្ម័នផ្សេងៗទៀត ដូចជាមេតានហើយអ្នកវិទ្យាសាស្ត្រនិយាយថា កំពុងបង្កគ្រោះថ្នាក់ដល់ផែនដី។
ច្បាប់នេះទាមទារឱ្យ មានការផ្លាស់ប្តូរយ៉ាងច្រើនពីសំណាក់ក្រុមហ៊ុននិងក្រុមគ្រួសារដោយជំរុញ ឱ្យប្រើប្រាស់បច្ចេកវិទ្យាដូចជាថាមពលពន្លឺព្រះអាទិត្យនិងយានយន្តអគ្គិសនី។
ផែនការនេះមានការមិនពេញចិត្តពីបណ្តាប្រទេសសហភាពអឺរ៉ុបដែលក្រីក្រមួយចំនួន និងវិស័យឧស្សាហកម្មដែលអះអាងថា ល្បឿននៃការផ្លាស់ប្តូរ និងការបង្កើនបទប្បញ្ញត្តិនេះនឹងក្លាយជាបន្ទុកផ្នែកហិរញ្ញវត្ថុ។ វិធានការនេះក៏នឹងត្រូវបានពិនិត្យយ៉ាងដិតដល់ដោយដៃគូពាណិជ្ជកម្មក្នុងប្លុកនេះផងដែរព្រោះថា ក្រុមហ៊ុនរបស់ពួកគេប្រឈមនឹងការដាក់ទណ្ឌកម្មលើការនាំចេញផលិតផលដែលប្រើកាបូនដូចជាដែកថែប និងស៊ីម៉ងត៍ជាដើម។
ផែនការនេះពាក់ព័ន្ធនឹងការកែលម្អគម្រោងពាណិជ្ជកម្មនៃការបំភាយឧស្ម័នក្នុងប្លុកដែលក្រុមហ៊ុនត្រូវចំណាយសម្រាប់កាបូនឌីអុកស៊ីតដែលពួកគេបញ្ចេញនិងណែនាំពន្ធលើអី វ៉ាន់ដឹកប្រេងនិងអាកាសចរណ៍ជាលើកដំបូង។
ច្បាប់ថ្មីនេះ នឹងពាក់ព័ន្ធនឹងសំណើសំខាន់ៗជាច្រើនដែលភាគច្រើនត្រូវបានបង្កើតដោយច្បាប់រួចហើយដើម្បីបំពេញតាមគោលដៅចាស់របស់សហភាពអឺរ៉ុបក្នុងការកាត់បន្ថយការបំភាយឧស្ម័ន ៤០ ភាគរយ នៅឆ្នាំ ២០៣០ បើប្រៀបធៀបទៅនឹងកម្រិត ១៩៩០។ ច្បាប់នេះក៏នឹងត្រូវអនុម័តដោយសមាជិក និងអ្នកនយោបាយសហភាពអឺរ៉ុបមកពី ២៧ ប្រទេស។
មេដឹកនាំពិភពលោកបានព្រមព្រៀងគ្នាកាលពី ៦ ឆ្នាំមុននៅទីក្រុងប៉ារីសដើម្បីរក្សាកម្ដៅផែនដីឱ្យកើនត្រឹមក្រោម ២ អង្សាសេ ហើយមិនលើសពី១,៥ អង្សាសេ នៅចុងសតវត្សរ៍នេះ៕