.jpg)
យោងតាមទិន្នន័យជាផ្លូវការបានឱ្យដឹងថា ចំនួនជនជាតិអាមេរិកាំងដែលស្លាប់ដោយសារការប្រើថ្នាំញៀនហួសកម្រិតកាលពីឆ្នាំមុនកើនឡើងជាខ្លាំងនៅក្នុងអំឡុងពេលមានវិបត្តិកូវីដ ១៩។
ជាសរុប ប្រជាជនអាមេរិកប្រមាណ ៩៣ ពាន់នាក់បានស្លាប់ ដោយសារការប្រើគ្រឿងញៀនហួសកម្រិតនៅក្នុងឆ្នាំ ២០២០ ដែលកើនឡើងជិត ៣០ ភាគរយ បើប្រៀបធៀបទៅនឹងឆ្នាំមុន។ ក្រុមអ្នកជំនាញបាននិយាយថា ការកើនឡើងខ្លាំងនេះ សឱ្យឃើញពីភាពគ្រោះថ្នាក់របស់គ្រឿងញៀន និងការរួមចំណែករបស់វិបត្តិកូវីដ ១៩។
ក្នុងនោះផងដែរ ថ្នាំ fentanyl ដែលជាប្រភេទថ្នាំ Opioid សំយោគប្រើសម្រាប់បំបាត់ការឈឺជាកត្តាដែលធ្វើឱ្យទិន្នន័យនេះកើនឡើងខ្លាំងកាលពីឆ្នាំមុន។ ប្រភេទថ្នាំ Opioid សំយោគនេះ មានឥទ្ធិពលខ្លាំងជាងហេរ៉ូអ៊ីន (heroin) ដល់ទៅ ៥០ ដងឯណោះ ។
ក្រុមអ្នកជំនាញបាននិយាយថា អ្នកជួញថ្នាំញៀនបានបន្ថែមសារធាតុ fentanyl នេះ ទៅក្នុងថ្នាំញៀន ដែលជួញដូរតាមផ្លូវធម្មតា ដើម្បីបន្ថែមឥទ្ធិពលរបស់វា។ ទោះយ៉ាងណា ភាពឯកោនិងអារម្មណ៍ឯកកោ ដោយសារការដាក់ដោយឡែក ដើម្បីទប់ស្កាត់ជំងឺកូវីដ-១៩គឺជាកត្តា ដែលបង្កឱ្យមានការកើនឡើងនៃការប្រើប្រាស់គ្រឿងញៀននេះ។
បងប្អូនប្រុសរបស់កញ្ញា Gina Malagold ឈ្មោះ Dylan បានប្រើថ្នាំហួសកម្រិតនៅខែមេសា ឆ្នាំ ២០២០។ កញ្ញាបានប្រាប់សារព័ត៌មាន BBC News ថា គ្រួសាររបស់នាងជួបប្រទះការលំបាកក្នុងការស្វែងរកគ្លីនិក និងមជ្ឍមណ្ឌលបន្សាបគ្រឿងញៀនណាស់ ខណៈពេលដែលទីកន្លែងទាំងអស់នោះភាគច្រើនសុទ្ធតែត្រូវប្រើប្រាស់ ដើម្បីព្យាបាលអ្នកជំងឺកូវីដ ១៩៕
