នៅប្រទេសអាល្លឺម៉ង់ មនុស្សយ៉ាងតិច ១៣៣ នាក់ បានស្លាប់ដោយសារទឹកជំនន់ដែលបណ្តាលមកពីភ្លៀងធ្លាក់ខ្លាំង។ ទឹកជំនន់នៅប្រទេសអាល្លឺម៉ង់ និងអឺរ៉ុបលើកនេះក្លាយជាគ្រោះមហន្តរាយធម្មជាតិដ៏អាក្រក់បំផុតដែលបានវាយប្រហារប្រទេសនេះក្នុងរយៈពេលជិត ៦០ ឆ្នាំ។
តំបន់ Ahrweiler ស្ថិតនៅភាគខាងត្បូងនៃទីក្រុង Cologne បានរាយការណ៍ថា មានមនុស្សស្លាប់យ៉ាងតិចណាស់ ៩០ នាក់ ក្នុងនោះមានអ្នកពិការចំនួន ១២ នាក់ ដែលស្នាក់នៅមជ្ឈមណ្ឌលថែទាំជនពិការ។
តាមការរាយការណ៍របស់សារព័ត៌មាន CNN នៅតាមដងទន្លេ Rur នៅរដ្ឋ North Rhine-Westphalia ភាគខាងលិចប្រទេសអាល្លឺម៉ង់ មានទំនប់វារីអគ្គិសនីមួយបានបាក់កាលពីយប់ថ្ងៃទី ១៦ កក្កដា។ នៅថ្ងៃដដែលនោះ អាជ្ញាធរអាល្លឺម៉ង់បានចាប់ផ្តើមជម្លៀសប្រជាជនប្រហែល ៧០០ នាក់ នៅ Ophoven ក្នុងទីក្រុង Wassenberg។
យោងតាមប្រព័ន្ធផ្សព្វផ្សាយរបស់អាល្លឺម៉ង់បានផ្សាយថា គេហដ្ឋានប្រហែល ២៥ ខ្នង កំពុងស្ថិតក្នុងគ្រោះថ្នាក់នៃការដួលរលំនៅក្នុងស្រុក Schuldbei Adenau ក្នុងតំបន់ភ្នំ Eifel ដែលជាកន្លែងប្រកាសអាសន្ន។ ផ្ទះមួយចំនួនត្រូវបានកាត់ផ្តាច់ទាំងស្រុងដោយសារលំហូរទឹក ហើយក្រុមជួយសង្រ្គោះមិនអាចទៅដល់តាមទូកបានទេ។
រដ្ឋរបស់ប្រទេសអាល្លឺម៉ង់ដូចជា Rhineland-Palatinate និង North Rhine-Westphalia ក្នុងប្រទេសអាល្លឺម៉ង់ រងការវាយប្រហារខ្លាំងជាងគេប៉ុន្តែប្រទេសហូឡង់ក៏រងផលប៉ះពាល់យ៉ាងធ្ងន់ធ្ងរផងដែរ។ កាលពីថ្ងៃទី ១៦ កក្កដា មានការព្យាករដែលថា អាចមានភ្លៀងធ្លាក់ខ្លាំងនៅទូទាំងតំបន់ខណៈដែលមន្រ្តីមូលដ្ឋានបានស្តីបន្ទោសការរងការខូចខាតនេះបណ្តាលមកពីការប្រែប្រួលអាកាសធាតុ។
លោក Armin Laschet នាយករដ្ឋមន្រ្តីប្រចាំរដ្ឋ North Rhine-Westphalia បានស្តីបន្ទោសការប្រែប្រួល អាកាសធាតុដែលបណ្តាលមកពីការកើនឡើងនូវកម្តៅផែនដីក្នុងដំណើរទស្សនកិច្ចរបស់លោកទៅកាន់តំបន់ដែលរងគ្រោះដោយសារទឹកជំនន់នេះខ្លាំង។
តាមការស្រង់សម្តីរបស់សារព័ត៌មាន BBC លោកបាននិយាយថា៖ «យើងនឹងប្រឈមមុខនឹងព្រឹត្តិការណ៍បែបនេះម្តងហើយម្តងទៀតហើយនោះមានន័យថាយើងចាំបាច់ត្រូវពន្លឿនវិធានការការពារអាកាសធាតុ…ពីព្រោះការប្រែប្រួលអាកាសធាតុមិនត្រូវបានកំណត់ចំពោះរដ្ឋតែមួយទេ»។
អ្នកជំនាញនិយាយថា ការប្រែប្រួលអាកាសធាតុត្រូវបានគេរំពឹងថានឹងបង្កើនផលប៉ះពាល់ច្រើនប៉ុន្តែប្រសិនបើភ្ជាប់ហេតុការណ៍មួយទៅនឹងការឡើងកម្តៅពិភពលោកតែ ១ គត់ គឺមានភាពស្មុគស្មាញ។
អធិការបតីអាល្លឺម៉ង់លោកស្រី Angela Merkel បានហៅហេតុការណ៍នេះថាជាគ្រោះមហន្តរាយហើយបាននិយាយថា លោកស្រីមានភាពសោកសៅចំពោះអ្នកដែលបានបាត់បង់ជីវិតសោយសារគ្រោះមហន្តរាយនេះ។
គួរបញ្ជាក់ផងដែរថា ប៉ូលិស និងទាហានជាច្រើននាក់ត្រូវបានដាក់ពង្រាយទៅកាន់តំបន់ដែលរងផលប៉ះពាល់ ដើម្បីជួយអ្នកស្រុកដែលកំពុងជាប់គាំងនៅក្នុងគេហដ្ឋានរបស់ពួកគេ។ប្រជាជនជាច្រើនបានឡើង ទៅលើដំបូលផ្ទះដើម្បីរង់ចាំការជួយសង្គ្រោះពីសំណាក់ក្រុមការងារសង្រ្គោះបន្ទាន់របស់រដ្ឋាភិបាល។នៅភាគខាងលិចនៃប្រទេសអាល្លឺម៉ង់សាលារៀនក៏ត្រូវបានបិទ៕