កាលពីថ្ងៃសុក្រ កន្លងទៅ ក្រុមប្រទេសដឹកនាំក្រុមសហប្រតិបត្តិការសេដ្ឋកិច្ចអាស៊ីប៉ាស៊ីហ្វិក (APEC) រួមទាំងសហរដ្ឋអាមេរិកប្រទេសរុស្ស៊ី និងប្រទេសចិន បានប្ដេជ្ញាប្រយុទ្ធប្រឆាំងនឹងជំងឺកូវីដ ១៩ ទ្វេដង ដោយធ្វើការពង្រីកការចែករំលែកនិងផលិតវ៉ាក់សាំងកូវីដ ១៩ ដើម្បីប្រយុទ្ធប្រឆាំងនឹងជំងឺរាតត្បាតជាសកល។ នេះបើតាមការឱ្យដឹងពីសារព័ត៌មាន CNA កាលពីពេលថ្មីៗនេះ។
មេដឹកនាំប្រទេសនានា កំពុងខិតខំប្រឹងប្រែងប្រយុទ្ធប្រឆាំងនឹងវ៉ារ៉្យង់ Delta ថ្មី បាននិយាយថា ពួកគេនឹងលើកទឹកចិត្តដល់ប្រទេស ដែលចង់ផ្ទេរបច្ចេកវិទ្យាផលិតវ៉ាក់សាំងដោយស្មគ្រ័ចិត្ត តាមលក្ខខណ្ឌដែលបានព្រមព្រៀងគ្នា។
ក្រុមប្រទេសមេដឹកនាំទាំងនេះ បាននិយាយនៅក្នុងសេចក្តីថ្លែងការណ៍រួមមួយថា៖ «ជំងឺរាតត្បាតនេះនឹងនៅតែបន្តជះឥទ្ធិពលយ៉ាងធ្ងន់ធ្ងរដល់ប្រជាជននិងសេដ្ឋកិច្ចក្នុងតំបន់របស់យើង។យើងនឹងយកឈ្នះលើភាពអាសន្នផ្នែកសុខភាពនេះ ដោយការបង្កើនល្បឿនចែកចាយវ៉ាក់សាំង ដែលមានសុវត្ថិភាព ប្រសិទ្ធភាព ធានាគុណភាព និងតម្លៃសមរម្យ»។
មេដឹកនាំក្រុម APEC បានពិភាក្សាអំពីសកម្មភាពរួមដើម្បីស្វែងរកដំណោះស្រាយ និងធ្វើយ៉ាងណា ដើម្បីស្ដារសេដ្ឋកិច្ចឡើងវិញពីផលប៉ះពាល់បណ្ដាលមកពីជំងឺរាតត្បាតនេះ។លោក Lee Hsien Loong នាយករដ្ឋមន្រ្តីសិង្ហបុរី ក៏បានចូលរួមក្នុងកិច្ចប្រជុំនេះដែរ។
ប្រទេសនូវែលសេឡង់ដែលជាម្ចាស់ផ្ទះកិច្ចប្រជុំកិច្ចសហប្រតិបត្តិការសេដ្ឋកិច្ចអាស៊ី-ប៉ាស៊ីហ្វិក បាននិយាយនៅសប្តាហ៍នេះថា ខ្លួននឹងធ្វើជាប្រធានកិច្ចប្រជុំ វិសាមញ្ញមុនការជួបជុំជាផ្លូវការមួយ នៅក្នុងខែ វិច្ឆិកា ដែលនេះជាកិច្ចប្រជុំលើកទី១ ដែលត្រូវបានធ្វើឡើង។
នាយករដ្ឋមន្រ្តីនូវែលហ្សេឡង់លោកស្រី Jacinda Ardern បាននិយាយបន្ទាប់ពីកិច្ចប្រជុំថា៖«ការពិភាក្សារបស់យើង បានជំរុញឱ្យយើងចែកចាយវ៉ាក់សាំងឱ្យបានច្រើនហួសពីជាតិសាសន៍របស់យើង។ ឥឡូវនេះ យើងកំពុងផ្តោតលើគ្រប់ទិដ្ឋភាពទាំងអស់នៃការចូលរួម ក្នុងកិច្ចខិតខំប្រឹងប្រែងចាក់វ៉ាក់សាំងសកល បង្កើតវ៉ាក់សាំង ចែករំលែកវ៉ាក់សាំងនិងប្រើប្រាស់វ៉ាក់សាំង»។
លោកស្រីបាននិយាយថា មេដឹកនាំទាំងអស់បានឯកភាពថា នេះមិនមែនជា ព្រឹត្តិការណ៍ជំងឺរាតត្បាតចុងក្រោយរបស់ពិភពលោកទេ ដូច្នេះហើយការត្រៀមខ្លួនរួចជាស្រេចពិតជាមានសារៈសំខាន់ណាស់។ កិច្ចប្រជុំនេះ បង្ហាញពីក្តីកង្វល់ដែលកំពុងកើនឡើងនៅជុំវិញបញ្ហាជំងឺកូវីដ ១៩ ដែលកំពុងរីករាលដាលនៅក្នុងតំបន់ ខណៈប្រទេសជាច្រើនរួមមានឥណ្ឌូណេស៊ី ថៃ និងអូស្ត្រាលី ក៏កំពុងប្រឈមមុខនឹងរលកថ្មី។
ប្រធានាធីបតីរុស្ស៊ីលោក Vladimir Putin បានថ្លែងក្នុងកិច្ចប្រជុំថា ឧបសគ្គសកលចំពោះការផលិតនិងការចែកចាយវ៉ាក់សាំង ចាំបាច់ត្រូវដោះស្រាយឱ្យចេញ។ ដោយឡែក នាយករដ្ឋមន្រ្តីជប៉ុនលោក Yoshihide Suga បានសម្តែងការប្តេជ្ញាចិត្តចំពោះមេដឹកនាំដទៃទៀតឱ្យរៀបចំព្រឹត្តិការណ៍អូឡាំពិកប្រកប ដោយសុខ និងសុវត្ថិភាពផងដែរ។
ជាមួយគ្នានេះ ប្រធានាធិបតីចិនលោក Xi Jinping បានឱ្យដឹងនៅក្នុងកិច្ចប្រជុំដដែលនេះថា ប្រទេសចិនបានផ្តល់វ៉ាក់សាំងជាង ៥០០ លានដូស ដល់ប្រទេសកំពុងអភិវឌ្ឍន៍ដទៃទៀត គ្រោងនឹងផ្តល់ជំនួយចំនួន ៣ ពាន់លានដុល្លារអាមេរិកក្នុងរយៈពេល ៣ ឆ្នាំខាងមុខទៀត ដើម្បីគាំទ្រដល់ការឆ្លើយតបជំងឺកូវីដ ១៩ និងការស្តារសេដ្ឋកិច្ចនិងសង្គម នៅក្នុងប្រទេសកំពុងអភិវឌ្ឍន៍ដទៃទៀត។
បើទោះបីជាមានការបង្ហាញនូវដំណោះស្រាយមួយចំនួនក្នុងកិច្ចប្រជុំក៏ដោយភាពតានតឹងក្នុងចំណោមសមាជិក APEC ជាពិសេសរវាងបស្ចិមប្រទេស និងចិនជុំវិញបញ្ហាប្រភពដើមនៃវីរុស រហូតដល់ពាណិជ្ជកម្មស៊ីនជាំង ហុងកុងនិងសមុទ្រចិនខាងត្បូងក៏នៅតែកើតមានឡើង។
ដោយកិច្ចប្រជុំបានបញ្ចប់ ទីក្រុងវ៉ាស៊ីនតោនបានប្រកាសដាក់ទណ្ឌកម្មលើបុគ្គលចិន ៧ នាក់ ជុំវិញការបង្ក្រាបរបស់ក្រុងប៉េកាំងទៅលើលទ្ធិប្រជាធិបតេយ្យនៅហុងកុង ដែលជាកិច្ចខិតខំប្រឹងប្រែងចុងក្រោយរបស់ខ្លួន ដើម្បីធ្វើឱ្យទីក្រុងប៉េកាំងទទួលខុសត្រូវចំពោះអ្វីដែលខ្លួនហៅថា ការលុបបំបាត់នីតិរដ្ឋនៅក្នុងអតីតអាណានិគមអង់គ្លេស។ ជាការឆ្លើយតប ចិនបានសម្តែងការខឹងសម្បាចំពោះការដាក់ទណ្ឌកម្មនេះ។
មន្ត្រីរដ្ឋបាលជាន់ខ្ពស់លោក Joe Biden បាននិយាយថា ប្រធានាធិបតីប្រទេសនេះ គ្រោងនឹងប្រើវេទិកានេះ ដើម្បីបង្ហាញពីការប្តេជ្ញាចិត្តរបស់គាត់ចំពោះប្រទេសឥណ្ឌូ-ប៉ាស៊ីហ្វិក ដោយសេរីនិងបើកចំហ៕