.jpg)
ប្រជាជនរងចាំចាក់អ៊ុកស៊ីហ្ស៊ែនចូលក្នុងបំពងនៅខាងក្រៅរោងចក្រ ១ ក្នុងទីក្រុងយុំាងហ្គោន ស្របពេលករណីឆ្លងជំងឺកូវីដ ១៩ កើនឡើងយ៉ាងខ្លាំង។ AFP
ប្រជាពលរដ្ឋមីយ៉ាន់ម៉ាមួយចំនួន កំពុងប្រឆាំងនឹងបម្រាមគោចរយោធា ដើម្បីស្វែងរកអុកស៊ីហ្ស៊ែនឱ្យទៅអ្នកជំងឺកូវីដ ១៩ ធ្ងន់ធ្ងរ ខណៈរលកឆ្លងក្នុងសហគមន៍ដែលមានវីរុសបំប្លែងថ្មីបានផ្ទុះឡើងនៅប្រទេសនេះ។
រលកថ្មីនៃការឆ្លងក្នុងសហគមន៍កើតឡើងក្រោយមានរដ្ឋប្រហារក្នុងប្រទេសហើយបុគ្គលិកពេទ្យជាច្រើននាក់បានចូលរួមយុទ្ធនាការប្រឆាំងនឹងយោធាទូទាំងប្រទេសដែលបណ្តាលឱ្យខ្វះធនធានក្នុងការគ្រប់គ្រងស្ថានការណ៍បច្ចុប្បន្ន។
បច្ចុប្បន្នប្រទេសមីយ៉ាន់ម៉ា កំពុងប្រឈមនឹងកង្វះអុកស៊ីហ្ស៊ែន ព្រមទាំងបុគ្គលិនពេទ្យសម្រាប់ ព្យាបាលអ្នកជំងឺប្រជាជនមីយ៉ាន់ម៉ាមួយចំនួនបានល្មើសនឹងវិធានការរឹតបន្តឹងរបស់យោធា ដើម្បីស្វែងរកអុកស៊ីហ្ស៊ែន ដល់អ្នកជំងឺដែលត្រូវការ។ ក្រុមស្ម័គ្រមួយចំនួនបានទទួលការឱបត្ថម្ភ ជាថវិកា តាមរយៈអ្នកឧ បត្ថម្ភក្នុងបណ្តាញសង្គមដើម្បីទិញបំពង់អុកស៊ីហ្ស៊ែនដើម្បីផ្គត់ផ្គង់អ្នកជំងឺ។
លោក Phoe Thar បានចេញទៅក្រៅពីព្រលឹមដើម្បីប្រមូលបំពង់អុកស៊ីហ្ស៊ែនពីផ្ទះរបស់អ្នកជំងឺកូវីដ ១៩ នៅក្នុងទីក្រុងម៉ាន់ដាឡាយប្រទេសមីយ៉ាន់ម៉ា។ លោក Thar និងក្រុមអ្នកស្ម័គ្រចិត្តព្យាយាមជួយសង្គ្រោះ ជីវិតនៅក្នុងប្រទេសមីយ៉ាន់ម៉ា ដែលប្រព័ន្ធសុខាភិបាលបានដួលរលំយ៉ាងខ្លាំងចាប់តាំងពីមានរដ្ឋប្រហារថ្ងៃទី ១ ខែកុម្ភៈ ហើយឥឡូវនេះប្រឈមមុខនឹងការរីករាលដាលកូវីដ ១៩ ក្នុងសហគមន៍ថែមទៀតផង។
តាមការស្រង់សម្តីរបស់សារព័ត៌មានរ៉យទ័រលោក Thar បាននិយាយថា បញ្ហាប្រឈមដ៏ធំសម្រាប់ក្រុម ការងារស្ម័គ្រចិត្តរបស់លោក គឺបច្ចុប្បន្នតម្រូវការបំពង់អុកស៊ីហ្ស៊ែន គឺមានច្រើន។
តួលេខរបស់ក្រសួងសុខាភិបាលមីយ៉ាន់ម៉ាបានបង្ហាញថា អ្នកស្លាប់ដោយសារកូវីដ១៩ បានកើនឡើង ដល់ ២៣៣ នាក់ ត្រឹមថ្ងៃទី ១៧ កក្កដា ប៉ុន្តែពេទ្យព្យាបាលអ្នកជំងឺបាននិយាយថាចំនួនអ្នកស្លាប់ គឺខ្ពស់ជាងនេះទៅទៀត។
អ្នករាយការណ៍ពិសេសរបស់អង្គការសហប្រជាជាតិស្តីពីស្ថានភាពសិទ្ធិមនុស្សនៅក្នុងប្រទេសមីយ៉ាន់ម៉ា បានអំពាវនាវឱ្យមានការចូលរួមជាអន្តរជាតិជាបន្ទាន់ ដើម្បីដោះស្រាយបញ្ហាដែលជាកត្តាកំពុងជំរុញឱ្យមានវិបត្តិកូវីដ ១៩ នៅក្នុងប្រទេសមីយ៉ាន់ម៉ា។
លោកTom Andrewsអ្នករាយការណ៍ពិសេសរបស់អង្គការ សហប្រជាជាតិស្តីពីស្ថានភាពសិទ្ធិ មនុស្សនៅក្នុងប្រទេសមីយ៉ាន់ម៉ា បាននិយាយថា វិស័យសុខាភិបាលនៅប្រទេសមីយ៉ាន់ម៉ាបានដួលរលំ រួមទាំងការមិនទុកចិត្តរបស់ប្រជាជនមីយ៉ាន់ម៉ាទៅកាន់របបយោធាបានបង្កើតជាកត្តាដែលអាចបណ្តាលឱ្យបាត់បង់ជីវិតនៅប្រទេសមីយ៉ាន់ម៉ា ជាច្រើន បើសិនជាគ្មានជំនួយបន្ទាន់ពីសហគមន៍អន្តរជាតិទេ។
លោក Andrews បានបញ្ជាក់ជាថ្មីនូវការអំពាវនាវរបស់លោកទៅក្រុមប្រឹក្សាសិទ្ធិមនុស្ស នៅទីក្រុង ហ្ស៉ឺណែវកាលពីថ្ងៃទី ៧ ខែកក្កដា ស្តីពីស្ថានការបន្ទាន់ នៅប្រទេសមីយ៉ាន់ម៉ា ដើម្បីផ្តល់ជំនួយមនុស្ស ធម៌បន្ទាន់ដល់ប្រទេសនេះ។
លោកបាននិយាយថា៖ «របបយោធាខ្វះធនធានសមត្ថភាព និងភាពស្របច្បាប់ ដើម្បីធ្វើឱ្យវិបត្តិនេះ ស្ថិតនៅក្រោមការគ្រប់គ្រង។ វិបត្តិនៅក្នុងប្រទេសមីយ៉ាន់ម៉ា គឺមានគ្រោះថ្នាក់ខ្លាំង ជាពិសេសដោយ សារតែការមិនទុកចិត្តរបស់ប្រជាជនមីយ៉ាន់ម៉ាទៅកាន់របបយោធា»។
លោកបានបន្តនិយាយថា សហគមន៍អន្តរជាតិត្រូវជួយសម្របសម្រួលស្ថាប័នមិនមែនយោធា និងមិនមែននយោបាយ ដើម្បីមានគំនិតផ្តួចផ្តើមឆ្លើយតបស្ថានការណ៍កូវីដ ១៩ ដែលរួមមាន យុន្ទាការចែកចាយវ៉ាក់សាំងកាពារកូវីដ ១៩ ដែលប្រជាជនមីយ៉ាន់ម៉ាអាចនឹងជឿទុកចិត្តបាន៕
