.jpg)
នៅរដ្ឋ Oregon នៃសហរដ្ឋអាមេរិកមានភ្លើងឆេះព្រៃដ៏ខ្លាំងមួយនៅលើផ្ទៃដីជាង ៣០ ម៉ឺនហិកតា ដោយបង្កឱ្យមានការជម្លៀសមនុស្សរាប់ពាន់នាក់នៅក្នុងតំបន់នោះ។ អ្នកពន្លត់អគ្គិភ័យជាង ២ ពាន់ នាក់កំពុងព្យាយាមគ្រប់គ្រងស្ថានការណ៍ភ្លើងឆេះព្រៃនោះ ដែលគេហៅថា The Bootleg Fire។
ភ្លើងឆេះព្រៃ The Bootleg Fireបានបណ្ដាលឱ្យប្រជាជនយ៉ាងតិច ២ពាន់នាក់ នៅតំបន់ជន បទភាគច្រើនបោះបង់ចោលផ្ទះសំបែងរបស់ពួកគេដើម្បីទៅស្នាក់នៅតំបន់ដែលមានសុវត្ថិភាព។ គិតមកដល់ពេលនេះផ្ទះនិងអគារចំនួន ១៦០ត្រូវបានបំផ្លាញដោយសារឧបទ្ទវហេតុភ្លើងឆេះព្រៃនេះ។
គួរបញ្ជាក់ផងដែរថា ភ្លើងឆេះព្រៃនៅរដ្ឋ Oregon នេះកើតឡើងចាប់តាំងពីថ្ងៃទី៦ ខែកក្កដាមកម្ល៉េះ ហើយបានដុតបំផ្លាញតំបន់មួយដែលធំជាងទីក្រុងLos Angeles ផងដែរ។
តាមការស្រង់សម្តីរបស់សារព័ត៌មានBBCកាលពីថ្ងៃទី ១៨ កក្កដា ប្រធានផ្នែកប្រតិបត្តិការលោកJohn Flannigan បានប្រាប់ប្រព័ន្ធផ្សព្វផ្សាយអាមេរិកថា កម្តៅភ្លើងឆេះព្រៃអាចនឹងកើនឡើងលឿនជាងមុន ដោយសារអាកាសធាតុមិនអំណោយផលដែលមានសភាពក្តៅស្ងួតហើយខ្យល់មិនមានស្ថិរភាពដែលធ្វើឱ្យ កម្តៅកើនឡើងលឿនជាងមុន។
ភ្លើងឆេះព្រៃនេះមានសភាពខ្លាំងណាស់ដែលអគ្គិភ័យនេះអាចបង្កើតឱ្យមានអាកាសធាតុមួយដែលឯកឯងនៅក្នុងតំបន់ដែលមានភ្លើងឆេះនោះ។ អាំងតង់ស៊ីតេនិងកម្តៅខ្លាំងរបស់អគ្គិភ័យនេះអាចបង្កឱ្យ មានខ្យល់ វិលជុំវិញដែលបង្កើតបានជាពពកហើយជួនកាលបង្កើតបានជាព្យុះកំបុតត្បូងបក់កំដៅផ្សែងនិងខ្យល់ខ្លាំង។
ភ្លើងឆេះព្រៃជាច្រើនរាលដាលទៅតំបន់ផ្សេងយ៉ាងឆាប់រហ័សហើយភ្លើងឆេះព្រៃThe Bootleg Fireនេះ ក៏មិនខុសគ្នាដែរ។ ក្នុងរយៈពេល២-៣ថ្ងៃដំបូង អគ្គិភ័យនេះ បានបង្កឱ្យមានការឆេះព្រៃត្រឹមប៉ុន្មាន ៣ ទៅ ៤គីឡូម៉ែត្រការេប៉ុណ្ណោះឬតិចជាងនេះ ប៉ុន្តែក្នុងរយៈពេលប៉ុន្មានថ្ងៃបន្ទាប់ភ្លើងក៏រាលដាលបន្ថែមដល់ទៅជាង១០០ គីឡូម៉ែត្រការ៉េ។
បុគ្គលិកពន្លត់អគ្គិភ័យព្យាយាមពន្លត់អគ្គិភ័យនេះ ប៉ុន្តែស្ថានភាពនៅតំបន់ឆេះ ព្រៃនោះនៅតែមិនអន់ ថយដែលបានបង្ខំឱ្យបុគ្គលិកពន្លត់អគ្គិភ័យជិត ២ ២០០ នាក់ ដកថយទៅទីតាំងមានសុវត្ថិភាព។
មូលហតុដែលបណ្តាលឱ្យ មានភ្លើងឆេះព្រៃភាគច្រើនបណ្តាលមកពី បរិមាណកម្តៅដែលទាក់ទង នឹង ភាពស្ងួតនៃព្រៃឈើនិងរុក្ខជាតិដទៃទៀតទាំងរុក្ខជាតិងាប់និងរស់។ តំបន់ភាគខាងត្បូងនៃរដ្ឋ Oregonក៏ដូចជាតំបន់ភាគខាងលិចភាគច្រើនគឺមានអាកាសធាតុស្ងួតខ្លាំង ដែលជាលទ្ធផលបណ្តាលឱ្យ មានគ្រោះ រាំងស្ងួតដែលកំពុងប៉ះពាល់ដល់តំបន់ជាច្រើន៕
