ក្រុមស្រាវជ្រាវមួយនៅប្រទេសចិន បានបង្ហាញពីគម្រោងដ្រូនមុជទឹករបស់ខ្លួនដែលអាចសម្គាល់តាមដាន និងវាយប្រហារសត្រូវដោយមិនចាំបាច់មានមនុស្សបញ្ជា។ នេះបើតាមឱ្យដឹងពីសារព័ត៌មាន South China Morning Post។
គម្រោងសម្ងាត់ដែលត្រូវបានផ្តល់មូលនិធិដោយយោធានេះ ត្រូវបានប្រកាសជាផ្នែកៗកាលពីសប្តាហ៍មុន ជាមួយនឹងការចែកចាយព័ត៌មានតាមរយៈឯកសារស្ដីអំពីការសាកល្បងប្រើប្រាស់ប្រភេទដ្រូនមុជទឹកគ្មានមនុស្សបើក (UUV) ដែលហាក់ដូចជាដាក់សាកល្បងនៅច្រកសមុទ្រតៃវ៉ាន់កាលពីជាង ១ ទសវត្សរ៍មុនឯណោះ។
គេមិនទាន់ដឹងច្បាស់ថា ហេតុអ្វីបានជាប្រទេសចិន ទើបបានប្រកាសលម្អិតអំពីការសាកល្បងនេះ ប៉ុន្តែភាពតានតឹងលើច្រកសមុទ្រតៃវ៉ាន់ថ្មីៗ នេះបានកើនឡើងដល់ចំណុចខ្ពស់បំផុតក្នុងប៉ុន្មានទសវត្សរ៍ចុងក្រោយនេះ។ បណ្តាប្រទេសដូចជាសហរដ្ឋអាមេរិក និងជប៉ុនបានលើកឡើងពីលទ្ធភាពនៃការធ្វើអន្តរាគមន៍ផ្នែកយោធា ប្រសិនបើក្រុងប៉េកាំងដែលចាត់ទុកកោះតៃវ៉ាន់ជាផ្នែកមួយនៃទឹកដីរបស់ខ្លួនព្យាយាមដណ្តើមយកកោះនេះដោយកម្លាំងបាយ។
យោងតាមសាស្ត្រាចារ្យ Liang Guolong និងសហសេវិកមកពីសាកលវិទ្យាល័យវិស្វកម្មនាវាមុជទឹកកំពូលរបស់ប្រទេសចិន បានឱ្យដឹងថា យន្ដហោះរ៉ូបូតទាំងនេះ កំពុងធ្វើការវិវឌ្ឍម្ដងបន្ដិចៗ ប៉ុន្តែការធ្វើឱ្យប្រសើរបច្ចេកវិទ្យាអាចនឹងធ្វើឡើងជាកញ្ចប់សរុបតែម្ដង។ នាវាប្រភេទផ្សេងៗគ្នា អាចត្រូវប្រើប្រាស់ដើម្បីតាំងទីនៅក្នុងបាតសមុទ្រ និងដាក់ធ្វើឱ្យសកម្មក្នុងករណីមានការប៉ះទង្គិច ឬសង្គ្រាម។
អ្នកស្រាវជ្រាវបាននិយាយនៅក្នុងឯកសារដែលបានចេញផ្សាយនៅក្នុងទិនានុប្បវត្តិនៃសាកលវិទ្យាល័យវិស្វកម្ម Harbin Engineering University កាលពីថ្ងៃសុក្រថា៖ «សេចក្តីត្រូវការនៃអភិវឌ្ឍន៍អាវុធក្រោមទឹកនេះ នឹងនាំមកនូវឱកាសអភិវឌ្ឍន៍ថ្មីសម្រាប់សង្គ្រាមអាវុធដោយគ្មានមនុស្សបញ្ជានៅថ្ងៃអនាគត»។
នាវាមុជទឹកភាគច្រើនមានកុំព្យូទ័រ ដើម្បីជួយកំណត់អត្តសញ្ញាណ ឬតាមដានគោលដៅ ប៉ុន្តែប្រតិបត្តិករអាវុធទាំងនេះនៅតែត្រូវការប្រើភ្នែក និងត្រចៀក ដើម្បីធ្វើការវិនិច្ឆ័យលើបញ្ហាសំខាន់ៗ ដូចជាការកំណត់នាវាដែលសង្ស័យ និងការសម្រេចចិត្តចុងក្រោយ វាយប្រហារលើគោលដៅដោយប្រធានក្រុម។
លោក Liang បានសរសេរថា ភាពស្មុគស្មាញនៃបរិយាកាសខាងក្រៅមានន័យថា មនុស្សជាធម្មតាត្រូវការសំឡេង និងរូបភាពច្បាស់មួយ ដើម្បីទទួលបានលទ្ធផលល្អក្នុងការកំណត់សម្គាល់ និងតាមដានគោលដៅសត្រូវ។
យ៉ាងណាមិញ ដ្រូនមុជទឹកដែលគ្មានមនុស្សបើកនេះ មានតួនាទីទទួលព័ត៌មានរកមើលគោលដៅវាយតម្លៃស្ថានភាព និងការត្រួតពិនិត្យប៉ារ៉ាម៉ែត្រ និងមានសមត្ថភាពធ្វើការសម្រេចចិត្តឯករាជ្យទាំងស្រុងដែលផ្ដល់នូវបច្ចេកវិទ្យាទំនើប មិនដូចនាវាមុជទឹកបុរាណមួយចំនួន ដែលគ្មានប្រយោជន៍។
ទោះជាយ៉ាងណា អ្នកវិទ្យាសាស្ត្រមិនទាន់រកឃើញគំរូរូបវិទ្យាដែលដំណើរការបានល្អទាំងលើអាកាស និងទឹកនៅឡើយទេ ដូច្នេះដំណើរនៃការឆ្លងកាត់ដែនសមុទ្រស្ថិតក្នុងភាពមិនច្បាស់លាស់នៅឡើយ។
ដោយឡែក ប្រទេសជាច្រើនក៏បានវិនិយោគយ៉ាងច្រើនក្នុងការស្រាវជ្រាវនៅក្នុងវិស័យនេះដូចគ្នា ដោយសង្ឃឹមថា ការអភិវឌ្ឍបច្ចេកវិទ្យានេះអាចនឹងផ្លាស់ប្តូររបៀបនៃសមរភូមិលើដែនសមុទ្រ។
ជាក់ស្ដែងប្រទេសចិន កំពុងអភិវឌ្ឍយន្តហោះដ្រូន transmedium ដែលត្រូវបានបញ្ចេញ ដោយនាវាមុជទឹករាប់រយម៉ែត្រក្រោមផ្ទៃទឹកសម្រាប់ឃ្លាំមើលការទំនាក់ទំនង ឬវាយប្រហារតាមអាកាសផងដែរ។ នេះបើយោងតាមព័ត៌មានដែលបានបង្ហាញជាសាធារណៈ។
អ្នកវិទ្យាសាស្ត្រយោធាចិន ក៏កំពុងអភិវឌ្ឍមីស៊ីលរយៈចម្ងាយឆ្ងាយដែលមានល្បឿនលឿនដែលអាចលោតចូល និងចេញពីទឹក ដើម្បីគេចពីប្រព័ន្ធការពាររបស់នាវាចម្បាំង ឬនាវាផ្ទុកយន្តហោះទៀតផង។ ទោះបីជាការដាក់ពង្រាយជាផ្លូវការនូវអាវុធបែបនេះ នៅមិនទាន់មានគេរាយការណ៍ជាចំហក្ដី ប៉ុន្តែអ្នកជំនាញយោធាមួយចំនួនជឿជាក់ថា ពួកគេនឹងមានឥទ្ធិពលយ៉ាងខ្លាំងទៅលើយុទ្ធសាស្ត្រ និងយុទ្ធសាស្ត្រកងទ័ពជើងទឹកដែលមានស្រាប់៕