លោក Nyan Win ទីប្រឹក្សាជាន់ខ្ពស់របស់លោកស្រី អ៊ុងសាន ស៊ូជី បានទទួលមរណភាពនៅក្នុងមន្ទីរពេទ្យ ដោយសារជំងឺកូវីដ ១៩ ក្នុងជន្មាយុ ៧៨ ឆ្នាំ ក្រោយពីឆ្លងជំងឺនេះ អំឡុងពេលជាប់ឃុំនៅពន្ធនាគារ Insein ក្រុងយ៉ាំងហ្គោន។ នេះបើតាមសេចក្ដីថ្លែងការណ៍ជាភាសាភូមាដោយគណបក្សសម្ព័ន្ធជាតិប្រជាធិបតេយ្យ (NLD)។
បើតាមសេចក្ដីថ្លែងការណ៍ខាងលើបុរសវ័យ ៧៨ ឆ្នាំរូបនេះ ត្រូវបានចាប់ខ្លួន ក្នុងអំឡុងពេលក្រុមយោធាមីយ៉ាន់ម៉ាធ្វើរដ្ឋប្រហារទម្លាក់រដ្ឋាភិបាលស៊ីវិល កាលពីថ្ងៃទី ១ ខែកុម្ភៈ ហើយឃុំខ្លួននៅពន្ធនាគារ Insein ចាប់ពីពេលនោះរហូតមក។ លោកទើបតែបញ្ជូនទៅកាន់មន្ទីរពេទ្យ កាលពីសប្ដាហ៍មុននេះ ក្រោយពីឆ្លងជំងឺកូវីដ ១៩។
ប្រភពព័ត៌មានយោធាមីយ៉ាន់ម៉ា បានប្រាប់សារព័ត៌មាន Reuters ថា លោក Nyan Win បានផ្ទុកនូវជំងឺប្រចាំកាយ ដូចជា ជំងឺទឹកនោមផ្អែម និងមានសម្ពាធឈាមខ្ពស់។ ប្រភពយោធាដដែលបានបន្ថែមទៀតថា ក្នុងចំណោមអ្នកឆ្លងនៅក្នុងពន្ធនាគារសរុប ៣៧៥ នាក់ មាន ៦ នាក់បានបាត់បង់ជីវិត។
ក្រៅពីជួបវិបត្តិនយោបាយរ៉ាំរ៉ៃតាំងពីខែកុម្ភៈមក មីយ៉ាន់ម៉ាកំពុងតែប្រឈមមុខនឹងការកើនឡើងនូវករណីវិជ្ជមាននៃជំងឺកូវីដ ១៩ ចាប់តាំងពីខែមិថុនាមក។ ប្រទេសនេះ មានករណីប្រចាំថ្ងៃជាមធ្យម ៥ ពាន់ករណី នៅក្នុង ១ សប្ដាហ៍ចុងក្រោយ៕
ហ៊ីម រដ្ឋា