.jpg)
ប្រធានអង្គការសុខភាពពិភពលោក តេដ្រូស អាដហាណូម ហ្គឺប្រីយេស៊ុស។ AFP
លោក Tedros Adhanom Ghebreyesus ប្រធានអង្គការសុខភាពពិភពលោក (WHO) បានរៀបរាប់កាលពីថ្ងៃពុធថា ព្រឹត្តិការណ៍កីឡាអូឡាំពិកទីក្រុងតូក្យូគួរតែជាគំរូ បង្ហាញដល់ពិភពលោកនូវអ្វី ដែលយើងអាចជម្នះបាន ប្រសិនបើមានផែនការនិងវិធានការត្រឹមត្រូវ ក្នុងការទប់ស្កាត់វីរុសកូវីដ ១៩។
ដោយថ្លែងទៅកាន់សមាជិកគណៈកម្មាធិការអូឡាំពិកអន្តរជាតិនៅក្នុងសម័យប្រជុំនៅរដ្ឋធានីជប៉ុន លោក Tedros បាននិយាយថា ពិភពលោក កំពុងត្រូវការព្រឹត្តិការណ៍អូឡាំពិកឥឡូវនេះណាស់ ជាការអបអរនៃក្តីសង្ឃឹមមួយ។ លោកបានមានប្រសាសន៍ថា៖ «កីឡាអូឡាំពិកនេះ ផ្ដល់នូវថាមពល ដើម្បីនាំពិភពលោករួមគ្នា បំផុសនិងបង្ហាញនូវអ្វីដែលអាចជម្នះបាន»។
លោកថ្លែងថា៖ «សូមឱ្យពន្លឺនៃក្តីសង្ឃឹមចេញពីទឹកដីនេះបំភ្លឺដល់ពន្លឺថ្ងៃថ្មីមួយ ដែលពិភពលោកមានសុខសុវត្ថិភាពជាងមុន។ វាជាក្តីសង្ឃឹមដ៏ស្មោះត្រង់របស់ខ្ញុំដែលខ្ញុំប៉ងឱ្យព្រឹត្តិការណ៍កីឡាតូក្យូនេះ ប្រព្រឹត្តទៅដោយជោគជ័យ»។
មកដល់ពេលនេះ គេរកឃើញករណីវិជ្ជមាន ៦៧ ករណីនៅក្នុងប្រទេស ដែលមកដល់ប្រទេសជប៉ុនចាប់តាំងពីថ្ងៃទី ១ ខែកក្កដាមក ទោះបីជាមានវិធានការតឹងរ៉ឹងសម្រាប់ទប់ស្កាត់យ៉ាងណាក្ដី៕
