អស់រយៈពេលជាច្រើនសតវត្សរ៍មកហើយ អ្នកធ្វើចារកម្មបានដាក់គោលដៅទៅលើបុគ្គលដូចជា ប្រធានាធិបតីនាយករដ្ឋមន្ត្រី ឬស្ដេច ដែលគ្រប់គ្រងជោគវាសនានៃប្រទេសណាមួយហើយនៅសតវត្សរ៍ទី២១ អ្នកធ្វើចារកម្មកាន់មានភាពងាយស្រួល ដោយបុគ្គលទាំងនេះមានទូរស័ព្ទស្មាតហ្វូនដូចជាកម្មវិធី IOS និង Android នៅក្នុងដៃគ្រប់រូប។
នេះ គឺជាហេតុផលមូលដ្ឋានគ្រឹះនៃការរកឃើញដ៏គួរឱ្យចាប់អារម្មណ៍ក្នុងការស៊ើបអង្កេតដោយស្ថាប័នព័ត៌មានអន្តជាតិចំនួន ១៧ ដែលរួមមានកាសែត The Washington Post និង The Guardian ទៅលើការបែកធ្លាយទិន្នន័យរបស់ក្រុមហ៊ុនបច្ចេកវិទ្យាឃ្លាំមើល និងចារកម្មអ៊ីស្រាអែល ក្រុមហ៊ុន NSO Groups។
នៅក្នុងរយៈពេលប៉ុន្មានខែថ្មីៗនេះ ការវិភាគលើបញ្ជីលេខទូរស័ព្ទច្រើនជាង ៥០ ០០០ ខ្សែ បានមកពីការបែកធ្លាយខាងលើ និងការត្រួតពិនិត្យទូរស័ព្ទស្មាតហ្វូនរបស់ជនរងគ្រោះមួយចំនួនបានរកឃើញថា កម្មវិធីចារកម្ម Pegasus របស់ NSO ត្រូវបានលក់ឱ្យប្រទេសជាច្រើននៅជុំវិញពិភពលោក ហើយត្រូវបានប្រើដើម្បីឃ្លាំមើលសកម្មជន អ្នកសារព័ត៌មាន អ្នកនយោបាយ និងបុគ្គលឯកជនមួយចំនួន។
ក្នុងចំណោមលេខទូរស័ព្ទច្រើនជាង ៥០ ០០០ ខ្សែ ក្រុមស្ថាប័នព័ត៌មានអន្តជាតិបានរកឃើញលេខទូរស័ព្ទផ្ទាល់ខ្លួនរបស់ប្រធានាធិបតីបារាំងលោក អេម៉ានុយអែល ម៉ាក្រុង និងប្រមុខរដ្ឋ ប្រមុខ រដ្ឋាភិបាលផ្សេងទៀតចំនួន ១៣ រូប រួមជាមួយមន្ត្រីការទូត មន្ត្រីយោធា និងអ្នកនយោបាយជាច្រើនទៀតមកពី ៣៤ ប្រទេស។
ខុទ្ទកាល័យប្រធានាធិបតីបារាំងបាននិយាយថា ប្រសិនបើទូរស័ព្ទរបស់លោក ម៉ាក្រុង ពិតជាត្រូវបានរកឃើញលេខនៅក្នុងបញ្ជីមែននោះ វាជារឿងធ្ងន់ធ្ងរ។
ដោយស្រង់សម្តីពីប្រភពមួយកាសែតបារាំង Le Monde បានរាយការណ៍ថា លេខទូរស័ព្ទ ១ ក្នុងចំណោមលេខទូរស័ព្ទលោក ម៉ាក្រុង ប្រើប្រាស់ជាញឹកញាប់ចាប់តាំងពីឆ្នាំ ២០១៧ ត្រូវបានដាក់ចូលបញ្ជីឃ្លាំមើលដោយភ្នាក់ងារចារកម្មប្រទេសម៉ារ៉ុក។
បន្ទាប់ពីការចេញផ្សាយរបស់កាសែត Le Monde ប្រទេសម៉ារ៉ុក បានចេញសេចក្ដីថ្លែងការណ៍ ១ ថា ខ្លួនមិនមានអ្វីទាក់ទងនឹងការប្រើប្រាស់កម្មវិធី Pegasus ទេ ហើយច្រានចោល «ការចោទប្រកាន់គ្មានមូលដ្ឋាន និងមិនពិត»។
ក្រុមហ៊ុន NSO បាននិយាយថា លោក ម៉ាក្រុង មិនមែនជាគោលដៅរបស់អតិថិជនពួកគេណាមួយឡើយ ហើយបន្ថែមទៀតការឈ្មោះ និងលេខទូរស័ព្ទក្នុងបញ្ជីនេះមិនមានន័យថា ពួកគេត្រូវបានជ្រើសរើសសម្រាប់ការឃ្លាំមើលដោយ Pegasus ទេ។ ប៉ុន្តែអ្នកជំនាញបានយល់ឃើញថា បញ្ជីនេះ គឺអាចប្រើដោយអតិថិជនរបស់ NCO ដើម្បីត្រៀមធ្វើការឃ្លាំមើលនៅពេលក្រោយដូចដែលបានរកឃើញក្នុងការពិនិត្យទូរស័ព្ទរបស់ជនរងគ្រោះមួយចំនួន។
បញ្ជីនេះក៏រួមមានប្រធានាធិបតីអ៊ីរ៉ាក់ Barham Salih និងប្រធានាធិបតីអាហ្វ្រិកខាងត្បូង លោក Cyril Rama phosa នាយករដ្ឋមន្ត្រីបច្ចុប្បន្នចំនួន ៣ រូប គឺលោក Imran Khan នៃប្រទេសប៉ាគីស្ថាន លោក Mostafa Madboulyនៃប្រទេសអេហ្ស៊ីប និងលោក Saad-Eddine El Othmani របស់ប្រទេសម៉ារ៉ុក។
អតីតនាយករដ្ឋមន្ត្រី ៧ រូបគឺលោក Ahmed Obeid bin Daghr នៃប្រទេសយេម៉ែន លោក Saad Hariri នៃប្រទេសលីបង់ លោក Ruhakana Rugunda នៃអ៊ូហ្គង់ដា លោក Edouard Philippe នៃប្រទេសបារាំង លោក Bakitzhan Sagintayev នៃប្រទេសកាហ្សាក់ស្ថាន លោក Noureddine Bedoui របស់ប្រទេសអាល់ហ្សេរី និងលោក Charles Michel នៃបែលហ្ស៊ិក ដែលយោងទៅតាមកាលបរិច្ឆេទនៅក្នុងបញ្ជីត្រូវបានគេដាក់នៅទីនោះ ខណៈពេលដែលពួកគេនៅក្នុងតំណែង។ ព្រះមហាក្សត្រ Muhammad VI នៃប្រទេសម៉ារ៉ុក និងអគ្គនាយកអង្គការសុខភាពពិភពលោកលោក Tedros Ghebreyesus ក៏ស្ថិតក្នុងបញ្ជីនេះដែរ។
គ្មានមេដឹកនាំណាម្នាក់បានផ្ដល់ទូរស័ព្ទរបស់ពួកគេ ដើម្បីធ្វើការផ្ទៀងផ្ទាត់ថា តើពួកគេត្រូវបានឃ្លាំមើលដោយ Pegasus ដែរឬទេ?