.jpg)
យានរុករកឈ្មោះ Perseverance របស់ទីភ្នាក់ងារអវកាសអាមេរិកបានត្រៀមខ្លួនរួចជាស្រេចក្នុងការខួងយកគំរូថ្មនៅភពអង្គារជាលើកដំបូងរបស់ខ្លួន ដើម្បីនាំថ្មទំហំប៉ុនម្រាមដៃ វេចខ្ចប់ដាក់ក្នុងបំពង់បិទជិតត្រឡប់មកផែនដីវិញ។
យានដែលបានចុះចតកាលពីខែកុម្ភៈនេះ គឺជាយានរ៉ូបូតដែលសិក្សាអំពីទម្រង់ផែនដី ឬភពដទៃ និងជីវិតក្រៅផែនដីត្រូវបានរចនាឡើងដើម្បីជួយអ្នកវិទ្យាសាស្ត្រ រកមើលដាននៃជីវិតពីបុរាណនៅតំបន់ Jezero Crater ដែលទំនងជាអតីតបឹងរាប់ពាន់លានឆ្នាំមុនរបស់ភពអង្គារ។ យានដដែលបានរំកិលខ្លួនប្រហែល ១ គីឡូម៉ែត្រ ពីកន្លែងដែលខ្លួនដាក់ជើង ហើយឈប់នៅកន្លែងមួយឈ្មោះថា Paver Stones។
យោងតាមការចុះផ្សាយរបស់សារព័ត៌មាន BBC លោក Ken Farley ប្រធានអ្នកវិទ្យាសាស្ត្របាននិយាយថា គេចង់កំណត់ថា តើ Paver Stonesទាំងនេះ គឺជាសិលាកម្ទេចកំណ ឬជាសិលាភ្នំភ្លើងពីប្រភពដើម។ រវាងសិលាទាំង ២ នេះ តើមួយណាក៏គួរឱ្យចាប់អារម្មណ៍? ប៉ុន្តែគុណភាពពិសេសនៃថ្មភ្នំភ្លើងគឺថា ពួកវាអាចចុះកាលបរិច្ឆេទបានដោយមានភាពជាក់លាក់ខ្ពស់ និងត្រឹមត្រូវនៅក្នុងមន្ទីរពិសោធន៍៕
ហួន ឌីណា
