ប្រធានាធិបតីសហរដ្ឋអាមេរិក លោក ចូ បៃដិន បាននិយាយកាលពីថ្ងៃអង្គារថា យុទ្ធនាការចាក់វ៉ាក់សាំងរបស់ប្រទេសមានសភាព និងស្ថានភាពថេរដូចជាការឡើងភ្នំ ដែលមានកម្ពស់ខ្ពស់ បន្ទាប់ពីចូលកាន់តំណែងក្នុងសម័យមួយនៃភាពងងឹត ដោយមានជនជាតិអាមេរិកច្រើនជាង ៣ ០០០ នាក់ បានស្លាប់ដោយសារជំងឺកូវីដ ១៩ ជារៀងរាល់ថ្ងៃ។ លោកបានរៀបរាប់ថា៖ «វានឹងមិនមានភាពងាយស្រួលទេ»។
សារពត៌មានស៊ីអិនអិនបានរាយការណ៍កាលពីថ្ងៃអង្គារថា ការរីករាលដាលនៃជំងឺរាតត្បាតកូវីដ ១៩ កើនឡើងវិញ ការប្រេះឆាផ្នែកនយោបាយ និងភាពមិនប្រាកដប្រជាចំពោះជោគវាសនានៃរបៀបវារៈគោលនយោបាយរបស់លោក បៃដិន ទាំងក្នុង និងក្រៅប្រទេសបានធ្វើឱ្យមន្ត្រីជាន់ខ្ពស់ដឹងច្បាស់ថា រដ្ឋបាលលោក បៃដិន កំពុងប្រឈមមុខនឹងពេលវេលាដ៏លំបាកមួយ។
១ ភាគ ៨ នៃអាណត្ដិរបស់គាត់បានបញ្ចប់ទៅហើយ លោក បៃដិន បានលើកឡើងនៅក្នុងកិច្ចប្រជុំគណៈរដ្ឋមន្រ្តីអំពីលទ្ធផលជឿនលឿនដ៏សំខាន់ប្រឆាំងនឹងជំងឺកូវីដ ១៩ ឆ្ពោះទៅរកភាពរស់រវើកនៃសេដ្ឋកិច្ច និងការស្តារភាពជាអ្នកដឹកនាំពិភពលោករបស់សហរដ្ឋអាមេរិកឡើងវិញហើយបាននិយាយថា ជោគជ័យដែលលោកសម្រេចបាន គឺដោយសារមានជនជាតិអាមេរិកភាគច្រើននៅពីក្រោយរូបលោក។
លោក បៃដិន មានអំណះអំណាងមួយចំនួនសម្រាប់គាំទ្រការលើកឡើងរបស់លោកដែលថា មានជនជាតិអាមេរិកជាច្រើននៅគាំទ្រលោកដោយយោងទៅលើការវាយតម្លៃនៃការយល់ព្រម និងពេញចិត្តរបស់ប្រជាជនមកលើរូបលោកដែលអត្រាគាំទ្ររបស់លោក បៃដិន នៅតែមានស្ថិរភាពប្រហែលជាង ៥០ ភាគរយ ដែលខ្ពស់ជាងអតីតប្រធានាធិបតីលោក ដូណាល់ ត្រាំ។ លោក បៃដិន បាននិយាយដោយសុទិដ្ឋិនិយមតាមធម្មតាថា៖ «ខ្ញុំគ្រាន់តែគិតថា គ្មានអ្វីដែលអាមេរិក មិនអាចធ្វើបានទេនៅពេលដែលជនជាតិអាមេរិកទាំងអស់ធ្វើវាជាមួយគ្នា”។
លោក បៃដិន បានអនុម័តសេចក្តីព្រាងច្បាប់ដើម្បីជួយសង្គ្រោះបញ្ហាកូវីដ ១៩ ដែលមានទំហំជិត ២ សែនកោដិដុល្លារ ហើយបានបោះជំហានទៅមុខយ៉ាងធំធេងប្រឆាំងនឹងភាពក្រីក្ររបស់កុមារ និងការផ្លាស់ប្តូរសេដ្ឋកិច្ចឱ្យងើបឡើងវិញ ដើម្បីផ្តល់ផលប្រយោជន៍ដល់ប្រជាជនក្រីក្រ។ ការចាក់វ៉ាក់សាំងរបស់លោក បៃដិន បានទៅដល់ប្រជាជនចំនួន ១៦០ លាននាក់ហើយ។
មានមនុស្សរាប់លាននាក់បានចេញពីការដាក់ខ្លួនឱ្យនៅដាច់ដោយឡែក ហើយចេញក្រៅនៅតាមផ្លូវហាយវេ និងបានជួបជុំកាគ្រួសារប្រកបដោយភាពរីករាយ។ លោកប្រធានាធិបតីក៏បានបង្កើត និងស្តារលទ្ធិប្រជាធិបតេយ្យឡើងវិញផងដែរ ដែលជាចំណុចស្នូលនៃតំណែងប្រធានាធិបតីរបស់លោកទាំងនៅក្នុងប្រទេស និងក្នុងគោលនយោបាយការបរទេសរបស់សហរដ្ឋអាមេរិក។
ចំណែកឯនៅក្រៅប្រទេសវិញចំណាត់ការរបស់សហរដ្ឋអាមេរិកទៅលើការលួចយកទិន្នន័យតាមគេហទំព័រតាមអ៊ីនធឺណិត ពីប្រទេសរុស្ស៊ី និងចិន បានបង្ហាញថា វាជារឿងមួយដែលអាចបង្ហាញឱ្យឃើញថា «អាមេរិកវិលត្រឡប់មកវិញហើយ»។
ដោយឆ្លងកាត់ចំណាត់ការ និងវិធានការនៅក្នុងរយៈពេល ៦ ខែដំបូងនៅក្នុងអាណត្តិរបស់លោក បៃដិន នៅក្នុងសេតវិមាន គឺជាមេរៀនមួយដែលបានបង្ហាញពីចំណុចខ្វះខាតនៃក្រឹត្យក្រមរបស់តំណែងប្រធានាធិបតីទំនើបនៅសហរដ្ឋអាមេរិក។ ជ័យជម្នះយ៉ាងច្បាស់ដូចថ្ងៃរបស់លោក បៃដិន នៅក្នុងការបោះឆ្នោតកាលពីឆ្នាំមុនមិនបានផ្តល់ឱ្យគាត់នូវអំណាចពេញលេញ ដើម្បីសម្រេចចិត្តនៅក្នុងព្រឹទ្ធសភា និងក្នុងសភានោះទេ។
លោក បៃដិន បានពន្យល់ថា គាត់ជឿជាក់ថា លោកត្រូវបានប្រជាពលរដ្ឋអាមេរិកជ្រើសរើសមិនមែនមកដើម្បីតែបញ្ចប់ជំងឺរាតត្បាតប៉ុណ្ណោះទេ ប៉ុន្តែលោកក៏ត្រូវបានគេផ្តល់ជំនឿចិត្តឱ្យលោកដើរតួជាអ្នកជួសជុលបញ្ហារបស់អាមេរិកផងដែរ៕
មឹង ច័ន្ទសុម៉ានីតា