ក្រុមអ្នកជំនាញសន្តិសុខអ៊ីនធឺណិត កំពុងជំរុញឱ្យក្រុមហ៊ុននានារៀបចំវិធានមួយ ដើម្បីជួយសម្រួលដល់បុគ្គលិករបស់ខ្លួនក្នុងការរាយការណ៍ស្ដីអំពីការរំលោភបំពានតាមប្រព័ន្ធអ៊ីនធឺណិត។ យ៉ាងណាមិញ ក្រុមហ៊ុនជាច្រើន បានចុះហត្ថលេខាព្រមព្រៀងគំនិតផ្ដួចផ្ដើមនេះរួចហើយ។
នេះបើយោងតាមប្រធានក្រុមអ្នកជំនាញសន្តិសុខ ដែលគំនិតផ្តួចផ្តើមនេះ បានចាប់ផ្តើមកាលពីថ្ងៃ ព្រហស្បតិ៍ កន្លងទៅ។
អ្នកស្រី Lisa Forte ប្រធានក្រុមសន្តិសុខអ៊ីនធឺណិត Red Goat Cyber Security បាននិយាយថា សូម្បីតែអ្នកស្រី ក៏ធ្លាប់ទទួលបាននូវការរំលោភបំពានតាមប្រព័ន្ធអ៊ីនធឺណិត ដែលរួមមានការផ្ញើនូវរូបភាពអាសអាភាស និងមិនសួរមួយចំនួនក្នុងគណនីផ្លូវការ LinkedIn Twitter និង Instagram របស់អ្នកស្រី ហើយពួកទាំងនេះ មិនមែនប្រើគណនីអនាមិកទេ។
ទោះយ៉ាងណា វេទិកាប្រព័ន្ធផ្សព្វផ្សាយសង្គម តែងត្រូវប្រឈមមុខនឹងការរិះគន់ជានិច្ច ដោយសារវិធានការនៃការឆ្លើយតបនឹងការរាយការណ៍ស្ដីពីការរំលោភបំពាននៅមានលក្ខណៈស្រាល។ ក្រុមហ៊ុនបណ្ដាញសង្គមទាំងនេះ ប្រើបច្ចេកវិទ្យាស្វ័យប្រវត្តិកម្មផង និងមនុស្សផង ដើម្បីកំណត់ និងឆ្លើយតបចំពោះការរំលោភបំពានទាំងនេះ។
លោកស្រី Forte បាននិយាយថា៖ «យើងអាចមានអារម្មណ៍ថា វេទិកាសង្គមទាំងនេះ និងប៉ូលិស ដូចមិនបានធ្វើអន្តរាគមន៍អ៊ីចឹង ហើយបើប្ដឹងមេធាវី ត្រូវចំណាយថវិកាច្រើន ហើយបណ្ដឹងជាសាធារណៈបែបនេះ អាចនឹងមានលក្ខណៈអវិជ្ជមាន។ ដូច្នេះ ដំណោះស្រាយល្អបំផុត ដែលយើងមានគឺប្រសិនបើ យើងអាចកំណត់អ្នករំលោភបំពាន យើងត្រូវរាយការណ៍ទៅនិយោជិត»។
អ្នកស្រីបន្តថា៖ «យើងមិននិយាយថា ក្រុមហ៊ុនត្រូវទទួលខុសត្រូវ ចំពោះអាកប្បកិរិយានោះទេ ប៉ុន្តែពួកគេ អាចសម្រេចចិត្តលើវិធី ដែលសមស្របបំផុតក្នុងការដោះស្រាយបញ្ហានេះ»៕